(फोटो सौजन्य-सोशल मिडिया)
Rinku Rajguru New Movie: मराठी मनोरंजनविश्वात अभिनेत्री रिंकू राजगुरूच्या आगामी ‘जिजाई’ या चित्रपटाची चर्चा रंगू लागली आहे. नुकतंच या चित्रपटाचं नवं पोस्टर प्रेक्षकांच्या भेटीला आलं असून, त्यातील रिंकूचा लूक लक्ष वेधून घेत आहे. कपाळावर लाल चंद्रकोर, डोळ्यांत वेगळीच चमक आणि नजरेत अनेक अनुत्तरित प्रश्न… अशा रूपातील रिंकूने पोस्टरमधून प्रेक्षकांची उत्सुकता वाढवली आहे. झी स्टुडिओज प्रस्तुत हा चित्रपट येत्या २० नोव्हेंबर रोजी चित्रपटगृहांत प्रदर्शित होणार आहे.
‘जिजाई’च्या पोस्टरमध्ये रिंकूचा संपूर्ण चेहरा दाखवण्यात आलेला नाही. तिचे डोळे आणि कपाळावरील लाल चंद्रकोर यांवर विशेष लक्ष केंद्रित करण्यात आलं आहे. चेहऱ्यावर पडणारा प्रकाश, डोळ्यांतील भाव आणि सोनेरी अक्षरांतील ‘जिजाई’ हे शीर्षक पोस्टरला एक वेगळीच दृश्यात्मक ओळख देत आहे.
मात्र, रिंकूच्या व्यक्तिरेखेचं नेमकं स्वरूप काय, तिच्या कपाळावरील चंद्रकोरीचं महत्त्व काय आणि तिच्या नजरेमागची कहाणी कोणती, असे अनेक प्रश्न या पोस्टरमुळे निर्माण झाले आहेत. त्यामुळे चित्रपटाच्या कथेबद्दलची उत्सुकता आणखी वाढली आहे.
आजच्या लढवय्या स्त्रीची कहाणी
या चित्रपटाचं दिग्दर्शन तृशांत इंगळे यांनी केलं आहे. झी स्टुडिओजने चित्रपटाची निर्मिती केली असून कोकोनट फिल्म्सने सहनिर्मिती केली आहे. नुपूर गुहा आणि तुषार राऊत हेही या चित्रपटाच्या सहनिर्मितीशी जोडलेले आहेत.
चित्रपटाबद्दल बोलताना दिग्दर्शक तृशांत इंगळे म्हणाले, “प्रत्येक व्यक्तिरेखेला स्वतःची एक गोष्ट असते आणि ती गोष्ट प्रेक्षकांपर्यंत पोहोचवण्याची ताकद चित्रपटाच्या मांडणीत असते. ‘जिजाई’च्या बाबतीतही आम्ही काहीतरी वेगळं मांडण्याचा प्रयत्न केला आहे. मुळात हा चित्रपट आजच्या स्त्रीचा आहे. जी लढवय्या आहे. पोस्टरमधून प्रेक्षकांना कथेची उत्सुकता वाटावी आणि त्यांच्या मनात अनेक प्रश्न निर्माण व्हावेत, अशी आमची इच्छा होती. रिंकूने या भूमिकेला दिलेला न्याय आणि चित्रपटातील तिचं रूप प्रेक्षकांसाठी नक्कीच खास असेल.”
झी स्टुडिओजला ‘जिजाई’कडून अपेक्षा
झी स्टुडिओजचे मराठी व्यवसाय प्रमुख बवेश जानवलेकर यांनीही या चित्रपटाबद्दल उत्सुकता व्यक्त केली. ते म्हणाले, “झी स्टुडिओज नेहमीच वेगळ्या आशयाच्या आणि प्रेक्षकांना नव्या अनुभवाची ओळख करून देणाऱ्या चित्रपटांना प्राधान्य देत आलं आहे. ‘जिजाई’ हा त्याच प्रवासातील एक महत्त्वाचा चित्रपट आहे. रिंकू राजगुरूसारखी गुणी अभिनेत्री आणि नवोदित दिग्दर्शक तृशांत इंगळे यांच्यासोबत काम करताना आम्हाला आनंद होत आहे. या चित्रपटाच्या पोस्टरमुळे प्रेक्षकांमध्ये निर्माण झालेली उत्सुकता चित्रपट प्रदर्शित झाल्यानंतर आणखी वाढेल, असा आम्हाला विश्वास आहे.”
रिंकू राजगुरूच्या या चित्रपटात आणखी कोणते कलाकार झळकणार, हे अद्याप स्पष्ट झालेलं नाही. पोस्टरमधून कथेची झलक दाखवत निर्मात्यांनी प्रेक्षकांच्या मनात अनेक प्रश्न निर्माण केले आहेत. आता या प्रश्नांची उत्तरं चित्रपटातून कशी मिळणार आणि रिंकूची व्यक्तिरेखा कोणती नवी गोष्ट सांगणार, हे पाहणं महत्त्वाचं ठरणार आहे. ‘जिजाई’ २० नोव्हेंबर रोजी चित्रपटगृहांत प्रदर्शित होणार आहे.
Ramayana Movie: रामायण’मध्ये सीतेच्या भूमिकेसाठी साई पल्लवीच का? यशने सांगितलं खास कारण!
.png "Videos"){kind=small}
