(फोटो सौजन्य- सोशल मीडिया)
Sanjay Dutt Statement: बॉलिवूड अभिनेता संजय दत्त सध्या त्याच्या एका वक्तव्यामुळे चर्चेत आहे. ‘शेखर टुनाइट’ या कार्यक्रमात संजय दत्तने “मला आता भारतात पूर्वीसारखी शांतता जाणवत नाही” असं वक्तव्य केलं होतं. त्याच्या या वक्तव्याची सोशल मीडियावर चर्चा सुरू झाली आणि त्यावरून वादही निर्माण झाला. आता संजय दत्तने या वक्तव्यावर स्पष्टीकरण दिलं आहे.
संजय दत्तने सोशल मीडिया अकाउंटवर एक निवेदन शेअर करत आपली भूमिका स्पष्ट केली. कार्यक्रमात त्याने जे काही बोललं ते पूर्वनियोजित आणि स्क्रिप्टचा भाग होतं, असं त्याने सांगितलं. कोणत्याही व्यक्ती, समुदाय किंवा संस्थेच्या भावना दुखावण्याचा, त्यांचा अपमान करण्याचा किंवा अनादर करण्याचा आपला हेतू नव्हता, असंही त्याने स्पष्ट केलं.
संजय दत्तने आपल्या पोस्टमध्ये म्हटलं की, त्या संभाषणाचा उद्देश केवळ हलकंफुलकं आणि विनोदी वातावरण निर्माण करणं हा होता. आपल्या वक्तव्याचा वेगळा अर्थ लावला गेला आणि आपले शब्द संदर्भाबाहेर घेतले गेले, असं त्याने म्हटलं आहे.
‘मुन्नाभाई’च्या ‘गांधीगिरी’ची होती झलक
संजय दत्तने पुढे सांगितलं की, त्याच्या वक्तव्यामागची भावना ‘मुन्नाभाई’सारख्या चित्रपटांमधील विनोद आणि उपहासाच्या शैलीशी संबंधित होती. विशेषतः ‘गांधीगिरी’च्या संकल्पनेतून प्रेम, आपलेपणा, एकता आणि सदिच्छा यांचा संदेश देण्याचा उद्देश असल्याचं त्याने स्पष्ट केलं.
कार्यक्रमात संजय दत्तला देशाचा पंतप्रधान असल्याची कल्पना करून काही मिनिटं लोकांना संबोधित करण्यास सांगण्यात आलं होतं. त्यावेळी त्याने ‘मुन्नाभाई’च्या शैलीत उपहासात्मक भाषण केलं.
या भाषणादरम्यान संजय दत्तने भारतातील प्रेम, शांतता आणि पाहुणचाराचा उल्लेख केला होता. “मला आता माझ्या देशात तीच शांतता जाणवत नाही,” असं तो म्हणाला होता. तसेच पूर्वीचे दिवस पुन्हा यावेत, अशी प्रार्थना करत असल्याचंही त्याने म्हटलं होतं.
मात्र, या वक्तव्याचा वेगळा अर्थ घेतला गेल्याचं संजय दत्तने आपल्या स्पष्टीकरणात म्हटलं आहे.
मराठीत बोलण्यावरूनही झाला होता वाद
दरम्यान, संजय दत्तच्या आणखी एका वक्तव्याचीही अलीकडे चर्चा झाली होती. एका कार्यक्रमात त्याला मराठीत बोलण्यास सांगण्यात आलं होतं. परिवहन मंत्री प्रताप सरनाईक यांनीही त्याला मराठीत बोलण्याचा आग्रह केला.
त्यावर संजय दत्तने आपण येरवडा तुरुंगात सहा वर्षं घालवली, तरीही मराठी शिकलो नाही, असं मिश्कीलपणे म्हटलं होतं. त्याचा हा व्हिडीओ सोशल मीडियावर व्हायरल झाल्यानंतर नेटकऱ्यांमध्ये संमिश्र प्रतिक्रिया पाहायला मिळाल्या. काहींनी त्याच्या उत्तराचं कौतुक केलं, तर काहींनी त्यावर टीका केली.
आता ‘भारतात शांतता नाही’ या वक्तव्यावर संजय दत्तने दिलेल्या स्पष्टीकरणानंतर या प्रकरणाची चर्चा पुन्हा एकदा सुरू झाली आहे.
.png "Videos"){kind=small}
