(फोटो सौजन्य- सोशल मीडिया)
Ramayana Set Fire: रणबीर कपूर आणि साई पल्लवी यांच्या बहुप्रतिक्षित ‘रामायण’ चित्रपटाची सध्या जोरदार चर्चा आहे. मात्र, या चित्रपटाच्या सेटवर आग लागल्याची चिंताजनक घटना समोर आली आहे. सोमवारी मुंबईतील गोरेगाव पूर्व येथील फिल्म सिटीमधील एका तात्पुरत्या शूटिंग सेटवर आग लागली. या घटनेमुळे परिसरात काही काळ घबराटीचं वातावरण निर्माण झालं.
५ ऑक्टोबर रोजी दुपारी ४ वाजून २ मिनिटांनी गोरेगाव पूर्व येथील फिल्म सिटीमध्ये आग लागल्याची माहिती मिळाली. रिलायन्स मीडिया वर्क्स आणि प्राईम फोकस स्टुडिओच्या मागील बाजूस असलेल्या तात्पुरत्या सेटवर ही आग लागली.
बीएमसीच्या मुंबई अग्निशमन दलाच्या माहितीनुसार, प्राईम फोकस स्टुडिओच्या मागे सुमारे १०० बाय २० फूट आकाराच्या तात्पुरत्या सेटवर उभारलेल्या पीसीआर युनिटमध्ये आग लागली होती. आगीचे व्हिडीओ सोशल मीडियावर समोर आले असून, त्यामध्ये सेटमधून धुराचे लोट आणि आगीच्या ज्वाला बाहेर पडताना दिसत आहेत.
इलेक्ट्रिकल वायरिंगसह अनेक साहित्याचं नुकसान
प्राथमिक माहितीनुसार, आग इलेक्ट्रिकल वायरिंग, इन्स्टॉलेशन आणि केबल्सपर्यंत पोहोचली. याशिवाय दरवाजे, लाकडी फळ्या, एसी युनिट्स, बांबू, प्लास्टिकचं साहित्य, साऊंड सिस्टीम आणि शूटिंगच्या उपकरणांचंही नुकसान झाल्याची माहिती आहे.
मुंबई अग्निशमन दल, पोलीस, बीएमसी वॉर्ड कंट्रोल आणि १०८ रुग्णवाहिका सेवा घटनास्थळी दाखल झाली. अग्निशमन दलाच्या जवानांनी तातडीने परिस्थिती नियंत्रणात आणली. दुपारी ४ वाजून ५५ मिनिटांपर्यंत आग पूर्णपणे विझवण्यात आली. सुदैवाने या दुर्घटनेत कोणतीही जीवितहानी किंवा दुखापत झाल्याचं समोर आलेलं नाही.
रणबीर कपूर की ‘रामायणम्’ के सेट पर लगी आग, गोरेगांव फिल्मसिटी में अफरा-तफरी। ‘पति पत्नी और पंगा 2’ और ‘हसल 5’ के सेट तक फैली लपटें
#Ramayana #Fire #PatiPatniAurPanga2 https://t.co/RWdEycfeMG — NBT Entertainment (@NBTEnt) October 5, 2026
या आगीचा परिणाम केवळ ‘रामायण’च्या सेटपुरता मर्यादित नसल्याची माहिती आहे. एमटीव्हीच्या ‘हसल ५’ आणि ‘पती, पत्नी और पंगा २’ या कार्यक्रमांचं चित्रीकरणही जवळच्या स्टुडिओमध्ये सुरू होतं.
प्राथमिक अहवालानुसार, आग सर्वप्रथम ‘पती, पत्नी और पंगा २’च्या सेटवर लागली आणि त्यानंतर ‘हसल ५’च्या सेटपर्यंत पोहोचल्याचं सांगितलं जात आहे. मात्र, या दोन्ही सेटचं नेमकं किती नुकसान झालं आहे, याबाबत अद्याप अधिकृत माहिती समोर आलेली नाही.
सोशल मीडियावर व्हिडीओ व्हायरल
आग लागल्यानंतरचे काही व्हिडीओ सोशल मीडियावर मोठ्या प्रमाणात शेअर होत आहेत. यामध्ये सेटमधून धूर निघताना आणि आगीच्या ज्वाला दिसत आहेत. या घटनेनंतर ‘रामायण’च्या सेटच्या सुरक्षेबाबतही चर्चा सुरू झाली आहे.
रणबीर कपूर आणि साई पल्लवी यांच्या प्रमुख भूमिका असलेला ‘रामायण’ हा नितेश तिवारी दिग्दर्शित बहुप्रतिक्षित चित्रपट आहे. चित्रपटाच्या भव्य सेट्स आणि निर्मितीमुळे हा प्रोजेक्ट आधीपासूनच चर्चेत आहे. अशातच सेटवर लागलेल्या आगीच्या घटनेमुळे चित्रपट पुन्हा चर्चेत आला आहे.
.png "Videos"){kind=small}
