(फोटो सौजन्य- सोशल मीडिया)
Bandhu Marathi Movie:मराठी मनोरंजन विश्वात कौटुंबिक नात्यांवर आधारित अनेक चित्रपट प्रेक्षकांच्या भेटीला आले आहेत. आता याच नात्यांमधील प्रेम, भांडणं, रुसवे-फुगवे आणि त्यागाची हृदयस्पर्शी गोष्ट घेऊन ‘बंधू’ हा आगामी मराठी चित्रपट प्रेक्षकांच्या भेटीला येत आहे. नुकताच या चित्रपटाचा दमदार ट्रेलर प्रदर्शित झाला असून, त्यातून दोन भावांमधील नात्याचे विविध भावनिक पैलू उलगडताना दिसत आहेत. उपेंद्र लिमये आणि जितेंद्र जोशी यांच्या प्रभावी अभिनयाची झलक या ट्रेलरमध्ये पाहायला मिळते. हा चित्रपट येत्या २० नोव्हेंबरला चित्रपटगृहांत प्रदर्शित होणार आहे.
ट्रेलर प्रदर्शित झाल्यानंतर अवघ्या काही तासांतच त्याला सोशल मीडियावर चांगला प्रतिसाद मिळाला असून, तो ट्रेंडिंगमध्येही आला आहे. कधी एकमेकांशी भांडणारे, कधी रुसणारे, तर कधी स्वतःपेक्षाही दुसऱ्याच्या आनंदाचा विचार करणारे दोन भाऊ या चित्रपटातून पाहायला मिळणार आहेत. कितीही मतभेद झाले किंवा दुरावा निर्माण झाला, तरी मनाच्या एका कोपऱ्यात एकमेकांसाठी असलेली जागा कायम असते, याची जाणीव करून देणारी ही कथा आहे.
रजत बेदी प्रस्तुत, जे एस् डी स्टुडिओ आणि ट्राईफ्लिक्स एंटरटेनमेंट यांच्या सहकार्याने हा चित्रपट साकारण्यात आला आहे. प्रणव देसाई, जुही देसाई आणि कुलदीप सुनील ओझा यांनी चित्रपटाची निर्मिती केली आहे. चित्रपटाचे लेखन, संवाद आणि दिग्दर्शन नितीन सिंधूविजय सुपेकर यांनी केले आहे.
‘आटपाडी नाईट्स’ आणि ‘सरला एक कोटी’ या चित्रपटांनंतर नितीन सुपेकर पुन्हा एकदा मानवी नात्यांच्या भावविश्वाचा वेध घेणारी कथा घेऊन येत आहेत. ‘बंधू’मध्ये उपेंद्र लिमये आणि जितेंद्र जोशी दोन भावांच्या प्रमुख भूमिका साकारत आहेत. त्यांच्या सहचारिणींच्या भूमिकेत मिताली जगताप आणि मृण्मयी देशपांडे दिसणार आहेत.
यांच्यासह रेणुका दफ्तरदार, स्मिता तांबे, श्रीकांत यादव, विठ्ठल काळे, यशपाल सरणात, ज्ञानरत्न अहिवळे, चैतन्य सोलणकर, श्रीपाद पानसे, बालकलाकार शौर्य पाटील, देवा गाडेकर, वर्षा अजित, प्रशांत जाधव, अनिल कांबळे आणि प्रणाली भालेराव हे कलाकारही चित्रपटात महत्त्वाच्या भूमिकांत दिसणार आहेत.
रजत बेदी म्हणाले, ‘बंधू’ची कथा मनाला स्पर्श करणारी
चित्रपटाचे प्रस्तुतकर्ता रजत बेदी यांनी या चित्रपटाबद्दल आपल्या भावना व्यक्त केल्या. ते म्हणाले, “चांगल्या कथा भाषेच्या सीमा ओलांडून प्रत्येकाच्या मनापर्यंत पोहोचतात. ‘बंधू’ची कथा अशीच मनाला स्पर्श करणारी आहे. या चित्रपटाच्या माध्यमातून मराठी सिनेमाशी प्रस्तुतकर्ता म्हणून जोडले जाणं माझ्यासाठी एक खास अनुभव आहे. उपेंद्र लिमये, जितेंद्र जोशी आणि इतर कलाकारांनी आपल्या अभिनयातून या नात्याचं भावविश्व जिवंत केलं आहे. प्रेक्षकांनीही या चित्रपटाला आपलंसं करावं, हीच अपेक्षा आहे.”
‘बंधू’च्या ट्रेलर लाँच सोहळ्याला केंद्रीय राज्यमंत्री आणि खासदार रामदास आठवले यांनी विशेष उपस्थिती दर्शवली. यावेळी त्यांनी ट्रेलरचे कौतुक करत संपूर्ण टीमला चित्रपटाच्या यशासाठी शुभेच्छा दिल्या.
चित्रपटातील गीतांना गुरू ठाकूर आणि वैभव देशमुख यांनी शब्दबद्ध केले असून, विजय नारायण गवंडे यांनी संगीत दिले आहे. लोकप्रिय गायक अजय-अतुल, अमिता घुगरी आणि शमिका भिडे यांच्या आवाजाची साथ या गीतांना लाभली आहे. चित्रपटातील गाण्यांचे संगीत हक्क झी म्युझिककडे आहेत.
नृत्यदिग्दर्शन अविनाश नलावडे आणि नील राठोड यांनी केले आहे. वेशभूषेची जबाबदारी कीर्ती जंगम यांनी, तर रंगभूषा समीर रमेश कदम यांनी सांभाळली आहे. हर्षद आत्माराम गायकवाड यांनी छायांकन केले असून, अतिरिक्त छायांकन योगेश कोळी यांचे आहे. वैभव दाभाडे आणि वासिम मुल्ला यांनी संकलन केले आहे, तर साहसदृश्ये बब्बू खन्ना यांनी साकारली आहेत.
दोन भावांमधील प्रेम, जिव्हाळा, मतभेद आणि त्याग यांची गोष्ट सांगणारा ‘बंधू’ हा चित्रपट २० नोव्हेंबरला चित्रपटगृहांत प्रदर्शित होणार आहे. त्यामुळे या भावनिक कौटुंबिक चित्रपटाबद्दल प्रेक्षकांमध्ये उत्सुकता निर्माण झाली आहे.
.png "Videos"){kind=small}
