
(फोटो सौजन्य- सोशल मीडिया)
Panchayat Season 5 Release Date: ‘पंचायत’ या लोकप्रिय वेब सीरिजच्या पाचव्या सीझनची प्रेक्षक आतुरतेने वाट पाहत होते. आता या चाहत्यांसाठी एक आनंदाची बातमी आहे. काही दिवसांपूर्वी निर्मात्यांनी यंदा ‘पंचायत ५’ प्रदर्शित होणार नसल्याचे संकेत दिले होते. मात्र, प्राइम व्हिडीओने चाहत्यांना सुखद धक्का दिला आहे. या सीरिजचा नवा सीझन लवकरच प्रेक्षकांच्या भेटीला येणार असून, त्याची अधिकृत रिलीज डेटही जाहीर करण्यात आली आहे. प्राइम व्हिडीओने नवीन पोस्टर शेअर करत ही घोषणा केली आहे.
निर्मात्यांनी अधिकृतपणे जाहीर केले आहे की, ‘पंचायत’चा पाचवा सीझन यंदा ३ डिसेंबर रोजी प्रदर्शित होणार आहे. जगभरातील २४० हून अधिक देशांमध्ये प्राइम व्हिडीओवर ही सीरिज पाहता येणार आहे. रिलीज डेट जाहीर झाल्यामुळे चाहत्यांची उत्सुकता आणखी वाढली आहे. पुन्हा एकदा फुलेरा गावातील गंमतीजमती, ग्रामसभा आणि तिथल्या लोकांचे रंजक किस्से पाहण्याची संधी प्रेक्षकांना मिळणार आहे.
ओळखीची पात्रे पुन्हा प्रेक्षकांच्या भेटीला
टीव्हीएफच्या निर्मितीतून साकारलेली ‘पंचायत’ ही वेब सीरिज सामान्य माणसांच्या आयुष्याशी जोडलेली आहे. गेल्या चार सीझनमध्ये या मालिकेने गावातील संस्कृती, छोट्या-मोठ्या समस्या आणि मानवी नातेसंबंध अतिशय सहजपणे मांडले. आता पाचव्या सीझनमध्येही प्रेक्षकांना फुलेरा गावातील ओळखीचे रस्ते, ग्रामसभा आणि आवडती पात्रे पाहायला मिळणार आहेत. दिग्दर्शक दीपक कुमार मिश्रा पुन्हा एकदा प्रेक्षकांना या साध्या, पण रंजक जगात घेऊन जाण्यास सज्ज आहेत.
या वेब सीरिजचे आणखी एक मोठे वैशिष्ट्य म्हणजे तिची दमदार स्टारकास्ट. पाचव्या सीझनमध्येही कलाकार आपल्या आधीच्या भूमिकांमध्ये परतणार आहेत. जितेंद्र कुमार, रघुबीर यादव, नीना गुप्ता, सुनीता राजवार, फैसल मलिक, चंदन रॉय, सान्विका, दुर्गेश कुमार आणि अशोक पाठक हे कलाकार पुन्हा एकदा आपल्या अभिनयाने फुलेरा गावातील व्यक्तिरेखा जिवंत करणार आहेत. त्यामुळे ‘पंचायत ५’मध्ये नेमकं काय घडणार, याची प्रेक्षकांना उत्सुकता लागली आहे.