
(फोटो सौजन्य-सोशल मिडिया)
Mayuri Deshmukh:मराठी मनोरंजनविश्वातील लोकप्रिय अभिनेत्री मयुरी देशमुख हिने आपल्या अभिनयाच्या जोरावर प्रेक्षकांच्या मनात वेगळं स्थान निर्माण केलं आहे. ‘खुलता कळी खुलेना’ या मालिकेमुळे ती घराघरात पोहोचली आणि तिला प्रेक्षकांचे भरभरून प्रेम मिळाले. मात्र, या मालिकेनंतर मयुरी फारशा मराठी मालिकांमध्ये दिसली नाही. त्यामुळे ती छोट्या पडद्यापासून दूर का आहे, असा प्रश्न अनेक चाहत्यांना पडला होता. आता नुकत्याच दिलेल्या एका मुलाखतीत मयुरीने यामागचे कारण स्पष्ट केले आहे.
अभिनेत्री मयुरी देशमुखने ‘लोकशाही मराठी’ला दिलेल्या मुलाखतीत तिच्या अभिनयप्रवासाबद्दल आणि मालिकांपासून दूर राहण्याच्या निर्णयाबद्दल भाष्य केले. यावेळी तिने ‘खुलता कळी खुलेना’नंतर मालिकांच्या बाबतीत आपले सूर जुळले नसल्याचे सांगितले.
मालिकांमध्ये काम करण्याबाबत बोलताना मयुरी म्हणाली, “‘खुलता कळी खुलेना’ या मालिकेनंतर माझे मालिकांच्या बाबतीत सूर-ताल काही जुळले नाहीत. मला हवे तसे विषयही मिळत नव्हते. त्यामुळे मी जाणीवपूर्वक अभिनयातून ब्रेक घेतला. मला अपेक्षित असलेले काम मिळत नव्हते. त्यामुळे मी लिखाणाकडे वळले.”
स्वतःचं नाटक लिहिलं, चित्रपटांमध्येही केलं काम
मालिकांपासून दूर असताना मयुरीने अभिनयाला पूर्णविराम दिला नव्हता. तिने नाटकाच्या माध्यमातून प्रेक्षकांसमोर येण्याचा निर्णय घेतला. विशेष म्हणजे, या नाटकाचे लेखनही तिने स्वतःच केले होते. लेखिका आणि अभिनेत्री अशा दोन्ही भूमिका तिने यामध्ये पार पाडल्या. यानंतर तिने दोन-तीन चित्रपटांमध्येही काम केले. मात्र, या चित्रपटांना अपेक्षित प्रतिसाद मिळाला नसल्याचेही तिने मुलाखतीत सांगितले.
अभिनयासोबतच लेखिका म्हणून स्वतःची वेगळी ओळख निर्माण करण्याचा मयुरीचा प्रयत्न होता. नाटक लिहिणे, त्यात अभिनय करणे आणि चित्रपटांमध्ये काम करणे अशा वेगवेगळ्या माध्यमांतून तिने स्वतःला आजमावले. त्यामुळे ती अभिनयापासून दूर गेली नव्हती, तर वेगवेगळ्या प्रकारच्या कामांचा अनुभव घेत होती.
मराठी नाटक आणि चित्रपटांमध्ये काम केल्यानंतर मयुरीने हिंदी मालिकेतही भूमिका साकारली. मात्र, हिंदी मालिकेत काम केल्यानंतर ती आता मराठी मनोरंजनविश्वात काम करत नाही, अशी चर्चा प्रेक्षकांमध्ये सुरू झाली होती. पण मयुरीचा अभिनयप्रवास केवळ एका भाषेपुरता किंवा माध्यमापुरता मर्यादित राहिलेला नाही. वेगवेगळ्या भूमिका आणि माध्यमांतून प्रेक्षकांसमोर येण्याचा तिचा प्रयत्न सुरू आहे. त्यामुळे आता मयुरी आगामी काळात कोणत्या नव्या भूमिकेतून प्रेक्षकांच्या भेटीला येते, याची उत्सुकता चाहत्यांना लागली आहे.