(फोटो सौजन्य- सोशल मीडिया)
Mahesh Tinaikar Death: मनोरंजनविश्वातून एक दुःखद बातमी समोर आली आहे. भारतीय रॉक संगीतविश्वातील प्रसिद्ध गिटारवादक आणि संगीत शिक्षक महेश तिनाईकर यांचे वयाच्या ६३व्या वर्षी निधन झाले आहे. १५ ऑक्टोबर रोजी हृदयविकाराच्या झटक्याने त्यांनी अखेरचा श्वास घेतल्याची माहिती समोर आली आहे. त्यांच्या निधनाने संगीतविश्वात शोककळा पसरली असून, अनेक कलाकार आणि चाहत्यांनी सोशल मीडियाच्या माध्यमातून त्यांना श्रद्धांजली वाहिली आहे. अभिनेता, गायक आणि चित्रपट निर्माता फरहान अख्तर तसेच संगीतकार विशाल दादलानी यांनीही महेश तिनाईकर यांच्या आठवणींना उजाळा देत भावनिक पोस्ट शेअर केल्या आहेत.
महेश तिनाईकर हे १९८४ मध्ये स्थापन झालेल्या ‘रॉक मशीन’ या रॉक बँडच्या संस्थापक सदस्यांपैकी एक होते. पुढे याच बँडला ‘इंडस क्रीड’ या नावाने ओळखले जाऊ लागले. या बँडमध्ये गायक उदय बेनेगल, कीबोर्डवादक झुबिन बालापोरिया, बासवादक मार्क सेल्विन, गिटारवादक जयेश गांधी आणि ड्रमवादक मार्क मेनेझेस यांचा समावेश होता. महेश तिनाईकर यांनी आपल्या गिटारवादनातून भारतीय रॉक संगीतविश्वात महत्त्वपूर्ण योगदान दिले. त्यांच्या निधनामुळे संगीतप्रेमींना मोठा धक्का बसला आहे.
फरहान अख्तरची भावनिक पोस्ट
महेश तिनाईकर यांच्या निधनाची बातमी समोर आल्यानंतर फरहान अख्तरने इन्स्टाग्रामवर त्यांचा कृष्णधवल फोटो शेअर केला. या फोटोसोबत त्याने, “आत्म्याच्या शांतीत विश्राम करा बंधू. महेश तिनाईकर,” अशा शब्दांत आपल्या भावना व्यक्त केल्या. फरहानच्या या पोस्टमधून महेश तिनाईकर यांच्याविषयीचा आदर आणि त्यांच्या जाण्याचे दुःख व्यक्त झाले.
Exclusive: ‘मासिक पाळी हे महिलेचं दुबळेपण नाही’ आजची दुर्गा जान्हवी तांबटचे परखड मत
संगीतकार विशाल दादलानी यांनीही महेश तिनाईकर यांना श्रद्धांजली वाहताना एक भावनिक पोस्ट शेअर केली. त्यांनी लिहिले, “आज भारताने एक महान व्यक्तिमत्त्व गमावले आहे.” ‘रॉक मशीन’पासून ते आजच्या प्रत्येक रॉक संगीतप्रेमीपर्यंत अनेक जण महेश तिनाईकर यांचे ऋणी असल्याचे त्यांनी नमूद केले. महेश यांनी भारतीय रॉक संगीतासाठी असा मार्ग तयार केला, ज्याची त्या काळात कल्पनाही करणे कठीण होते, असेही विशाल यांनी म्हटले.
महेश तिनाईकर हे प्रेरणादायी आणि दूरदृष्टी असलेले संगीतकार होते. योग्य गोष्टींच्या बाजूने ठामपणे उभे राहणारे व्यक्तिमत्त्व म्हणूनही त्यांनी त्यांचा उल्लेख केला. ‘इंडस क्रीड’सोबत मंचावर सादरीकरण करण्याची आणि सर्वांसमोर महेश यांचे आभार मानण्याची संधी मिळाली, याबद्दल विशाल यांनी स्वतःला भाग्यवान मानले. त्यांच्या निधनाचे दुःख व्यक्त करताना विशाल यांनी, “माझ्या काळजावर जणू काही जोरदार प्रहार झाला आहे,” अशा भावना व्यक्त केल्या.
तसेच उदय बेनेगल, मार्क सेल्विन, झुबिन बालापोरिया, जयेश गांधी, शांतनु हुडलीकर आणि फरहाद वाडिया यांच्यासह महेश यांच्या कुटुंबीयांप्रति त्यांनी संवेदना व्यक्त केल्या. महेश तिनाईकर यांच्या निधनाने भारतीय रॉक संगीतविश्वातील एक महत्त्वाचा अध्याय संपला असला, तरी त्यांच्या संगीताचा वारसा कायम स्मरणात राहील.
.png "Videos"){kind=small}
