(फोटो सौजन्य-सोशल मिडिया)
Prathamesh Parab : ‘टाइपास’, ‘बालक पालक’ यांसारख्या लोकप्रिय चित्रपटांमधून घराघरांत पोहोचलेला अभिनेता प्रथमेश परब सध्या एका आनंदाच्या बातमीमुळे चर्चेत आला आहे. प्रथमेश आणि त्याची पत्नी क्षितिजा घोसाळकर यांनी मुंबईत आणखी एक घर खरेदी केलं आहे. विशेष म्हणजे, प्रथमेशचं मुंबईतील हे चौथं घर असलं तरी पती-पत्नी म्हणून दोघांनी मिळून पहिल्यांदाच स्वतःचं घर बुक केलं आहे. या नव्या घराची आनंदाची बातमी प्रथमेशने सोशल मीडियावर खास पोस्ट शेअर करत चाहत्यांना दिली आहे.
प्रथमेशसाठी या घराचं महत्त्व केवळ आणखी एक प्रॉपर्टी खरेदी करण्यापुरतं मर्यादित नाही. कारण हे घर त्याने आणि क्षितिजाने स्वतःच्या मेहनतीच्या जोरावर एकत्रितपणे खरेदी केलं आहे. त्यामुळे या घराशी त्यांच्या अनेक भावना जोडल्या गेल्या आहेत. प्रथमेशने इन्स्टाग्रामवर पोस्ट शेअर करत आपल्या नव्या घराबद्दलचा आनंद व्यक्त केला आहे.
प्रथमेशने २०१६ मध्ये मुंबईतील सायन येथे पहिलं घर खरेदी केलं होतं. त्यानंतर २०२० मध्ये अंधेरी आणि २०२३ मध्ये मिरारोड येथे घर घेतलं. आता २०२६ मध्ये पत्नी क्षितिजासोबत त्याने गोरेगावमध्ये चौथं घर बुक केलं आहे. त्यामुळे अभिनेत्याच्या आनंदाला पारावार उरलेला नाही. विशेष म्हणजे, याआधीही घरं खरेदी केली असली तरी नवरा-बायको म्हणून दोघांनी एकत्र घेतलेलं हे पहिलंच घर असल्याचं त्याने सांगितलं आहे.
प्रथमेशने आपल्या पोस्टमध्ये लिहिलं, ‘मुंबई… City of Dreams! मोठं शहर, मोठी स्वप्नं आणि स्वतःचं एक हक्काचं घर… अशी स्वप्नं आम्हीही पाहिली होती. आयुष्यात घरं याआधीही घेतली, पण एक Couple म्हणून, नवरा-बायको म्हणून, दोघांनी मिळून पहिल्यांदा बुक केलेलं हे आमचं घर आहे! आणि खरं सांगायचं तर, ही भावना शब्दांत मांडणं खूप कठीण आहे.’
पुढे त्याने घर बुक केल्यानंतरचा भावुक क्षणही सांगितला. ‘ज्या दिवशी घर बुक केलं, त्या दिवशी बाहेर येऊन गाडीत बसलो आणि डोळ्यांतले अश्रू थांबतच नव्हते. आनंद होता, समाधान होतं, पण त्याहीपेक्षा मोठी भावना होती ती म्हणजे… आम्ही दोघांनी मिळून पाहिलेलं एक स्वप्न आज सत्यात उतरण्याच्या दिशेने पहिलं पाऊल टाकलं होतं!’ असं त्याने म्हटलं.
तसंच, अजून घराचा ताबा मिळायचा असून चाव्या हातात यायच्या आहेत. त्यानंतर आपल्या आवडीनुसार घराचा प्रत्येक कोपरा सजवायचा आहे आणि त्या घरात असंख्य आठवणी तयार करायच्या आहेत, असंही प्रथमेशने सांगितलं.
पोस्टच्या शेवटी त्याने दिवाळीच्या आनंदासोबत आयुष्यात आलेल्या नव्या स्वप्नाचा उल्लेख केला. ‘या दिवाळीत रोषणाई तर खूप आहेच, पण आमच्या आयुष्यात एका नव्या स्वप्नाचा प्रकाशही आला आहे! कारण घर कितवं आहे यापेक्षा ते कोणासोबत आणि कोणत्या भावनेने घेतलंय, हे जास्त महत्त्वाचं असतं!’ अशा शब्दांत प्रथमेशने आपल्या भावना व्यक्त केल्या आहेत.
प्रथमेशच्या या पोस्टवर चाहते आणि मनोरंजनविश्वातील कलाकारांकडून अभिनंदनाचा वर्षाव होत आहे. अभिनेत्याच्या आयुष्यातील या नव्या टप्प्यामुळे त्याचा आनंद द्विगुणित झाला असून चाहत्यांनीही त्याच्या नव्या घराच्या स्वप्नासाठी शुभेच्छा दिल्या आहेत.
.png "Videos"){kind=small}
