(फोटो सौजन्य-सोशल मिडिया)
Dhaktya Sunbai Serial: गणपती बाप्पाच्या आशीर्वादाने सुरू होणारी प्रत्येक नवी सुरुवात खास मानली जाते. याच भावनेतून झी मराठीवरील आगामी ‘धाकट्या सुनबाई’ या मालिकेचा शुभारंभ पारंपरिक प्रेस मीटऐवजी थेट गणरायाच्या चरणी करण्यात आला. गणेशोत्सवाच्या मंगलमय वातावरणात मुंबईतील प्रसिद्ध गणेश गल्लीच्या मुंबईच्या राजा गणपतीसमोर मालिकेची खास प्रेस मीट आयोजित करण्यात आली होती.
या वेळी मालिकेचे निर्माते महेश कोठारे, तसेच कलाकार मंदार जाधव, चिन्मयी मोरे आणि मुग्धा कर्णिक यांच्यासह मालिकेची संपूर्ण टीम उपस्थित होती. गणरायाचे दर्शन घेत मालिकेच्या नव्या प्रवासाला सुरुवात करण्यात आली.
‘धाकट्या सुनबाई’ मालिकेत मंदार जाधव वेदांत पटवर्धन ही भूमिका साकारत आहे. वेदांत हा कुटुंबावर प्रेम करणारा, प्रत्येकाच्या पाठीशी खंबीरपणे उभा राहणारा आणि अन्यायाविरोधात आवाज उठवणारा तरुण असल्याचे मालिकेत दाखवण्यात येणार आहे.
तर अभिनेत्री चिन्मयी मोरे राधिका या भूमिकेतून पहिल्यांदाच दैनंदिन मालिकेतून प्रेक्षकांच्या भेटीला येत आहे. मालिकेत दोन कुटुंबांची गोष्ट, त्यांचे वेगवेगळे विचार आणि नात्यांमधील गुंतागुंत पाहायला मिळणार आहे. आपल्या माणसांची साथ आणि नात्यांमधील विश्वास आयुष्याला कसा अर्थ देतो, हे राधिका आणि वेदांतच्या आयुष्यातून उलगडणार आहे.
‘धाकट्या सुनबाई’च्या माध्यमातून पहिल्यांदाच दैनंदिन मालिकेत पदार्पण करणाऱ्या चिन्मयी मोरेने या नव्या प्रवासाबद्दल आनंद व्यक्त केला. ती म्हणाली, “माझ्यासाठी हा प्रवास खूप खास आहे आणि या सगळ्याची सुरुवात मुंबईच्या राजाच्या चरणी होत आहे, यापेक्षा सुंदर आणखी काय असू शकतं!”
पुढे ती म्हणाली की, पहिल्या मालिकेसाठी झी मराठीसारखं व्यासपीठ आणि महेश कोठारे यांच्या कोठारे व्हिजनसारखं प्रोडक्शन हाऊस मिळाल्याने ती आनंदी आहे. तसेच सहकलाकार आणि मालिकेच्या टीमसोबत काम करण्याबद्दलही तिने उत्साह व्यक्त केला.
“या सगळ्यासाठी मी बाप्पाचे मनापासून आभार मानते आणि ‘धाकट्या सुनबाई’ला प्रेक्षकांचं भरभरून प्रेम मिळावं, अशी बाप्पाकडे प्रार्थना करते,” असं चिन्मयीने म्हटलं.
“२८ सप्टेंबरची आतुरतेने वाट पाहतोय”
मंदार जाधवनेही मालिकेच्या या खास शुभारंभाबद्दल आनंद व्यक्त केला. तो म्हणाला, “‘धाकट्या सुनबाई’च्या प्रेस मीटची सुरुवात मुंबईच्या राजाच्या आशीर्वादाने होत आहे, यासाठी मी खूप आनंदी आणि स्वतःला खूप भाग्यवान समजतो.”
गणेशोत्सवासारख्या मंगलमय वातावरणात मालिकेचा प्रेस लॉन्च होणं ही टीमसाठी मोठी गोष्ट असल्याचेही त्याने सांगितले. यावेळी प्रेक्षकांना प्रत्यक्ष भेटून मालिकेबद्दल सांगता आल्याचा आनंदही त्याने व्यक्त केला.
मंदार पुढे म्हणाला, “बाप्पाचा आशीर्वाद या मालिकेला मिळाला आहे, अशी भावना मनात आहे. आता आम्ही २८ सप्टेंबरची आतुरतेने वाट पाहत आहोत.”
गणरायाच्या आशीर्वादाने सुरू झालेला ‘धाकट्या सुनबाई’ मालिकेचा हा नवा प्रवास आता लवकरच प्रेक्षकांच्या भेटीला येणार आहे. राधिका आणि वेदांतची ही नवी गोष्ट प्रेक्षकांना कितपत भावते, हे पाहणे उत्सुकतेचे ठरणार आहे.
‘धाकट्या सुनबाई’ २८ सप्टेंबरपासून संध्याकाळी ६.३० वाजता, फक्त झी मराठीवर पाहता येणार आहे.
.png "Videos"){kind=small}
