मंगळवार, 27 ऑक्टोबर 2026
(फोटो सौजन्य- सोशल मीडिया)
Sai Pallavi Movie: दाक्षिणात्य अभिनेत्री साई पल्लवी तिच्या रामायण चित्रपटामुळे जोरदार चर्चेत आहे. या चित्रपटात ती माता सीतेची भूमिका साकारत आहे. या तिच्या भूमिकेचे सर्वत्र कौतुक होत असताना ती लवकरच ‘ओम: चैप्टर 1’ या बहुप्रतीक्षित चित्रपटातून प्रेक्षकांच्या भेटीला येणार आहे. या चित्रपटात ती पहिल्यांदाच एका दमदार पोलीस अधिकाऱ्याच्या भूमिकेत दिसणार असल्याची झलक समोर आली आहे. निर्मात्यांनी नुकताच तिचा टीझर प्रदर्शित केला असून, यात साई पल्लवी IPS अधिकारी नित्या रेड्डीच्या भूमिकेत पाहायला मिळत आहे.
साई पल्लवीने आपल्या सहजसुंदर अभिनयाने आणि प्रभावी स्क्रीन प्रेझेन्सने नेहमीच प्रेक्षकांची मनं जिंकली आहेत. आता खाकी वर्दीतला तिचा हा नवा अंदाज चाहत्यांची उत्सुकता वाढवणारा ठरत आहे. धनुष आणि ममूटी यांसारख्या दिग्गज कलाकारांची मांदियाळी असलेल्या या चित्रपटात साईची भूमिका नेमकी काय असेल, याबाबत निर्मात्यांनी अद्याप गुपित कायम ठेवलं आहे.
प्रत्येक भूमिकेत वेगळेपण जपणारी साई पल्लवी यावेळी पोलीस अधिकाऱ्याच्या भूमिकेत दिसणार आहे. नव्या टीझरमध्ये नित्या रेड्डी या व्यक्तिरेखेची झलक पाहायला मिळते. तिची देहबोली आणि पडद्यावरील उपस्थिती यामुळे ही भूमिका चित्रपटाच्या कथानकात महत्त्वाची ठरणार असल्याचे संकेत मिळतात. मात्र, नित्या रेड्डीच्या व्यक्तिरेखेचे कथानकातील नेमके स्थान काय असेल, हे अद्याप स्पष्ट झालेले नाही.
निर्मात्यांनी व्यक्त केला आनंद
साई पल्लवीच्या चित्रपटातील सहभागाबद्दल बोलताना आरटेक स्टुडिओजच्या निर्मात्या श्रद्धा अग्रवाल म्हणाल्या, “साई पल्लवी एक अप्रतिम अभिनेत्री आहे. तिच्या प्रत्येक भूमिकेतून दिसणारा प्रामाणिकपणा आम्हाला नेहमीच भावला आहे. नित्या रेड्डी ही चित्रपटातील एक महत्त्वाची व्यक्तिरेखा आहे आणि ही भूमिका साकारण्यासाठी साईपेक्षा उत्तम अभिनेत्री आम्हाला मिळूच शकली नसती. साई आमच्या चित्रपटाचा भाग आहे, याचा आम्हाला खूप आनंद आहे. प्रेक्षक तिला या भूमिकेत पाहतील, याची आम्ही आतुरतेने वाट पाहत आहोत.”
राजकुमार पेरियासामी यांच्या दिग्दर्शनाखाली तयार होत असलेल्या ‘ओम: चैप्टर 1’मध्ये साई पल्लवीसोबत धनुष, ममूटी, श्रीलीला आणि नसीरुद्दीन शाह हे कलाकार महत्त्वाच्या भूमिकांत दिसणार आहेत. आरटेक स्टुडिओज आणि वंडरबार फिल्म्स यांची निर्मिती असलेला हा चित्रपट अ‍ॅक्शन थ्रिलर असल्याचं सांगितलं जात आहे.
साई पल्लवीच्या नव्या व्यक्तिरेखेची झलक समोर आल्यानंतर चित्रपटाबद्दलची उत्सुकता आणखी वाढली आहे. २० नोव्हेंबर २०२६ रोजी हा चित्रपट जगभरातील चित्रपटगृहांत प्रदर्शित होणार असल्याची माहिती देण्यात आली आहे. त्यामुळे नित्या रेड्डीच्या भूमिकेत साई पल्लवीचा अभिनय पाहण्यासाठी चाहते उत्सुक आहेत.
Abhijeet Sawant: अभिजीत सावंत घेऊन येतोय ‘90’s बँड’; नव्वदीच्या गाण्यांची पुन्हा रंगणार मैफल!
