शुक्रवार, 23 ऑक्टोबर 2026
(फोटो सौजन्य- सोशल मीडिया)
The Traitors 2 Winner: करण जोहरच्या लोकप्रिय रिॲलिटी शो ‘द ट्रेटर्स’च्या दुसऱ्या सीझनचा ग्रँड फिनाले ३ सप्टेंबर रोजी पार पडला. या सीझनमध्ये क्रिस्टल डिसूझा आणि रिदा थराना यांनी आपल्या रणनीतीच्या जोरावर बाजी मारत विजेतेपद पटकावलं. दोघींना ट्रॉफीसोबत तब्बल ६६ लाख रुपयांची बक्षीस रक्कम मिळाली.
‘द ट्रेटर्स २’मध्ये क्रिस्टल डिसूझा आणि रिदा थराना यांनी सुरुवातीपासूनच एकमेकींना साथ दिली. इतर स्पर्धकांना आपल्या रणनीतीने मात देत दोघींनी अंतिम फेरीपर्यंत मजल मारली.
विशेष म्हणजे, अंतिम टप्प्यात क्रिस्टलकडे रिदाला बाद करून एकटीने संपूर्ण बक्षीस रक्कम जिंकण्याची संधी होती. मात्र, तिने रिदाला धोका न देता तिच्यासोबत राहण्याचा निर्णय घेतला. त्यामुळे दोघीही संयुक्त विजेत्या ठरल्या.
मल्लिका शेरावतलाही क्रिस्टलने दाखवला बाहेरचा रस्ता
या सीझनमध्ये अभिनेत्री मल्लिका शेरावतचाही सहभाग होता. मात्र, क्रिस्टलच्या रणनीतीमुळे मल्लिकेला लवकरच शोमधून बाहेर पडावं लागलं.
अंतिम मिशनच्या आधी क्रिस्टल आणि रिदाने मल्लिका शेरावतला गेममधून बाद केलं. त्यानंतर दलीप ताहिल, शालिनी पासी, साहिल सलाथिया, रिदा आणि क्रिस्टल हे अंतिम फेरीतील स्पर्धक उरले.
उंटांवरील पिशव्यांमधून शोधायच्या होत्या सोन्याच्या विटा
अंतिम स्पर्धकांसमोर एक आव्हानात्मक मिशन ठेवण्यात आलं होतं. उंटांवर ठेवलेल्या पिशव्यांमधून सोन्याच्या विटा शोधून बक्षीस रक्कम वाढवायची होती.
या टास्कच्या आधी एकूण बक्षीस रक्कम ४८ लाख ४० हजार रुपये होती. अंतिम स्पर्धकांनी या मिशनमध्ये आणखी १७ लाख ६० हजार रुपये जमा केले. त्यामुळे शोची अंतिम बक्षीस रक्कम थेट ६६ लाख रुपये झाली.
यानंतर ‘सर्कल ऑफ डाऊट’ हा टास्क पार पडला. या टास्कदरम्यान साहिल सलाथिया आणि दलीप ताहिल यांच्यात जोरदार वाद झाला. दलीप यांनी इतर स्पर्धकांबद्दल केलेल्या काही वक्तव्यांवर शालिनी पासी यांनीही नाराजी व्यक्त केली.
यानंतर क्रिस्टलने आपल्या रणनीतीचा वापर करत इतर स्पर्धकांना दलीप ताहिल यांच्याविरोधात मतदान करण्यासाठी तयार केलं. अखेर दलीप यांना गेममधून बाहेरचा रस्ता दाखवण्यात आला.
अंतिम चार स्पर्धक म्हणून शालिनी पासी, साहिल सलाथिया, क्रिस्टल डिसूझा आणि रिदा थराना निश्चित झाले. त्यानंतर त्यांच्यासमोर शेवटचा आणि अत्यंत महत्त्वाचा गेम ठेवण्यात आला.
प्रत्येक स्पर्धकाकडे एक पेटी होती. त्यांना ‘शंका’ किंवा ‘विश्वास’ यापैकी एका पाऊचची निवड करायची होती. सर्वांनी ‘विश्वास’ निवडल्यास गेम तिथेच संपणार होता. मात्र, एकाने जरी ‘शंका’ निवडली, तर पुढची फेरी सुरू होऊन एका खेळाडूला मतदानाच्या माध्यमातून बाहेर काढण्याची संधी मिळणार होती.
हा खेळ दोन स्पर्धक शिल्लक राहेपर्यंत सुरू राहिला. पहिल्याच फेरीत सर्वांनी ‘शंका’ निवडली आणि मतदानानंतर साहिल सलाथिया यांना शोमधून बाहेर जावं लागलं.
फिनालेमध्ये क्रिस्टल डिसूझाने आपल्या रणनीतीने सर्वांना आश्चर्यचकित केलं. तिच्याकडे रिदाला गेममधून बाहेर काढून एकटीने संपूर्ण बक्षीस रक्कम जिंकण्याची संधी होती. मात्र, तिने रिदावर विश्वास ठेवत तिची साथ कायम ठेवली.
अखेर क्रिस्टल डिसूझा आणि रिदा थराना ‘The Traitors 2’च्या संयुक्त विजेत्या ठरल्या आणि दोघींनी मिळून ६६ लाख रुपयांची बक्षीस रक्कम जिंकली.
