(फोटो सौजन्य-सोशल मीडिया)
ओंकार भोजने फोन उचलत नसल्याचा मिलिंद कवडेंचा आरोप
“पुढच्या चित्रपटात ओंकारला अजिबात घेणार नाही”
गेल्या चार महिन्यांपासून संपर्क होत नसल्याचा दावा
Onkar Bhojane: मराठी मनोरंजनसृष्टीतील आगामी ‘अफरातफरी’ हा चित्रपट लवकरच प्रेक्षकांच्या भेटीला येणार आहे. सध्या चित्रपटाची संपूर्ण टीम प्रमोशनमध्ये व्यस्त आहे. मात्र, याचदरम्यान काही कलाकार प्रमोशनला उपस्थित राहत नसल्याची चर्चा सुरू आहे. आता ‘अफरातफरी’चे दिग्दर्शक मिलिंद कवडे यांनी अभिनेता ओंकार भोजने याच्याबाबत नाराजी व्यक्त केली आहे.
मिलिंद कवडे यांनी ‘महा MTB’ला दिलेल्या मुलाखतीत ओंकार भोजनेच्या प्रमोशनमधील सहभागाबाबत भाष्य केलं. त्यांनी सांगितलं की, जूनमध्येच ओंकारला ऑक्टोबरमध्ये चित्रपट प्रदर्शित होणार असल्याचं सांगण्यात आलं होतं. मात्र, त्यानंतर प्रमोशनसाठी त्याच्याशी संपर्क साधण्याचा प्रयत्न करूनही प्रतिसाद मिळाला नसल्याचं कवडे यांनी सांगितलं.
“ओंकार एवढा बिझी आहे की तो कोणाचेही फोन उचलत नाही. आम्हा तिघांचेही त्याने फोन उचलले नाहीत. कॉल केल्यानंतर त्याचा एकच मेसेज येतो, ‘दादा मी तुला कॉलबॅक करतो.’ गेल्या चार महिन्यांपासून हेच सुरू आहे,” असं मिलिंद कवडे यांनी सांगितलं.Onkar Bhojane
निर्मात्यांनीही पाठवला मेसेज
ओंकारकडून प्रतिसाद मिळत नसल्याने अखेर निर्मात्यांनी त्याला मेसेज करून नाराजी व्यक्त केल्याचंही मिलिंद कवडे यांनी सांगितलं. चित्रपटासाठी निर्मात्यांनी मोठी गुंतवणूक केलेली असते, त्यामुळे कलाकारांनी किमान प्रमोशनमध्ये सहकार्य करावं, असं त्यांनी म्हटलं.
कवडे यांनी अभिनेता मोहन आगाशे यांचं उदाहरणही दिलं. मोहन आगाशे हैदराबादमध्ये असतानाही त्यांनी तिथून सेल्फी व्हिडीओ पाठवून चित्रपटाचं प्रमोशन केल्याचं ते म्हणाले. त्यानंतर ते स्वत: प्रमोशनसाठी उपस्थित असल्याचंही कवडे यांनी सांगितलं.
या प्रकारानंतर आपण पुढच्या चित्रपटात ओंकार भोजनेला घेणार नसल्याचं मिलिंद कवडे यांनी स्पष्ट केलं.
“आता मी कानाला खडा लावला आहे. मी पुढच्या चित्रपटात ओंकारला अजिबात घेणार नाही. मी आतापर्यंत खूप काम केलं आहे, पण या सगळ्यात तो खूप अनप्रोफेशनल आहे. दिग्दर्शकाचा फोन न उचलणं, निर्मात्यांचा फोन न उचलणं, EP ला गंडवणं आणि सतत येतो-येतो म्हणणं… याला अनप्रोफेशनलच म्हणतात,” असं कवडे यांनी म्हटलं.
“तो कलाकार म्हणून उत्तम आहे, पण माणूस म्हणून…”
ओंकारच्या अभिनयाचं कौतुक करताना मात्र मिलिंद कवडे यांनी त्याचं कलाकार म्हणून कौतुक केलं. “तो एक कलाकार म्हणून उत्तम आहे, चांगलं काम करतो. पण माणूस म्हणून सॉरी! खूप अनप्रोफेशनल… तो सराईत खोटारडा आहे,” असं त्यांनी मुलाखतीत म्हटलं.
दरम्यान, ओंकार भोजनेने या आरोपांवर अद्याप कोणतीही प्रतिक्रिया दिल्याची माहिती नाही. त्यामुळे मिलिंद कवडे यांनी केलेल्या आरोपांबाबत ओंकारची बाजू समोर येणं महत्त्वाचं ठरणार आहे.
‘अफरातफरी’ हा चित्रपट लवकरच प्रेक्षकांच्या भेटीला येणार असून, सध्या त्याच्या प्रमोशनची जोरदार तयारी सुरू आहे.
.png "Videos"){kind=small}
