(फोटो सौजन्य- सोशल मीडिया)
kareena kapoor: कॉमेडियन-अभिनेता कपिल शर्माच्या ‘द ग्रेट इंडियन कपिल शो’च्या नव्या भागात बॉलिवूडची लोकप्रिय जोडी करीना कपूर आणि सैफ अली खान प्रेक्षकांच्या भेटीला येणार आहे. या भागाचा प्रोमो नेटफ्लिक्सने प्रदर्शित केला असून, त्यात कपिल शर्मा या जोडीसोबत धमाल करताना दिसत आहे. गप्पांच्या ओघात करीनाने तिच्या काही खास सवयी सांगितल्या, तर सैफने तिची मजेशीर पद्धतीने चेष्टा केली. विशेष म्हणजे, रात्री झोपण्यापूर्वी करीना तिच्या पायांना तूप लावते, असा खुलासा सैफने केला आहे.
प्रोमोमध्ये कपिल शर्मा करीना आणि सैफचे स्वागत करताना त्यांच्या लग्नाला १४ वर्षे झाल्याचा उल्लेख करतो. दोघेही इतकी वर्षे झाली तरी तरुण आणि फ्रेश कसे दिसतात, असा प्रश्न विचारत तो सैफला त्यांच्या खाण्यापिण्याच्या सवयींबद्दल विचारतो.
यावर सैफ अली खान म्हणतो, “आजकाल घरी खूप तूप येतं.” त्यानंतर करीना सांगते की, त्यांच्या घरात तुपाचा भरपूर वापर होतो. घरात तूप खरंच खाल्लं जातं का, असा प्रश्न कपिलने विचारल्यावर करीना म्हणते, “मुले खातात… आम्ही खातो.”
मात्र, त्यानंतर सैफने करीनाची एक खास सवय सांगितली. तो म्हणाला, “आम्ही फक्त तूप खात नाही… ती रात्री तिच्या पायांना तूप लावते.” करीनाने यामागचं कारण सांगण्यास सुरुवात केली असता सैफने पुन्हा एक मजेशीर टिप्पणी केली.
“किती रोमँटिक आहे ना? रात्री आमच्या बेडरूममध्ये अगदी रस्त्याच्या कडेला असलेल्या ढाब्यासारखा वास येतो,” असं सैफ म्हणाला. त्याच्या या वक्तव्याने सेटवर उपस्थित असलेले सर्वजण हसू लागले.
करीना कपूरने सांगितलं तिच्या सवयीमागचं कारण
या गप्पांदरम्यान करीना कपूरने रात्री पायांना तूप लावण्याच्या सवयीबद्दलही सांगितलं. तिच्या या सवयीवर सैफने केलेली मस्करी सध्या प्रोमोमधील लक्षवेधी क्षण ठरत आहे. दोघांमधील हा मिश्किल संवाद पाहून चाहत्यांनाही या भागाची उत्सुकता लागली आहे.
सैफ अली खान आणि करीना कपूर यांचा ‘द ग्रेट इंडियन कपिल शो’मधील हा विशेष भाग १७ ऑक्टोबर रोजी रात्री ८ वाजता नेटफ्लिक्सवर प्रसारित होणार आहे. या कार्यक्रमात सुनील ग्रोव्हर, अर्चना पूरण सिंह यांच्यासह इतर कलाकारही प्रेक्षकांचं मनोरंजन करताना दिसतात.
करीना आणि सैफ यांची जोडी, त्यांचा मजेशीर संवाद आणि कपिल शर्माची विनोदी शैली यामुळे हा भाग प्रेक्षकांसाठी खास ठरण्याची शक्यता आहे.
.png "Videos"){kind=small}
