( फोटो सौजन्य- सोशल मीडिया)
Kriti Sanon:अभिनेत्री कृती सेनन सध्या तिच्या रक्षाबंधनाच्या एका जाहिरातीमुळे चर्चेत आहे. जाहिरातीतील तिच्या लूकवरून काही नेटकऱ्यांनी टीका करत संस्कृती आणि परंपरांचा दाखला दिला. या ट्रोलिंगला आता कृतीने सडेतोड उत्तर दिलं असून, महिलांच्या कपड्यांवरून त्यांच्या संस्कृतीचा आदर ठरवण्यावरच सवाल उपस्थित केला आहे.
कृतीने रक्षाबंधनाच्या जाहिरातीत आयव्हरी रंगाचा लेहेंगा, डीप-नेक ब्लाउज आणि केप परिधान केला होता. तिचा हा लूक अनेकांना आवडला, तर काही सोशल मीडिया युजर्सनी तो अयोग्य असल्याचं म्हटलं. काहींनी संस्कृती आणि परंपरांचा दाखला देत तिच्यावर टीका केली, तर काहींनी याला ‘वोक अजेंडा’ असंही म्हटलं.
या टीकेला उत्तर देताना कृतीने सोशल मीडियावर आपलं मत मांडलं. “सणांची खरी भावना तुमच्या कपड्यांमध्ये नसते, तर तुम्ही मनापासून जपलेल्या भावना आणि परंपरांमध्ये असते,” असं तिने म्हटलं.
रक्षाबंधन हे केवळ एका विशिष्ट पद्धतीचे कपडे घालण्यापुरतं मर्यादित नसून, हा सण प्रेम आणि संरक्षणाच्या नात्याचा असल्याचंही कृतीने स्पष्ट केलं.
कृतीने सांगितलं की, ती आणि तिची बहीण एकमेकींना राखी बांधतात. एकमेकींच्या संरक्षणाचं वचन देण्यासोबतच उत्तम आरोग्य, आनंद आणि दीर्घायुष्यासाठी प्रार्थना करतात. त्यांचं हे प्रेम त्यांच्या कुत्र्यांपर्यंतही पोहोचतं, कारण तेही त्यांच्या कुटुंबाचा भाग आहेत, असं तिने सांगितलं.
कृतीने आपल्या पोस्टमधून महिलांच्या कपड्यांवरून संस्कृती ठरवण्याच्या मानसिकतेवर थेट प्रश्न उपस्थित केला.
“आपण महिलांना त्यांनी काय घालावे हे सांगणे कधी थांबवणार आहोत?” असा सवाल तिने केला. काळानुसार पारंपरिक फॅशनमध्येही बदल होत गेले आहेत. त्यामुळे एखाद्या महिलेचा संस्कृतीप्रती असलेला आदर केवळ तिच्या कपड्यांवरूनच का मोजला जातो, असा प्रश्न तिने उपस्थित केला.
( फोटो सौजन्य- सोशल मीडिया)
तिने पुढे स्पष्टपणे सांगितलं की, संस्कृती आणि परंपरा महिलेच्या मनात असतात, तिच्या नेकलाइनमध्ये नाहीत.
कृतीच्या या भूमिकेमुळे चर्चेचा केंद्रबिंदू तिच्या कपड्यांवरून बाजूला होत महिलांच्या कपड्यांवरून त्यांच्या संस्कृती आणि चारित्र्याबद्दल मत बनवण्याच्या मानसिकतेकडे वळला आहे. लैंगिक समानतेसाठी UNFPA ची अॅम्बेसेडर असलेल्या कृतीने आपल्या वक्तव्यातून महिलांच्या निवडीचा आदर करण्याचा महत्त्वाचा संदेश दिला आहे.
.png "Videos"){kind=small}
