( फोटो सौजन्य- सोशल मिडिया)
Smita Tambe Movie: मराठी सिनेसृष्टीत वेगवेगळ्या विषयांवर आधारित चित्रपट प्रेक्षकांच्या भेटीला येत असतात. आता ‘धडपड’ या आगामी मराठी चित्रपटातून ग्रामीण जीवन, शेतकरी कुटुंबाचा संघर्ष, नात्यांमधील गुंतागुंत आणि स्वप्नांसाठीची जिद्द रुपेरी पडद्यावर उलगडणार आहे. या चित्रपटाच्या चित्रीकरणाला नुकतीच आटपाडी तालुक्यातील गोमेवाडी येथे सुरुवात झाली आहे. स्त्रीप्रधान विषय असलेल्या या चित्रपटात अभिनेत्री स्मिता तांबे मध्यवर्ती भूमिकेत दिसणार आहे.
बोधी सिनेमा प्रस्तुत आणि अश्विनी समाधान ऐवळे निर्मित ‘धडपड’ या चित्रपटाची कथा बालाजी वाघमोडे यांच्या कथेवर आधारित आहे. या चित्रपटाच्या निर्मितीसाठी अनुभवी तंत्रज्ञांची टीम कार्यरत आहे. काही महिन्यांपूर्वी प्रदर्शित झालेल्या ‘फुला’ या चित्रपटाचे दिग्दर्शक अभिषेक जावीर ‘धडपड’चे दिग्दर्शन करत आहेत.
चित्रपटासाठी क्रिएटिव्ह डायरेक्टर म्हणून अनुप जगदाळे, कॅमेरामन वीरधवल पाटील, कला दिग्दर्शक अतुल लोखंडे, वेशभूषा दीपाली देशमुख, नेपथ्य स्वाती थोरात, कार्यकारी निर्माता कल्पेश जगताप आणि संगीत दिग्दर्शक समाधान ऐवळे काम पाहत आहेत.
‘धडपड’मध्ये स्मिता तांबे, किशोर चौगुले, कुशल बद्रिके, पार्थ भालेराव, मोनालिसा बागल, अश्विनी कासार, प्रभाकर मोरे आणि रोहित चव्हाण हे कलाकार प्रमुख भूमिकांमध्ये झळकणार आहेत.
‘धडपड’चे कथानक एका अल्पभूधारक शेतकरी कुटुंबाभोवती फिरते. कर्त्या पुरुषाच्या चुकीच्या निर्णयांमुळे आणि कर्मदरिद्रीपणामुळे कुटुंबाच्या स्वप्नांची होणारी राख, त्यानंतर उभ्या राहणाऱ्या अडचणी आणि या संकटांमध्येही संसाराचा गाडा पुढे नेण्यासाठी धडपडणारी स्त्री, यांचे भावनिक आणि वास्तववादी चित्रण चित्रपटात करण्यात आले आहे.
कुटुंब आणि आपल्या रानासाठी अहोरात्र मेहनत करणाऱ्या स्त्रीची संघर्षगाथा ‘धडपड’मधून मांडण्यात येणार आहे. त्यासोबतच गावातील राजकारण, महिला नेतृत्व, राजकीय कुरघोड्या आणि त्याचा सामान्य माणसावर होणारा परिणाम यावरही चित्रपट भाष्य करणार आहे.
ग्रामीण मातीत रुजलेली कथा, शेतकरी कुटुंबाचा संघर्ष, नात्यांची गुंतागुंत, राजकारणाचे वास्तव आणि स्वप्नांसाठीची जिद्द या सगळ्यांचा संगम ‘धडपड’मध्ये पाहायला मिळणार आहे. त्यामुळे हा चित्रपट प्रेक्षकांसाठी वेगळा अनुभव ठरेल, असा विश्वास दिग्दर्शक अभिषेक जावीर यांनी व्यक्त केला आहे.
.png "Videos"){kind=small}
