(फोटो सौजन्य- सोशल मिडिया)
Mrutyuchakra Upcoming Movie: प्रत्येक व्यक्तिरेखा कलाकाराला नव्या रूपात प्रेक्षकांसमोर येण्याची संधी देत असते. अभिनेते शशांक शेंडे यांनी आजवर विविधांगी भूमिका साकारत आपल्या अभिनयाची छाप पाडली आहे. आता ते आणखी एका आव्हानात्मक भूमिकेतून प्रेक्षकांच्या भेटीला येणार आहेत. ‘मृत्यूचक्र’ या आगामी मराठी थ्रिलर चित्रपटातील शशांक शेंडे यांचा लूक नुकताच रिव्हील करण्यात आला असून, त्यांच्या व्यक्तिरेखेने प्रेक्षकांची उत्सुकता वाढवली आहे.
श्री महादेव फिल्म प्रोडक्शन प्रस्तुत आणि अध्यांश मोशन पिक्चर प्रोडक्शन्स निर्मित ‘मृत्यूचक्र’ या चित्रपटाची निर्मिती प्रणाली उन्मेश वाघमोडे यांनी केली आहे. विलास वाघमोडे आणि अनुप्रिता कडु-गंगावणे यांनी या चित्रपटाचे दिग्दर्शन केले आहे.
या चित्रपटात शशांक शेंडे ‘जना काका’ ही व्यक्तिरेखा साकारत आहेत. गावाकडच्या वातावरणाशी घट्ट जोडलेले, मनमोकळे, आपुलकीचे आणि मिश्कील स्वभावाचे जना काका सुरुवातीला प्रेक्षकांना अगदी ओळखीचे आणि आपलेसे वाटतात. मात्र, ‘मृत्यूचक्र’मध्ये प्रत्येक गोष्ट जशी दिसते तशी नसल्याचे चित्रपटाची कथा सूचित करते.
जना काकांच्या सहज बोलण्यात, मिश्कील वागण्यात आणि परिस्थितीकडे पाहण्याच्या त्यांच्या नजरेत काहीतरी दडलेले आहे. त्यांच्या आजूबाजूला घडणाऱ्या घटना जसजशा गूढ होत जातात, तसतसा त्यांच्या खऱ्या व्यक्तिमत्त्वाविषयीचा प्रश्न अधिकच गडद होत जातो.
शशांक शेंडे यांनी या भूमिकेला विनोद, सहजपणा आणि रहस्याची वेगळीच किनार दिली आहे. त्यामुळे जना काका ही व्यक्तिरेखा प्रेक्षकांच्या लक्षात राहण्याची शक्यता आहे.
मात्र, जना काका खरंच इतके साधे आहेत का? त्यांच्या शांत चेहऱ्यामागे ‘मृत्यूचक्र’ची एखादी महत्त्वाची कडी दडली आहे का? या प्रश्नांची उत्तरं चित्रपट पाहिल्यानंतरच मिळणार आहेत.
‘मृत्यूचक्र’ — कारण प्रत्येक चेहरा एक कथा सांगतो… पण प्रत्येक कथा सत्य सांगतेच असं नाही!
‘मृत्यूचक्र’ हा चित्रपट लवकरच संपूर्ण महाराष्ट्रात प्रदर्शित होणार आहे.
.png "Videos"){kind=small}
