गुरुवार, 13 ऑगस्ट 2026
(फोटो सौजन्य- सोशल मीडिया)
Legacy: भारतातील लोकप्रिय रॅप रिअॅलिटी शो ‘Legacy’ आता हिंदी ZEE5 वर प्रेक्षकांच्या भेटीला येणार आहे. कलामकारचे सह-संस्थापक अंकित खन्ना, KR$NA आणि Raftaar यांनी SVF Entertainmentच्या सहकार्याने या शोची निर्मिती केली आहे. शोने हिंदी ZEE5 ला आपला अधिकृत स्ट्रीमिंग पार्टनर म्हणून घोषित केलं आहे.
या भागीदारीनुसार ‘Legacy’चे नवीन एपिसोड दर मंगळवार आणि शुक्रवारी संध्याकाळी ७ वाजता हिंदी ZEE5 वर एक्सक्लुझिव्हली स्ट्रीम होणार आहेत. यासोबतच शोचे एपिसोड्स कलामकार म्युझिकच्या YouTube चॅनेलवरही उपलब्ध असतील.
विशेष म्हणजे, प्रत्येक एपिसोड कलामकार म्युझिकच्या YouTube चॅनेलवर प्रदर्शित होण्याच्या सुमारे ४० तास आधी हिंदी ZEE5 वर प्रीमियर होणार आहे. त्यामुळे ZEE5च्या सब्सक्रायबर्सना शोचे एपिसोड्स आधी पाहण्याची संधी मिळणार आहे.
याशिवाय, ‘Legacy’चा फिनाले म्हणजेच १७वा एपिसोड केवळ हिंदी ZEE5 वर उपलब्ध असेल.
‘Legacy’चा उद्देश भारतातील हिप-हॉप क्षेत्रातील नव्या पिढीतील कलाकारांचा शोध घेणे, त्यांना मार्गदर्शन करणे आणि त्यांच्या कलागुणांना योग्य व्यासपीठ मिळवून देणे हा आहे.
शोमध्ये केवळ लोकप्रियतेला महत्त्व न देता गीतलेखन, मौलिकता, कथाकथन, कलात्मक प्रगती आणि प्रामाणिकपणा या गोष्टींवर भर दिला जात आहे. देशभरातील उदयोन्मुख रॅपर्सना एकत्र आणून त्यांना आपल्या कलेचा विकास करण्याची संधी या शोच्या माध्यमातून मिळत आहे.
प्रीमियरपासूनच ‘Legacy’ला प्रेक्षकांचा चांगला प्रतिसाद मिळत आहे. कलामकार म्युझिकच्या YouTube चॅनेलवरील शोच्या एपिसोड्सना सातत्याने ८.५ लाख ते १० लाखांहून अधिक व्ह्यूज मिळत असल्याची माहिती देण्यात आली आहे.
हिंदी ZEE5 सोबतची भागीदारी भारतातील स्वतंत्र हिप-हॉप कम्युनिटीसाठी दीर्घकालीन व्यासपीठ उभारण्याच्या शोच्या प्रयत्नांना आणखी बळ देणार आहे.
अंकित खन्ना म्हणाले…
कलामकारचे सह-संस्थापक अंकित खन्ना यांनी या भागीदारीबद्दल सांगितलं की, कलामकारने नेहमीच केवळ हिट गाणी तयार करण्याऐवजी कलाकार घडवण्यावर विश्वास ठेवला आहे. ‘Legacy’ ही त्याच विचारसरणीचं प्रतिबिंब असून, टॅलेंटमध्ये गुंतवणूक करणे, मौलिकतेला प्रोत्साहन देणे आणि दीर्घकाळ परिणाम घडवणाऱ्या संधी निर्माण करणे हा शोचा उद्देश असल्याचं त्यांनी सांगितलं.
KR$NA यांनी भारतात टॅलेंटची कमतरता नसली तरी हिप-हॉपला योग्य पद्धतीने समजून घेणाऱ्या व्यासपीठांची गरज असल्याचं म्हटलं. ZEE5च्या माध्यमातून या कलाकारांचा आणि त्यांच्या प्रवासाचा मोठ्या प्रेक्षकांपर्यंत विस्तार होईल, असा विश्वास त्यांनी व्यक्त केला.
तर Raftaar यांनी हिप-हॉप हा नेहमीच आपल्या मनातील खरं सांगणाऱ्या लोकांना आवाज देणारा प्रकार असल्याचं सांगितलं. ‘Legacy’मध्ये टॅलेंटचं मूल्यमापन आकडे किंवा लोकप्रियतेवर नव्हे, तर कौशल्य, जिद्द आणि मौलिकतेवर केलं जात असल्याचं त्यांनी स्पष्ट केलं.
आता दर मंगळवार आणि शुक्रवार संध्याकाळी ७ वाजता हिंदी ZEE5 वर ‘Legacy’ पाहता येणार असून, या रॅप रिअॅलिटी शोचा फिनाले विशेष आकर्षण ठरणार आहे.
