(फोटो सौजन्य- सोशल मीडिया)
Tejas Deoskar: मराठी चित्रपटसृष्टीत वेगवेगळ्या विषयांवर नवनवीन प्रयोग होत असताना आता प्रेक्षकांसाठी एक नवा हॉरर फँटसी चित्रपट येणार आहे. ‘बकेट लिस्ट’ आणि ‘देवमाणूस’ या चित्रपटांतून आपल्या दिग्दर्शनाची वेगळी छाप उमटवणारे दिग्दर्शक तेजस प्रभा विजय देऊस्कर एका अनोख्या कथाविश्वासह प्रेक्षकांच्या भेटीला येण्यास सज्ज झाले आहेत. त्यांच्या आगामी हॉरर फँटसी चित्रपटाचा मुहूर्त नुकताच संपन्न झाला आहे. या चित्रपटात अभिनेत्री सोनाली कुलकर्णी, सुयोग गोऱ्हे आणि रसिका सुनील यांच्या प्रमुख भूमिका असणार आहेत.
हॉरर आणि फँटसी या दोन वेगळ्या जॉनरची सांगड या चित्रपटात घालण्यात आली आहे. त्यामुळे या चित्रपटातून प्रेक्षकांना नेमका कोणता अनुभव मिळणार, याबाबत उत्सुकता निर्माण झाली आहे. सध्या चित्रपटाच्या कथानकाबाबत फारशी माहिती समोर आलेली नाही. तसेच चित्रपटाचं नावही अद्याप जाहीर करण्यात आलेलं नाही. लवकरच याबाबत अधिकृत घोषणा होणार आहे.
या चित्रपटाचं लेखन आणि दिग्दर्शन तेजस प्रभा विजय देऊस्कर यांनी केलं आहे. नितीन वैद्य प्रॉडक्शन्स आणि रियान राय मोशन पिक्चर्स (यूके) यांच्या संयुक्त विद्यमाने या चित्रपटाची निर्मिती होत आहे. नितीन वैद्य आणि जितेंद्र राय हे चित्रपटाचे निर्माते आहेत.
चित्रपटाबद्दल बोलताना दिग्दर्शक तेजस प्रभा विजय देऊस्कर म्हणाले, “प्रत्येक चित्रपटातून प्रेक्षकांना काहीतरी वेगळं अनुभवायला मिळावं, हा माझा नेहमीच प्रयत्न असतो. या चित्रपटाची संकल्पना आणि त्यातून आकाराला येणारं कथाविश्व मला विशेष भावलं. हॉरर फँटसी हा जॉनर आपल्याला वास्तवाच्या पलीकडे जाऊन अनेक शक्यता तपासण्याची संधी देतो. त्यामुळे या चित्रपटातून केवळ भयाचा अनुभव न देता प्रेक्षकांना एका वेगळ्याच विश्वात घेऊन जाण्याचा आमचा प्रयत्न आहे. या कथेतली वैशिष्ट्यं प्रेक्षकांसमोर उलगडण्यासाठी मीही उत्सुक आहे.”
निर्माते नितीन प्रकाश वैद्य यांनीही या चित्रपटाबद्दल उत्सुकता व्यक्त केली. ते म्हणाले, “मराठी चित्रपटसृष्टीत आशयपूर्ण कथांसोबतच वेगळ्या जॉनरवरही प्रयोग होत आहेत आणि प्रेक्षकांकडून त्यांना सकारात्मक प्रतिसाद मिळत आहे. या चित्रपटाकडे पाहण्याचा तेजस देऊस्कर यांचा अनोखा दृष्टिकोन आम्हाला खूप भावला. हॉरर फँटसीसारख्या वेगळ्या जॉनरमधील हा चित्रपट प्रेक्षकांना नवा अनुभव देईल, असा आम्हाला विश्वास आहे.”
निर्माते जितेंद्र राय म्हणाले, “या चित्रपटाच्या माध्यमातून एक वेगळं कथाविश्व प्रेक्षकांसमोर आणण्याची संधी मिळत आहे, याचा आम्हाला आनंद आहे. सोनाली कुलकर्णी, सुयोग गोऱ्हे आणि रसिका सुनील यांसारख्या प्रतिभावान कलाकारांचा सहभाग या प्रकल्पासाठी महत्त्वाचा आहे. उत्तम कलाकार आणि तंत्रज्ञांच्या साथीने साकारत असलेला हा चित्रपट प्रेक्षकांसाठी नक्कीच काहीतरी वेगळं घेऊन येईल, अशी आशा आहे.”
मुहूर्त सोहळ्याने या नव्या चित्रपटाच्या प्रवासाला सुरुवात झाली आहे. चित्रपटाचं नाव, कथानक आणि इतर कलाकारांविषयीची माहिती लवकरच जाहीर होणार आहे. त्यामुळे तेजस देऊस्कर यांच्या या आगामी हॉरर फँटसी चित्रपटाबद्दल प्रेक्षकांची उत्सुकता वाढली आहे.
.png "Videos"){kind=small}
