बुधवार, 28 ऑक्टोबर 2026
(फोटो सौजन्य- सोशल मीडिया)
Vibhavari Pradhan: मराठी आणि हिंदी मालिकांमधून प्रेक्षकांच्या मनात स्थान निर्माण करणाऱ्या अभिनेत्री विभावरी प्रधान यांनी त्यांच्या चित्रपट प्रवासाबद्दल महत्त्वाचा खुलासा केला आहे. ‘या गोजिरवाण्या घरात’ या मालिकेमुळे त्या घराघरांत पोहोचल्या. मात्र, दूरचित्रवाणी मालिकांमध्ये व्यग्र असल्यामुळे त्यांना चित्रपटांमध्ये अपेक्षित संधी मिळाल्या नाहीत, अशी खंत त्यांनी व्यक्त केली आहे. विशेष म्हणजे, विभावरी यांनी मराठी चित्रपटासोबतच एका भोजपुरी सिनेमातही काम केलं आहे.
राजश्री मराठीला दिलेल्या मुलाखतीत विभावरी प्रधान यांनी त्यांच्या भोजपुरी चित्रपटातील अनुभवाबद्दल सांगितलं. ‘हमके माफी देइद’ असं या चित्रपटाचं नाव असून, ‘या गोजिरवाण्या घरात’ ही मालिका सुरू असतानाच त्यांनी या चित्रपटात काम केलं होतं.
या अनुभवाबद्दल बोलताना विभावरी म्हणाल्या की, भोजपुरी भाषा त्यांच्यासाठी नवीन असल्यामुळे संवाद लक्षात ठेवण्यासाठी त्यांना खूप मेहनत घ्यावी लागायची. त्या संवादांचा अक्षरशः पाठांतर करायच्या. या चित्रपटाचं चित्रीकरण गोरखपूर आणि आसपासच्या भागांत झालं होतं.
गावात चित्रीकरण सुरू असताना मुंबईहून आलेली अभिनेत्री कोण आहे, हे पाहण्यासाठी स्थानिक लोक मोठ्या संख्येने जमा व्हायचे. कॅमेऱ्यासमोर सहजपणे संवाद बोलणाऱ्या विभावरी यांना मात्र लोक प्रत्यक्ष बोलण्यासाठी जवळ आले की काय उत्तर द्यावं, हेच कळत नसे.
यामुळे आपण अ‍ॅटिट्यूड दाखवत आहोत, असा गैरसमज लोकांचा व्हायचा, असंही त्यांनी सांगितलं. भोजपुरी चित्रपटातील हा अनुभव त्यांच्यासाठी वेगळा आणि लक्षात राहणारा ठरला.
मराठीत ‘वैभव लक्ष्मी’ हा एकच चित्रपट
भोजपुरी चित्रपटाव्यतिरिक्त विभावरी प्रधान यांनी मराठीत ‘वैभव लक्ष्मी’ या चित्रपटात काम केलं आहे. या चित्रपटात अभिनेत्री अलका कुबल यांच्यासोबत काम करण्याची संधी त्यांना मिळाली होती. अशा प्रकारे त्यांनी आतापर्यंत मराठी आणि भोजपुरी असे दोन चित्रपट केल्याचं मुलाखतीत सांगितलं.
मात्र, चित्रपटांमध्ये काम करण्याची इच्छा असूनही त्यांना फारशा संधी मिळाल्या नाहीत, अशी खंत त्यांनी व्यक्त केली. दूरचित्रवाणी मालिकांमध्ये त्या सातत्याने काम करत असल्यामुळे निर्मात्यांनी आपल्याला केवळ टीव्हीवरील अभिनेत्री म्हणून पाहिलं असावं, असा त्यांचा अंदाज आहे.
चित्रपटांमध्ये कमी काम करण्यामागचं कारण स्पष्ट करताना विभावरी म्हणाल्या की, त्यांना चित्रपटांच्या ऑफरच मिळाल्या नाहीत. संधी मिळाली असती, तर त्यांनी नक्कीच चित्रपट केले असते.
टेलिव्हिजनमध्ये खूप गुंतल्यामुळे कदाचित आपण चित्रपट करणार नाही, असा गैरसमज झाला असावा, असंही त्यांना वाटतं. त्यामुळे मराठी चित्रपटांसाठी आपल्याला विचारण्यात आलं नसावं, अशी खंत त्यांनी व्यक्त केली.
विभावरी प्रधान यांनी आपल्या अभिनयाने छोट्या पडद्यावर वेगळी ओळख निर्माण केली आहे. मात्र, चित्रपटांमध्येही काम करण्याची इच्छा असूनही संधी न मिळाल्याची त्यांची ही खंत त्यांच्या चाहत्यांसाठी नक्कीच लक्षवेधी ठरते.
