Dashmi Marathi Movie: ‘दशमी’ उलगडणार बाप-लेकीच्या नात्याचा हळवा बंध; मकरंद अनासपुरे-गौरी इंगवले साकारणार खास भूमिका

Dashmi Marathi Movie: मकरंद अनासपुरे आणि गौरी इंगवले ‘दशमी’ चित्रपटात बाप-लेकीची भूमिका साकारणार आहेत. योगेश भोसले दिग्दर्शित हा चित्रपट ऑक्टोबरमध्ये प्रदर्शित होणार.

Dashmi Marathi Movie: बाप-लेकीचं नातं हे प्रेम, माया आणि भावनांनी जोडलेलं खास नातं असतं. मुलीच्या प्रत्येक स्वप्नामागे खंबीरपणे उभा राहणारा बाबा आणि वडिलांच्या प्रेमात आपलं विश्व पाहणारी लेक यांच्यातील हळवा बंध आता ‘दशमी’ या आगामी मराठी चित्रपटातून रुपेरी पडद्यावर पाहायला मिळणार आहे.

केएनके बॉक्स प्रस्तुत ‘दशमी’मध्ये अभिनेता मकरंद अनासपुरे आणि अभिनेत्री गौरी इंगवले बाप-लेकीची भूमिका साकारत आहेत. प्रभाकर आणि लक्ष्मी या व्यक्तिरेखांमधून त्यांच्या नात्यातील प्रेम, त्याग आणि भावनिक जवळीक प्रेक्षकांसमोर उलगडणार आहे. हा चित्रपट ऑक्टोबरमध्ये प्रेक्षकांच्या भेटीला येणार असून, दिग्दर्शनाची धुरा योगेश पांडुरंग भोसले यांनी सांभाळली आहे.

मुलीच्या स्वप्नासाठी आयुष्यभर झटणारा बाप

‘दशमी’मध्ये प्रभाकर स्वतःची स्वप्नं बाजूला ठेवून मुलगी लक्ष्मीने डॉक्टर व्हावं, यासाठी आयुष्यभर कष्ट करतो. आपल्या मुलीच्या भविष्यासाठी तो अनेक अडचणींचा सामना करतो.

दुसरीकडे लक्ष्मीही वडिलांच्या कष्टांची जाणीव ठेवणारी संवेदनशील मेडिकल स्टुडंट आहे. वडिलांचं डॉक्टर होण्याचं स्वप्न ती स्वतःचं मानून ते पूर्ण करण्यासाठी प्रयत्न करते.

मकरंद अनासपुरे साकारणार प्रभाकरची भूमिका

प्रभाकरच्या भूमिकेबद्दल बोलताना मकरंद अनासपुरे म्हणतात, “‘प्रभाकर’ या भूमिकेतून एका वडिलांचं मुलीवरील प्रेम आणि तिच्यासाठीची धडपड अनुभवता आली. मुलीसमोर खंबीर राहूनही आतून तुटणारा प्रभाकर साकारताना हा प्रवास मनाला भिडणारा होता.”

त्यांच्या या भूमिकेतून मुलीच्या भविष्यासाठी झटणाऱ्या वडिलांची भावनिक बाजू पाहायला मिळणार आहे.

गौरी इंगवले साकारणार लक्ष्मी

गौरी इंगवलेने लक्ष्मीची भूमिका साकारली आहे. आपल्या व्यक्तिरेखेबद्दल ती सांगते की, लक्ष्मी आणि तिच्या वडिलांचं नातं साधं असलं तरी मनाला भिडणारं आहे. लक्ष्मीच्या प्रत्येक स्वप्नामागे तिच्या वडिलांचे कष्ट आहेत, याची तिला जाणीव आहे.

आयुष्यात आलेल्या संकटानंतर लक्ष्मीचं विश्व बदलतं. या बदलासोबतच वडिलांबद्दलचं प्रेम आणि त्यांच्याशी असलेली भावनिक जवळीक साकारताना हा अनुभव भावनिक असल्याचं गौरीने सांगितलं.

Hruta Durgule Aali Mothi Shahani Teaser: चिमुकलीची एक इच्छा आणि बदलणारं संपूर्ण जग! ‘आली मोठी शहाणी’चा ट्रेलर प्रदर्शित

प्रत्येक वडिलांच्या भावविश्वाला स्पर्श करणारी कथा

‘दशमी’मधील प्रभाकर आणि लक्ष्मीचा प्रवास केवळ एका बाप-लेकीची गोष्ट नसून, मुलीच्या स्वप्नांसाठी स्वतःचं आयुष्य पणाला लावणाऱ्या प्रत्येक वडिलांच्या भावविश्वाला स्पर्श करणारी कथा असल्याचं चित्रपटाच्या कथानकावरून दिसतं.

मकरंद अनासपुरे आणि गौरी इंगवले यांच्या अभिनयातून हे बाप-लेकीचं नातं पडद्यावर किती जिवंत होतं, याची उत्सुकता आता वाढली आहे. ‘दशमी’ हा मराठी चित्रपट ऑक्टोबरमध्ये प्रेक्षकांच्या भेटीला येणार आहे.

Zee Marathi artists Ganeshotsav: गणरायाच्या स्वागताची तयारी जोरात! झी मराठी कलाकारांचा बाप्पासाठी खास प्लॅन