(फोटो सौजन्य- सोशल मीडिया)
Nadotsavam 2026: महाराष्ट्राच्या समृद्ध लोककला आणि भक्ती-संगीताचा अनोखा संगम अनुभवण्याची संधी ठाणेकरांना मिळणार आहे. झी एंटरटेनमेंटच्या ‘नादोत्सवम २०२६’ या सांस्कृतिक महोत्सवाची सुरुवात ३१ ऑक्टोबर रोजी ठाण्यातील गावदेवी मैदानात होणार आहे. या महोत्सवात पद्मश्री पुरस्काराने सन्मानित भिकल्या लाडक्या धिंडा यांचे पारंपरिक तारपा वादन हे प्रमुख आकर्षण असणार असून, ‘अभंग रिपोस्ट’ बँडच्या खास सादरीकरणातून भक्ती-संगीताचा आधुनिक आविष्कार अनुभवायला मिळणार आहे.
महाराष्ट्राच्या आदिवासी लोकसंस्कृतीचा अविभाज्य भाग असलेल्या तारपा वादनाला ‘नादोत्सवम २०२६’मध्ये विशेष स्थान देण्यात आले आहे. पद्मश्री भिकल्या लाडक्या धिंडा यांच्या सादरीकरणातून प्रेक्षकांना या पारंपरिक कलेचा अनुभव घेता येईल. स्थानिक लोककलांना आणि कलाकारांना मोठ्या व्यासपीठावर संधी देण्याच्या माध्यमातून महाराष्ट्राचा सांस्कृतिक वारसा नव्या पिढीपर्यंत पोहोचवण्याचा या महोत्सवाचा प्रयत्न आहे.
‘अभंग रिपोस्ट’मधून भक्ती-संगीताचा आधुनिक अंदाज
या महोत्सवातील आणखी एक आकर्षण म्हणजे ‘अभंग रिपोस्ट’ बँडची खास प्रस्तुती. महाराष्ट्राच्या भक्तीपरंपरेतील लोकप्रिय अभंगांना आधुनिक संगीताची जोड देत हा बँड आपली वेगळी शैली सादर करणार आहे. अभंगांचा मूळ भाव आणि अर्थ कायम ठेवून त्यांची आजच्या पिढीला भावेल अशा पद्धतीने मांडणी करण्याचा प्रयत्न या सादरीकरणातून केला जाणार आहे. त्यामुळे पारंपरिक भक्ती-संगीत आणि आधुनिक संगीतशैली यांचा अनोखा मेळ प्रेक्षकांना अनुभवता येईल.
प्रसाद जवादे आणि शिवानी सोनार करणार सूत्रसंचालन
झी मराठीवरील लोकप्रिय कलाकार प्रसाद जवादे आणि शिवानी सोनार या महोत्सवाचे सूत्रसंचालन करणार आहेत. पारंपरिक लोककला, भक्ती-संगीत आणि आधुनिक सादरीकरणांचा संगम साधणारा हा कार्यक्रम ठाणेकरांसाठी सांस्कृतिक पर्वणी ठरणार आहे.
झी मराठी, झी टॉकीज आणि मराठी झी५च्या बिझनेस हेड व चीफ चॅनेल ऑफिसर हेमा व्ही. आर. यांनी या महोत्सवामागील भूमिका स्पष्ट केली. त्या म्हणाल्या, “स्थानिक कलाकारांची कला त्यांच्या भागातील संस्कृतीची ओळख करून देत असते. ठाण्यातील गावदेवी मैदानावर होणाऱ्या ‘नादोत्सवम’च्या कार्यक्रमातून पद्मश्री भिकल्या लाडक्या धिंडा यांच्या तारपा वादनाचा अनुभव प्रेक्षकांना घेता येणार आहे. अशा कलाकारांच्या कलेला मोठ्या मंचावर सादर करण्याची संधी मिळणं महत्त्वाचं आहे. आपल्या लोकपरंपरेतील या कलांचा अनुभव अधिकाधिक लोकांपर्यंत पोहोचावा आणि त्यांची ओळख नव्या पिढीलाही व्हावी, हा या कार्यक्रमामागचा आमचा उद्देश आहे.”
अभंगांना आधुनिक संगीताची जोड
यूथ बिझनेस हेड अलंकार पाठारे यांनी ‘अभंग रिपोस्ट’च्या संकल्पनेविषयी सांगितले. ते म्हणाले, “‘अभंग रिपोस्ट’च्या माध्यमातून अभंगांना आजच्या संगीताची जोड देण्याचा आमचा प्रयत्न आहे. या ‘नादोत्सवम’च्या प्रवासात मोलाची साथ आणि सहकार्य दिल्याबद्दल अस्तित्व थिएटरचे आभार! आजच्या तरुणांना संगीताच्या वेगवेगळ्या शैली अनुभवायला आवडतात. त्यांच्यापर्यंत अभंग पोहोचवताना त्यातील भाव आणि अर्थ कायम ठेवून त्यांची आधुनिक मांडणी करता येते, हे ‘अभंग रिपोस्ट’मधून अनुभवायला मिळेल. ‘नादोत्सवम’सारख्या मंचावर पारंपरिक भक्ती-संगीत आणि आजच्या संगीतशैली एकत्र येणं, ही कलाकारांसाठी आणि प्रेक्षकांसाठीही एक वेगळी संधी आहे.”
३१ ऑक्टोबर रोजी ठाण्यातील गावदेवी मैदानापासून सुरू होणारा ‘नादोत्सवम २०२६’ हा महोत्सव महाराष्ट्राच्या लोककला आणि भक्ती-संगीताला नवे व्यासपीठ उपलब्ध करून देणार आहे. पारंपरिक कलांचा वारसा जपतानाच स्थानिक कलाकारांची कला अधिकाधिक लोकांपर्यंत पोहोचवणे आणि नव्या पिढीला या सांस्कृतिक परंपरेची ओळख करून देणे, हा या उपक्रमाचा मुख्य उद्देश आहे.
.png "Videos"){kind=small}
