Laxmikant Berde: लक्ष्याच्या निधनामागे कोणत्या दोन सवयी ठरल्या कारणीभूत? वयाच्या अवघ्या ५०व्या वर्षी घेतला जगाचा निरोप

Laxmikant Berde: मराठी आणि हिंदी सिनेसृष्टीतील लोकप्रिय अभिनेते लक्ष्मीकांत बेर्डे यांचं वयाच्या ५०व्या वर्षी निधन झालं. किडनीचा आजार, दारू आणि सिगारेटच्या सवयी तसेच त्यांच्या संघर्षमय कारकिर्दीविषयी जाणून घ्या.

Laxmikant Berde: मराठी आणि हिंदी सिनेसृष्टीत आपल्या विनोदी अभिनयाने प्रेक्षकांच्या मनावर अधिराज्य गाजवणारे अभिनेते म्हणजे लक्ष्मीकांत बेर्डे. ‘लक्ष्या’ या नावाने घराघरांत लोकप्रिय झालेल्या या अभिनेत्याने आपल्या अभिनयाने अनेक दशकं प्रेक्षकांचं मनोरंजन केलं. हिंदी चित्रपटसृष्टीतही त्यांनी अल्पावधीत स्वतःची वेगळी ओळख निर्माण केली होती. इतकंच नाही, तर एका वर्षात त्यांनी तब्बल ११ चित्रपट साइन केले होते. मात्र, यशाच्या शिखरावर असतानाच वयाच्या अवघ्या ५०व्या वर्षी त्यांनी जगाचा निरोप घेतला. त्यांच्या अचानक जाण्याने संपूर्ण मनोरंजनविश्वाला मोठा धक्का बसला होता.

अत्यंत गरिबीतून उभं केलं स्वतःचं विश्व

लक्ष्मीकांत बेर्डे यांनी अत्यंत गरिबीतून आपल्या आयुष्याची सुरुवात केली होती. शिक्षण घेत असतानाच त्यांना अभिनयाची आवड निर्माण झाली. अभिनयाच्या वेडापायी त्यांनी साहित्य संघात नोकरी स्वीकारली. तिथे पडदे लावण्यापासून मिळेल ते काम ते करायचे. याच काळात गणेशोत्सवातील नाटकांमध्येही ते सहभागी व्हायचे. मेहनत आणि अभिनयाच्या जोरावर त्यांनी मराठी चित्रपटसृष्टीत स्वतःचं स्थान निर्माण केलं.

‘मैने प्यार किया’मधून हिंदीत मिळाली ओळख

मराठी चित्रपटांमध्ये काम केल्यानंतर लक्ष्मीकांत बेर्डे यांना हिंदी चित्रपटसृष्टीत मोठी संधी मिळाली. सूरज बडजात्या यांच्या ‘मैने प्यार किया’ या चित्रपटात त्यांनी मनोहरची भूमिका साकारली होती. या चित्रपटात सलमान खान आणि भाग्यश्री मुख्य भूमिकेत होते. लक्ष्मीकांत यांची भूमिका सहाय्यक स्वरूपाची असली, तरी ती प्रेक्षकांच्या चांगलीच लक्षात राहिली. त्यानंतर त्यांनी अनेक हिंदी चित्रपटांमध्ये काम करत आपली लोकप्रियता वाढवली.

दोन विवाह; प्रिया बेर्डे यांच्यासोबतही केलं काम

लक्ष्मीकांत बेर्डे यांनी दोन विवाह केले होते. त्यांच्या पहिल्या पत्नीचं १९९६ मध्ये निधन झालं. त्यानंतर १९९८ मध्ये त्यांनी अभिनेत्री प्रिया अर्जुन यांच्याशी विवाह केला. लक्ष्मीकांत आणि प्रिया बेर्डे यांनी ‘हम आपके हैं कौन’ या चित्रपटातही एकत्र काम केलं होतं.

Ladaku Movie Release Date : Kartik Aaryan आणि Kabir Khan ची जोडी पुन्हा एकदा सज्ज! ‘लडाकू’ चित्रपट 18 जून 2027 रोजी होणार रिलीज

दारू आणि सिगारेटच्या सवयींचा प्रकृतीवर परिणाम?

लक्ष्मीकांत बेर्डे यांना किडनीशी संबंधित आजार होता. त्यांना दारू आणि सिगारेटचं व्यसन असल्याचं सांगितलं जातं. तणाव दूर करण्यासाठी ते दारूचं सेवन करत असल्याचाही उल्लेख केला जातो. या सवयींचा त्यांच्या प्रकृतीवर परिणाम झाल्याचं म्हटलं जातं. त्यांच्या दोन्ही किडन्या निकामी झाल्यानंतर त्यांच्यावर बराच काळ उपचार सुरू होते. मात्र, उपचारांना अपेक्षित यश मिळालं नाही.

अखेर १६ डिसेंबर २००४ रोजी किडनीच्या आजारामुळे लक्ष्मीकांत बेर्डे यांचं निधन झालं. वयाच्या अवघ्या ५०व्या वर्षी त्यांची जीवनयात्रा संपली. आजही त्यांचे चित्रपट, त्यांचा सहजसुंदर अभिनय आणि विनोदाची अनोखी शैली प्रेक्षकांच्या मनात घर करून आहे. त्यांच्या अकाली निधनाने मराठी मनोरंजनविश्वाची कधीही भरून न निघणारी हानी झाली.

Aai Tuljabhavani: आसुरी शक्तींच्या संहारासाठी तुळजाभवानीचा नवा अवतार! ‘आई राजा उदो उदो’च्या गजरात उर्वीचे मालिकेत पदार्पण