(फोटो सौजन्य- सोशल मिडिया)
Manjar Marathi Movie: मराठी सिनेसृष्टीत आणखी एका भन्नाट कॉमेडी चित्रपटाची भर पडणार आहे. ‘मांजर’ या आगामी मराठी चित्रपटाचं पोस्टर नुकतंच प्रेक्षकांच्या भेटीला आलं असून, पोस्टरने चित्रपटाबद्दलचं कुतूहल चांगलंच वाढवलं आहे. तीन मित्र, घरभर पसरलेला पसारा आणि या सगळ्यामध्ये ‘मांजर’चा नेमका काय संबंध, असा प्रश्न पोस्टर पाहिल्यानंतर पडतो.
घरातील अस्ताव्यस्त पसारा, बिनधास्त मित्रांची गँग आणि त्यांचं बेफिकीर जगणं पोस्टरमध्ये पाहायला मिळतं. कपडे, मोबाईल, लॅपटॉप, इअरफोन्स, बॅग्ज आणि रोजच्या वापरातील वस्तूंमध्ये हे मित्र अक्षरशः निवांत लोळताना दिसत आहेत. मात्र, या सगळ्या गोंधळामागचं नेमकं कारण काय, याचा उलगडा पोस्टरमध्ये केलेला नाही. त्यामुळे चित्रपटाची उत्सुकता आणखी वाढली आहे.
पोस्टरमधून ‘मांजर’ ही केवळ तीन मित्रांची गोष्ट नसून त्यांच्या आयुष्यात घडणाऱ्या मजेशीर आणि गोंधळात टाकणाऱ्या घटनांची धमाल कॉमेडी असल्याची झलक मिळते. या तीन मित्रांच्या आयुष्यात ‘मांजर’ आधीपासूनच एक भाग असल्याचं दिग्दर्शक सुशील महादेव यांनी सांगितलं आहे. मात्र, त्याच्याभोवती घडणाऱ्या घटनांमुळे त्यांच्या निवांत आयुष्यात मजेशीर परिस्थिती निर्माण होते.
दिग्दर्शक सुशील महादेव म्हणतात, “‘मांजर’मध्ये तीन मित्रांचं मोकळंढाकळं विश्व आणि त्यातून निर्माण होणाऱ्या भन्नाट परिस्थिती पाहायला मिळणार आहेत. मांजर हा त्यांच्या जगाचा आधीपासूनच एक भाग आहे; मात्र त्याच्याभोवती घडणाऱ्या घटनांमुळे त्यांच्या आयुष्यात मजेशीर परिस्थिती निर्माण होते.”
पात्रांची केमिस्ट्री, कॉमेडी आणि या गोंधळामागचं कारण प्रेक्षकांना नक्कीच एंटरटेन करेल, असा विश्वासही त्यांनी व्यक्त केला आहे. मात्र, मांजराचं कथेत नेमकं स्थान काय आहे, हे सध्या गुलदस्त्यात ठेवण्यात आलं आहे.
एचथ्रीओ मोशन पिक्चर्स आणि जस्ट राईट फिल्म्स निर्मित या चित्रपटाचं दिग्दर्शन सुशील महादेव यांनी केलं आहे. सिद्धार्थ मेनन, ओंकार भोजने, तेजस राऊत आणि भाग्यश्री लिमये यांच्या प्रमुख भूमिका आहेत. पोस्टरमध्ये या कलाकारांची धमाल केमिस्ट्री पाहायला मिळते.
याशिवाय सयाजी शिंदे, अंशुमन विचारे, वैष्णवी अंधाडे आणि अश्विनी काळसेकर यांच्याही महत्त्वाच्या भूमिका आहेत.
हर्ष, अविनाश शर्मा, हरि राजपूत, बंटी नागी आणि जसबीर नागी यांनी या चित्रपटाची निर्मिती केली आहे. चित्रपटाच्या वितरणाची जबाबदारी एए फिल्म्सने सांभाळली आहे.
तीन मित्रांच्या या भन्नाट गोंधळामागचं रहस्य आणि ‘मांजर’चा कथेशी नेमका संबंध काय, हे १८ सप्टेंबर २०२६ रोजी चित्रपटगृहात समोर येणार आहे. त्यामुळे या हटके कॉमेडीची प्रेक्षकांमध्ये आतापासूनच उत्सुकता निर्माण झाली आहे.
.png "Videos"){kind=small}
