(फोटो सौजन्य- सोशल मीडिया)
Rakhandar First Look: अभिनेता गश्मीर महाजनी (Gashmeer Mahajani) आता दिग्दर्शक म्हणून नवी इनिंग सुरू करत आहे. गश्मीरच्या दिग्दर्शनातील पहिला चित्रपट ‘राखणदार’ २०२७ मध्ये प्रेक्षकांच्या भेटीला येणार आहे. चित्रपटाची घोषणा होताच त्याचं पहिलं पोस्टर सोशल मीडियावर चर्चेचा विषय ठरलं आहे.
पोस्टरमध्ये लालभडक पार्श्वभूमी, रक्ताचे उडालेले शिंतोडे आणि मध्यभागी सिंहाच्या उग्र चेहऱ्याची प्रतिमा पाहायला मिळते. त्याखाली मजबूत देहयष्टी असलेली व्यक्तिरेखा दिसत असून, या दृश्यरचनेमुळे चित्रपटाच्या कथेबद्दल अनेक प्रश्न निर्माण झाले आहेत. सिंहाची प्रतिमा सामर्थ्य, धैर्य आणि रक्षणाची भावना अधोरेखित करताना दिसते.
या चित्रपटात सई ताम्हणकर, गश्मीर महाजनी आणि मकरंद अनासपुरे हे कलाकार प्रमुख भूमिकांमध्ये झळकणार आहेत. विशेष म्हणजे पोस्टरवर लहान मुलाच्या हस्ताक्षरात लिहिलेलं ‘माझा आवडता प्राणी – माझे बाबा’ हे वाक्य लक्ष वेधून घेत आहे. या कॅप्शनमुळे ‘राखणदार’ ही वडील-मुलाच्या नात्याभोवती फिरणारी कथा आहे का, असा प्रश्न प्रेक्षकांना पडला आहे.
पोस्टरमधील रक्तरंजित वातावरण, सिंहाचा चेहरा आणि माणसाचं शरीर यामागे नेमकं काय रहस्य आहे, याची उत्सुकता निर्माण झाली आहे. चित्रपटाच्या पोस्टरमधील प्रत्येक घटक कथेशी संबंधित असल्याचं गश्मीरने सांगितलं आहे.
दिग्दर्शक म्हणून आपल्या पहिल्या चित्रपटाबद्दल बोलताना गश्मीर महाजनी म्हणाला, “दिग्दर्शक म्हणून माझा पहिलाच चित्रपट असल्यामुळे प्रत्येक गोष्ट प्रेक्षकांच्या मनात कुतूहल निर्माण करणारी असावी, अशी माझी इच्छा होती. त्यामुळे या पोस्टरमधील प्रत्येक एलिमेंट अतिशय विचारपूर्वक तयार करण्यात आला आहे.”
तो पुढे म्हणाला, “पोस्टर पाहाताच प्रेक्षकांच्या मनात अनेक प्रश्न निर्माण व्हावेत आणि त्या प्रश्नांची उत्तरं शोधण्यासाठी त्यांनी चित्रपटगृहात यावं, हा त्यामागचा उद्देश आहे. या पोस्टरमधील प्रत्येक प्रतिमा, प्रत्येक शब्द आणि प्रत्येक तपशील कथेशी जोडलेला आहे. हा चित्रपट मी मनापासून माझ्या बाबांना समर्पित करत आहे.”
गश्मीर महाजनीच्या दिग्दर्शनातील पदार्पणामुळे आणि रहस्य निर्माण करणाऱ्या पोस्टरमुळे ‘राखणदार’ची आतापासूनच चर्चा सुरू झाली आहे. २०२७ मध्ये हा चित्रपट प्रेक्षकांसमोर कोणती कथा आणि कसा वेगळा अनुभव घेऊन येतो, याकडे आता सर्वांचं लक्ष लागलं आहे.
.png "Videos"){kind=small}
