(फोटो सौजन्य- सोशल मीडिया)
Pratyusha Banerjee Case: टीव्हीवरील लोकप्रिय मालिका ‘बालिका वधू’मध्ये आनंदीची भूमिका साकारून घराघरात पोहोचलेली अभिनेत्री प्रत्युषा बॅनर्जी हिच्या आत्महत्येला १० वर्षे झाली आहेत. २०१६ मध्ये घडलेल्या या प्रकरणात आता महत्त्वाची घडामोड समोर आली आहे. मुंबई उच्च न्यायालयाने अभिनेत्रीचा माजी जोडीदार राहुल राज सिंग याला या प्रकरणातून डिस्चार्ज केले आहे.
प्रत्युषा बॅनर्जी अवघ्या २४ वर्षांची असताना १ एप्रिल २०१६ रोजी गोरेगाव पश्चिम येथील तिच्या भाड्याच्या घरात मृतावस्थेत आढळली होती. ‘बालिका वधू’ मालिकेतील आनंदी या भूमिकेमुळे ती प्रेक्षकांच्या घराघरात पोहोचली होती. तिच्या मृत्यूच्या बातमीने संपूर्ण मनोरंजनसृष्टीला मोठा धक्का बसला होता.
प्रत्युषाच्या पालकांच्या तक्रारीनंतर बांगूर नगर पोलिसांनी राहुल राज सिंगविरोधात आत्महत्येस प्रवृत्त केल्यासह संबंधित कलमांखाली गुन्हा दाखल केला होता. राहुलवर प्रत्युषाचा मानसिक छळ केल्याचा आरोप करण्यात आला होता. मात्र राहुलने हे आरोप नाकारले होते.
२०१६ मध्ये अटकपूर्व जामीन, २०१८ मध्ये आरोपपत्र
राहुल राज सिंगला जुलै २०१६ मध्ये मुंबई उच्च न्यायालयाने अटकपूर्व जामीन मंजूर केला होता. त्यानंतर पोलिसांनी २०१८ मध्ये या प्रकरणात आरोपपत्र दाखल केले. राहुलने प्रकरणातून डिस्चार्ज मिळावा यासाठी दिंडोशी सत्र न्यायालयात अर्ज केला होता. मात्र ऑगस्ट २०२३ मध्ये सत्र न्यायालयाने त्याचा अर्ज फेटाळला. त्यानंतर राहुलने या निर्णयाला मुंबई उच्च न्यायालयात आव्हान दिले.
मुंबई उच्च न्यायालयात राहुल राज सिंगच्या वतीने ज्येष्ठ वकील आबाद पोंडा आणि वकील श्रेयांश मिठारे यांनी बाजू मांडली. त्यांच्या म्हणण्यानुसार, प्रत्युषासोबत झालेल्या शेवटच्या संभाषणात राहुल तिला कोणतेही टोकाचे पाऊल उचलू नये, असे समजावत होता. तसेच या संभाषणातून त्याने तिच्यावर प्रेम व्यक्त केल्याचेही न्यायालयाच्या निदर्शनास आणून देण्यात आले.
वकिलांनी पुढे असा युक्तिवाद केला की, घटनास्थळी कोणतीही आत्महत्या चिठ्ठी सापडली नव्हती आणि राहुलविरोधात आत्महत्येस प्रवृत्त केल्याचा आरोप सिद्ध करण्यासाठी पुरेसे ठोस पुरावे नाहीत. राहुलनेच दरवाजा उघडून प्रत्युषाला रुग्णालयात नेण्याचा प्रयत्न केल्याचाही युक्तिवाद करण्यात आला.
Afratafri Movie: ‘अफरातफरी’मध्ये ग्लॅमरचा तडका अन् मस्तीचा जल्लोष! ‘होऊन जाऊ दे’ गाणं प्रदर्शित
उच्च न्यायालयाचा मोठा निर्णय
३० सप्टेंबर २०२६ रोजी मुंबई उच्च न्यायालयाने राहुल राज सिंगला या प्रकरणातून डिस्चार्ज केले. न्यायमूर्ती शिवकुमार जी. दिगे यांच्या एकल खंडपीठाने राहुलची याचिका मंजूर केली. न्यायालयाने नोंदवले की, उपलब्ध पुराव्यांच्या आधारे राहुलविरोधात आत्महत्येस प्रवृत्त केल्याचा खटला पुढे चालवण्यासाठी पुरेसा आधार दिसत नाही.
यापूर्वी दिंडोशी सत्र न्यायालयाने राहुलचा डिस्चार्ज अर्ज फेटाळताना साक्षीदारांच्या जबानीचा आधार घेतला होता. सत्र न्यायालयाच्या निरीक्षणानुसार, आरोपीच्या कथित छळामुळे प्रत्युषाचे आयुष्य नरक बनले होते आणि त्या छळामुळे तिने आत्महत्या केली, असे प्रथमदर्शनी दिसत होते. उच्च न्यायालयाने मात्र राहुलच्या बाजूने मांडण्यात आलेल्या शेवटच्या संभाषणासह उपलब्ध पुराव्यांचा विचार करून त्याला डिस्चार्ज केले.
अशाप्रकारे, प्रत्युषा बॅनर्जीच्या मृत्यूच्या सुमारे १० वर्षांनंतर या प्रकरणात राहुल राज सिंगला मोठा कायदेशीर दिलासा मिळाला आहे. उच्च न्यायालयाचा सविस्तर आदेश पुढे उपलब्ध होणार असल्याचे वृत्त आहे.
.png "Videos"){kind=small}
