Kon Yashwant Pansare: शिवानी रांगोळे वेगळ्या भूमिकेत, सिरीजबाबत केला खुलासा

Kon Yashwant Pansare: मराठी ZEE5 वर नुकत्याच प्रदर्शित झालेल्या ‘कोण यशवंत पानसरे’मध्ये अभिनेत्री शिवानी रांगोळेने वेगळी भूमिका साकारली आहे. याबाबत तिने खुलासा केलाय

• कोण आहे पानसरे मराठी ZEE5 वर प्रदर्शित 

• शिवानी रांगोळेची प्रमुख भूमिका 

• भूमिकेविषयी केला खुलासा 

Kon Yashwant Pansare:  शुक्रवारी मराठी झी५ वर ‘कोण यशवंत पानसरे’ ही सिरीज प्रदर्शित झाली. गेल्या अनेक दिवसांपासून या सिरीजची चर्चा होती. भरत जाधव एका वेगळ्या भूमिकेतून यातून प्रेक्षकांसमोर येत आहे आणि त्यांच्याबरोबर अभिनेत्री शिवानी रांगोळेदेखील दिसणार आहे. तिच्या नव्या भूमिकेबद्दल तिने खास गोष्टी सांगितल्या आहेत.  

पानसरे आणि जान्हवी या दोन वेगवेगळ्या पिढ्यांचं प्रतिनिधित्व करतात. या प्रवासात ते एकमेकांकडून काय शिकतात? आणि खऱ्या आयुष्यात अभिनयाबद्दल तू भरत जाधव यांच्याकडून काय शिकलीस? असं विचारल्यावर शिवानी म्हणाली की, ‘मी जान्हवी ही भूमिका साकारत आहे. जान्हवी यंग असल्यामुळे तिच्या आयुष्यात अजून वाईट अनुभव आलेले नाहीत, त्यामुळे ती थोडी नाईव्ह असली तरी अभ्यासात प्रचंड हुशार आहे. कॉलेजपासून ती यशवंत पानसरेंना आदर्श मानत आल्यामुळे तिच्या मनात त्यांच्याबद्दल प्रचंड विश्वास आहे. पण जर एखादी गोष्ट बरोबर नसेल, तर तिथे लगेच बोललंच पाहिजे असा तिचा आग्रह असतो. जिथे यशवंत सर त्यांच्या मॅच्युरिटीमुळे संयम ठेवण्याचा किंवा विचार करून बोलण्याचा सल्ला देतात, तिथे जान्हवीच्या मनात जे येतं ते ती थेट बोलून दाखवते. तिच्यातला हाच ‘फायर’ आणि हा वैचारिक विरोधाभास सिरीज पाहताना खूप रंजक वाटतो’

Kon Yashwant Pansare Review: न्यायासाठी पुन्हा मैदानात उतरतो यशवंत पानसरे! भरत जाधवांची नवी वेबसिरीज किती प्रभावी? वाचा सविस्तर

ही कथा व्यवस्था आणि संस्थांच्या अपयशावर भाष्य करते. या प्रकरणाचा तपास करताना जान्हवीला सत्ता आणि व्यवस्थेविषयी काय नव्याने समजतं? आणि त्यातील किती गोष्टी वास्तवाशी जुळतात? यावर शिवानी स्पष्टपणाने म्हणाली की, ‘शिक्षणामधून मिळणारे ज्ञान आणि प्रत्यक्ष आयुष्य आपल्याला काय शिकवतं, या दोन्ही गोष्टींचा समतोल साधणं खूप महत्त्वाचं असतं. जान्हवी जरी तिचे मत स्पष्टपणे मांडणारी असली, तरी या सिरीजच्या प्रवासात ती यशवंत पानसरेंकडून संयमाचं महत्त्व शिकते. बोलायच्या आधी विचार करणं आणि वेळेला तिचं काम करू देणं हेच सर्वात मोठं औषध असतं, हे तिला समजून येतं.’

जाताजाता जेव्हा शिवानीला विचारण्यात आलं की, आज इतक्या विविध प्रकारच्या कंटेंटमध्ये प्रेक्षकांनी ही मालिका का निवडावी? आणि त्यांना यातून काय मिळावं, अशी तुझी अपेक्षा आहे? त्यावर जराही न थांबता तिने पटकन उत्तर दिलं, ‘ही एक अत्यंत प्रेरणादायी मालिका आहे. अन्यायी जगात स्वतःचा आवाज शोधू पाहणाऱ्या आणि स्वतःची मूल्यं जपत काम पूर्ण करू इच्छिणाऱ्या प्रत्येकासाठी ही गोष्ट आहे. प्रेक्षकांना यशवंत पानसरेंकडून प्रामाणिकपणा आणि जान्हवीकडून कल्पक उत्सुकता शिकायला मिळेल’. ही सिरीज सध्या प्रदर्शित झाली असून प्रेक्षकांचा चांगला प्रतिसाद मिळताना दिसत आहे. 

Marathi Web Series: ‘कोण यशवंत पानसरे?’मध्ये भरत जाधव यांची दमदार भूमिका; न्याय, सत्ता आणि सत्याचा उलगडा होणार!