(फोटो सौजन्य- सोशल मीडिया)
‘होम मिनिस्टर’च्या नव्या पर्वाच्या सुरुवातीला नेहमीच्या फ्लेक्सऐवजी कापसे पैठणी यांनी साकारलेल्या पैठणी साडीचा तब्बल २० फूट उंच आणि ४० फूट रुंद होर्डिंग तयार करण्यात आलं आहे. या होर्डिंगसाठी खास पैठणी साडीचा वापर करण्यात आला आहे.
महाराष्ट्राच्या समृद्ध परंपरेचं प्रतीक असलेल्या पैठणीला अशा अनोख्या पद्धतीने जाहिरातीचा भाग बनवण्याचा हा पहिलाच प्रयत्न असल्याचं सांगण्यात येत आहे. या अनोख्या उपक्रमाला सोशल मीडियावरही चांगला प्रतिसाद मिळत आहे. कार्यक्रमाचे सूत्रसंचालक आदेश बांदेकर यांनीदेखील या संकल्पनेचं कौतुक केलं आहे.
गेल्या दोन दशकांपासून ‘होम मिनिस्टर’ हा कार्यक्रम महाराष्ट्रातील महिलांच्या आयुष्यातील अनुभव, कर्तृत्व आणि त्यांच्या रोजच्या जगण्यातले खास क्षण प्रेक्षकांसमोर आणत आहे. आदेश बांदेकर यांच्या खास शैलीतील सूत्रसंचालनामुळे कार्यक्रमाने प्रेक्षकांच्या मनात वेगळं स्थान निर्माण केलं आहे.
या २० वर्षांच्या प्रवासात ‘होम मिनिस्टर’ने जवळपास २५ लाख किलोमीटरचा प्रवास केला असून, आतापर्यंत सुमारे ७,५०० पैठणी साड्या महिलांना देण्यात आल्या आहेत.
दरम्यान, या आठवड्यात ‘होम मिनिस्टर’मध्ये भाऊजी कोल्हापुरातील वहिनींची भेट घेणार आहेत. यावेळी विविध खेळ आणि गमती-जमतींसोबतच भाऊजी वहिनींच्या आयुष्याचा प्रवास, त्यांच्या अनुभवांबद्दल आणि काही खास गोष्टींबद्दल जाणून घेणार आहेत.
‘होम मिनिस्टर’ सोमवार ते शनिवार दररोज संध्याकाळी ६ वाजता झी मराठीवर प्रेक्षकांच्या भेटीला येतो.
.png "Videos"){kind=small}
