मंगळवार, 10 नोव्हेंबर 2026
अध्यक्षपदासाठी महायुतीचा मास्टर प्लॅन; चार पक्षांना प्रत्येकी एक वर्ष अध्यक्षपद (Photo - X)
Gokul Election : कोल्हापूरच्या राजकारणात महत्त्वाचे स्थान असलेल्या गोकुळ दूध संघाच्या निवडणुकीनंतर आता अध्यक्षपदाच्या सत्तावाटपाची चर्चा रंगली आहे. या निवडणुकीत महायुतीने बाजी मारत संविचारी आघाडीला धक्का दिला. महायुतीचे उमेदवार आणि माजी आमदार राजेश पाटील यांनी संविचारी आघाडीचे उमेदवार शशिकांत चुयेकर यांचा पराभव केला. राजेश पाटील यांना २९ पैकी १६ मते मिळाली, तर चुयेकर यांना १३ मतांवर समाधान मानावे लागले. अवघ्या तीन मतांच्या फरकाने मिळालेल्या या विजयामुळे गोकुळमधील सत्तासंघर्षाला नवे वळण मिळाले आहे.
दरम्यान, आता गोकुळच्या अध्यक्षपदासाठी महायुतीने सत्तावाटपाचा फॉर्म्युला निश्चित केल्याची माहिती समोर आली आहे.
सूत्रांनुसार, महायुतीतील राष्ट्रवादी काँग्रेस, शिवसेना, भाजप आणि जनसुराज्य पक्षाला प्रत्येकी एक वर्ष अध्यक्षपदाची संधी दिली जाणार आहे. या फॉर्म्युल्यामुळे चारही पक्षांना गोकुळच्या सत्तेत सहभागी होण्याची संधी मिळणार असल्याचे सांगितले जात आहे.
महायुतीतील मित्रपक्षांमध्ये अध्यक्षपदावरून संभाव्य मतभेद निर्माण होऊ नयेत, यासाठी हा फॉर्म्युला आखण्यात आल्याची चर्चा आहे. मात्र, अध्यक्षपदाच्या पाचव्या वर्षी कोणत्या पक्षाचा अध्यक्ष असेल, याबाबत अद्याप स्पष्टता नाही. शेवटच्या वर्षाचा निर्णय त्यावेळच्या राजकीय परिस्थितीनुसार घेतला जाणार असल्याची माहिती आहे. याबाबतचा अंतिम निर्णय मुख्यमंत्री यांच्या समोर होणार असल्याचे महायुतीतील वरिष्ठ सूत्रांनी सांगितल्याचे वृत्त आहे.
दुसरीकडे, गोकुळ दूध संघाची निवडणूक प्रक्रिया वादाच्या भोवऱ्यात सापडली होती. काँग्रेस आणि महाविकास आघाडीच्या नेत्यांनी सरकारवर गंभीर आरोप केले होते. मतदानापूर्वी हा वाद मुंबई उच्च न्यायालयाच्या औरंगाबाद खंडपीठात पोहोचला होता. मात्र, न्यायालयाने निवडणूक प्रक्रियेला स्थगिती देण्यास नकार देत नियोजित वेळापत्रकानुसार निवडणूक घेण्यास परवानगी दिली. तसेच चार नामनिर्देशित सदस्यांचे मतदानाचे अधिकारही कायम ठेवले.
अध्यादेशाच्या वैधतेला आव्हान देणाऱ्या याचिकेवरील पुढील सुनावणी २५ नोव्हेंबर रोजी होणार आहे. त्यामुळे निवडणुकीतील विजयानंतरही गोकुळचा राजकीय आणि कायदेशीर वाद चर्चेत राहणार आहे. आता महायुतीचा सत्तावाटपाचा फॉर्म्युला प्रत्यक्षात कसा राबवला जातो आणि पाचव्या वर्षाच्या अध्यक्षपदाचा निर्णय कोणाच्या बाजूने लागतो, याकडे कोल्हापूरचे लक्ष लागले आहे.
Ans: महायुतीचे उमेदवार राजेश पाटील यांनी संविचारी आघाडीचे उमेदवार शशिकांत चुयेकर यांचा १६ विरुद्ध १३ मतांनी पराभव केला.
Ans: समोर आलेल्या माहितीनुसार, राष्ट्रवादी काँग्रेस, शिवसेना, भाजप आणि जनसुराज्य पक्षाला प्रत्येकी एक वर्ष अध्यक्षपदाची संधी दिली जाणार आहे.
Ans: पाचव्या वर्षी कोणत्या पक्षाचा अध्यक्ष असेल, याचा निर्णय त्यावेळच्या राजकीय परिस्थितीनुसार मुख्यमंत्री यांच्या समोर होणार असल्याची माहिती सूत्रांनी दिली आहे.
