Pehla Pyaar Doosri Baar: ‘तेरा यार हूं मैं’च्या आठवणी पुन्हा ताज्या; ‘पुराने दिन’ गाण्याने जिंकली चाहत्यांची मनं!

Pehla Pyaar Doosri Baar: ‘पुराने दिन’ या गाण्यातून मैत्री, पहिलं प्रेम आणि कॉलेजच्या जुन्या आठवणींना उजाळा मिळाला आहे. हे गाणं गायक अरिजित सिंगने गायलं आहे.

Pehla Pyaar Doosri Baar: लव रंजन यांच्या आगामी ‘पहला प्यार दूसरी बार’ या चित्रपटातील ‘पुराने दिन’ हे नवं गाणं प्रेक्षकांच्या भेटीला आलं आहे. हे गाणं ऐकल्यानंतर चाहत्यांना लोकप्रिय ‘तेरा यार हूं मैं’ या गाण्याच्या आठवणी पुन्हा ताज्या झाल्या आहेत. मैत्री, पहिलं प्रेम आणि कॉलेजच्या दिवसांतील निरागस आठवणींचं सुंदर चित्रण या गाण्यात पाहायला मिळत आहे.

‘तेरा यार हूं मैं’ची टीम पुन्हा एकत्र

‘तेरा यार हूं मैं’ हे मैत्रीवर आधारित लोकप्रिय गाणं आजही श्रोत्यांच्या आवडत्या गाण्यांपैकी एक आहे. या गाण्याला आकार देणारी अरिजित सिंग, रोचक कोहली, कुमार आणि लव रंजन यांची टीम आता ‘पुराने दिन’साठी पुन्हा एकत्र आली आहे.

‘तेरा यार हूं मैं’मधून मैत्रीच्या घट्ट नात्याची भावना व्यक्त झाली होती, तर ‘पुराने दिन’ हे गाणं प्रेक्षकांना जुन्या आठवणींच्या विश्वात घेऊन जातं.

Drishyam 3 Cast Fees: अजय देवगणच्या मानधनाचा आकडा पाहून व्हाल थक्क! तब्बू आणि रजत कपूरची फी किती

पहिल्या प्रेमाच्या आठवणींचा हळुवार प्रवास

‘पुराने दिन’मध्ये कॉलेजच्या दिवसांतील मैत्री आणि पहिल्या प्रेमाची निरागस भावना पाहायला मिळते. वर्गात लपूनछपून एकमेकांकडे पाहणं, न बोलताही भावना समजून घेणं आणि आपल्या आवडत्या व्यक्तीला पाहण्यासाठी असलेली उत्सुकता अशा अनेक हळुवार क्षणांचं चित्रण गाण्यात करण्यात आलं आहे.

तुषार छिब्बर, सरगुन कौर लूथरा, कुणाल वैद, साक्षी वैद्या, स्पर्श वालिया आणि अलीशा चोप्रा या सहा प्रमुख कलाकारांच्या कथेला हे गाणं भावनिक स्पर्श देतं. त्यांच्या पात्रांच्या मैत्रीपासून पहिल्या प्रेमापर्यंतचा प्रवास गाण्यातून उलगडताना दिसतो.

अरिजित सिंगच्या आवाजाची जादू

‘पुराने दिन’ला रोचक कोहली यांनी संगीत दिलं असून, अरिजित सिंग यांनी आपल्या सुरेल आवाजात हे गाणं गायलं आहे. गीतकार कुमार यांनी लिहिलेल्या या गाण्यात पहिल्या प्रेमाची निरागसता आणि जुन्या आठवणींची ऊब जाणवते.

रोचक कोहली यांनी या गाण्याबद्दल आनंद व्यक्त करताना ‘तेरा यार हूं मैं’ला मिळालेल्या प्रेमाबद्दल चाहत्यांचे आभार मानले. ‘पुराने दिन’च्या माध्यमातून पहिल्या प्रेमाच्या निरागस भावनेचा वेध घेण्याचा प्रयत्न केल्याचं त्यांनी सांगितलं. ओळखीची भावना देतानाच नवा अनुभव देणारं गाणं तयार करण्याचा प्रयत्न केल्याचंही त्यांनी नमूद केलं.

Ayushmann Khurrana: सात चित्रपट, सात नवे दिग्दर्शक; आयुष्मान खुरानाची हटके काम करण्याची पद्धत चर्चेत

‘पुराने दिन’मधून जुन्या आठवणींना उजाळा

गीतकार कुमार यांनी सांगितलं की, ‘तेरा यार हूं मैं’ आणि ‘पुराने दिन’ ही दोन्ही गाणी मैत्री आणि मोठं होताना आयुष्याशी जोडल्या जाणाऱ्या आठवणींच्या भावविश्वातून आली आहेत. महाविद्यालयीन जीवनातील मैत्री, पहिला क्रश आणि छोट्या-छोट्या गोष्टी खास वाटणारा तो निरागस काळ ‘पुराने दिन’मधून मांडण्याचा प्रयत्न करण्यात आला आहे.

या गाण्यामुळे प्रेक्षकांना आपल्या कॉलेजच्या दिवसांची आणि मित्रांसोबत घालवलेल्या जुन्या क्षणांची आठवण होत आहे.

२३ ऑक्टोबरला चित्रपटगृहात दाखल होणार चित्रपट

‘पहला प्यार दूसरी बार’ हा चित्रपट लव्ह फिल्म्स प्रस्तुत करत आहे. अनुज सैनी यांनी चित्रपटाचं दिग्दर्शन केलं असून, लव रंजन आणि अंकुर गर्ग यांनी निर्मिती केली आहे. हा चित्रपट २३ ऑक्टोबर २०२६ रोजी जगभरातील चित्रपटगृहांमध्ये प्रदर्शित होणार आहे.