(फोटो सौजन्य- सोशल मिडिया)
Ranbir Kapoor Ramayana: रणबीर कपूरचा बहुप्रतिक्षित ‘रामायण’ हा सध्या भारतीय चित्रपटसृष्टीतील सर्वात मोठ्या प्रोजेक्टपैकी एक मानला जात आहे. नितेश तिवारी दिग्दर्शित या चित्रपटाच्या पहिल्या भागाची प्रेक्षक आतुरतेने वाट पाहत आहेत. दरम्यान, चित्रपटाबाबत एक महत्त्वाची माहिती समोर आली आहे. ‘रामायण’ जगभरात एकाच आवृत्तीत प्रदर्शित होणार नसल्याचं सांगितलं जात आहे.
मीडिया रिपोर्ट्सनुसार, भारतात प्रदर्शित होणाऱ्या आवृत्तीपेक्षा चीनमध्ये रिलीज होणारी ‘रामायण’ची आवृत्ती जवळपास ३३ मिनिटांनी छोटी असू शकते. परदेशी प्रेक्षकांना लक्षात घेऊन निर्मात्यांनी चित्रपटाच्या दोन वेगवेगळ्या आवृत्त्या तयार करण्याचा निर्णय घेतल्याचं वृत्त आहे.
‘मिड-डे’च्या रिपोर्टनुसार, एका सूत्राने दिलेल्या माहितीनुसार, परदेशी प्रेक्षकांसाठी तयार करण्यात येणारी आवृत्ती भारतीय आवृत्तीपेक्षा सुमारे ३३ मिनिटांनी छोटी असेल. यामागचा उद्देश चित्रपटाचा वेग अधिक ठेवणे आणि परदेशी प्रेक्षकांना कथा सहज समजावी हा असल्याचं सांगितलं जात आहे.
भारतीय प्रेक्षकांसाठी मात्र ‘रामायण’ ही केवळ एक कथा नाही, तर श्रद्धा आणि संस्कृतीशी जोडलेला विषय आहे. त्यामुळे भारतात प्रदर्शित होणाऱ्या आवृत्तीत कथा, भावना, भक्ती आणि सांस्कृतिक संदर्भांना अधिक महत्त्व दिलं जाणार असल्याचं रिपोर्टमध्ये म्हटलं आहे.
रिपोर्टनुसार, चीनमध्ये हा चित्रपट ‘रामायण: द लीजेंड ऑफ द प्रिन्स’ या नावाने प्रदर्शित केला जाऊ शकतो. निर्मात्यांना या चित्रपटाच्या माध्यमातून चीनमध्ये भारतीय सिनेमांची लोकप्रियता पुन्हा वाढवण्याची अपेक्षा असल्याचं सांगितलं जात आहे.
यापूर्वी आमिर खानच्या ‘पीके’, ‘दंगल’, ‘सीक्रेट सुपरस्टार’ आणि ‘अंधाधुन’ यांसारख्या भारतीय चित्रपटांना चीनमध्ये चांगला प्रतिसाद मिळाला होता. त्यामुळे ‘रामायण’च्या माध्यमातून भारतीय चित्रपटांसाठी चीनमधील बाजारपेठ पुन्हा खुली करण्याचा प्रयत्न केला जात असल्याचं बोललं जात आहे.
परदेशातील अनेक प्रेक्षकांसाठी रामायणाची कथा तुलनेने नवीन असू शकते. त्यामुळे परदेशी आवृत्तीत अॅक्शन आणि व्हिज्युअल इफेक्ट्स (VFX) यावर अधिक भर दिला जाण्याची शक्यता आहे.
या आवृत्तीला एक भव्य अॅक्शन-फँटसी चित्रपट म्हणून सादर करण्याचा निर्मात्यांचा प्रयत्न असल्याचं सांगितलं जात आहे. चांगल्याचा वाईटावर विजय ही कथा जगभरातील प्रेक्षकांना आकर्षित करू शकते, अशी निर्मात्यांची अपेक्षा आहे.
नितेश तिवारी यांच्या दिग्दर्शनाखाली तयार होणाऱ्या या भव्य प्रोजेक्टमध्ये रणबीर कपूर भगवान रामाच्या भूमिकेत, तर साई पल्लवी सीतेच्या भूमिकेत दिसणार आहे. यश रावणाची भूमिका साकारत असून, सनी देओल हनुमानाच्या भूमिकेत दिसणार आहे.
चित्रपटाचं बजेट तब्बल ४,००० कोटी रुपये असल्याचं वृत्त आहे. ‘रामायण’च्या माध्यमातून भारतीय सिनेमाला जागतिक स्तरावर नवी ओळख मिळवून देण्याचा निर्मात्यांचा प्रयत्न आहे. आता हा भव्य चित्रपट भारतासह आंतरराष्ट्रीय बॉक्स ऑफिसवर किती कमाई करतो, हे पाहणं उत्सुकतेचं ठरणार आहे.
.png "Videos"){kind=small}
