( फोटो सौजन्य- सोशल मिडिया)
Toxic OTT Release: साऊथ सिनेमातील दिग्गज अभिनेता यशच्या ‘टॉक्सिक: ए फेयरीटेल फॉर ग्रोन-अप्स’ या सिनेमाची प्रेक्षक आतुरतेने वाट पाहत होते. ‘केजीएफ: चॅप्टर 2’नंतर यश मोठ्या पडद्यावर परतत असल्याने या सिनेमाकडून मोठ्या अपेक्षा होत्या. मात्र, रिलीज झाल्यानंतर या अपेक्षा काहीशा फोल ठरल्याचं पाहायला मिळालं. सिनेमाला बॉक्स ऑफिसवर अपेक्षित यश मिळवता आलं नाही. आता थिएटरनंतर ‘टॉक्सिक’ ओटीटीवर प्रदर्शित होण्यासाठी सज्ज झाला आहे.
गीतू मोहनदास दिग्दर्शित ‘टॉक्सिक’ हा पॅन इंडिया गँगस्टर अॅक्शन ड्रामा आहे. सिनेमाच्या प्रदर्शनानंतर त्याच्या कथानकावर संमिश्र प्रतिक्रिया पाहायला मिळाल्या. काही प्रेक्षकांनी सिनेमाचं कौतुक केलं, तर काहींनी कथा आणि मांडणीवर नाराजी व्यक्त केली. सोशल मीडियावरही सिनेमाबाबत संमिश्र प्रतिक्रिया उमटल्या.
आता ज्या प्रेक्षकांनी हा सिनेमा थिएटरमध्ये पाहिला नाही, त्यांचं लक्ष त्याच्या ओटीटी रिलीजकडे लागलं आहे. मीडिया रिपोर्ट्सनुसार, यश, नयनतारा, कियारा अडवाणी, हुमा कुरेशी, तारा सुतारिया आणि रुक्मिणी वसंत यांच्या प्रमुख भूमिका असलेला ‘टॉक्सिक’ 25 सप्टेंबर 2026 रोजी ZEE5 वर स्ट्रीम होण्याची शक्यता आहे.
123Teluguच्या रिपोर्टनुसार, ‘टॉक्सिक: ए फेयरीटेल फॉर ग्रोन-अप्स’चा ओटीटी प्रीमियर 25 सप्टेंबरला होण्याची अपेक्षा आहे. मात्र, चित्रपटाच्या निर्मात्यांकडून किंवा संबंधित ओटीटी प्लॅटफॉर्मकडून अद्याप या तारखेची अधिकृत घोषणा करण्यात आलेली नाही. त्यामुळे ही रिलीज डेट अंतिम आहे, असं सध्या निश्चितपणे म्हणता येणार नाही.
जर 25 सप्टेंबरची तारीख निश्चित झाली, तर सिनेमागृहात प्रदर्शित झाल्यानंतर अवघ्या महिन्याभरातच ‘टॉक्सिक’ ओटीटीवर पाहता येणार आहे. हा सिनेमा विविध भाषांमध्ये उपलब्ध होण्याची शक्यता आहे.
यशचा वेगळा अंदाज
‘टॉक्सिक’मध्ये यशने एका गँगस्टरची भूमिका साकारली आहे. स्वातंत्र्योत्तर काळातील गोव्याच्या पार्श्वभूमीवर या सिनेमाची कथा घडते. गुन्हेगारी विश्व, अॅक्शन, नाती, निष्ठा आणि नैतिकतेच्या संघर्षाभोवती सिनेमाचं कथानक फिरतं. यशच्या व्यक्तिरेखेचा प्रवास निष्ठा, नैतिकता आणि पश्चात्ताप यांच्यात अडकलेला पाहायला मिळतो.
गीतू मोहनदास यांनी या सिनेमाचं दिग्दर्शन केलं असून, यशसोबत नयनतारा, कियारा अडवाणी, हुमा कुरेशी, तारा सुतारिया आणि रुक्मिणी वसंत यांच्या महत्त्वपूर्ण भूमिका आहेत. आता थिएटरमध्ये अपेक्षित प्रतिसाद न मिळाल्यानंतर ओटीटीवर ‘टॉक्सिक’ला प्रेक्षकांकडून कसा प्रतिसाद मिळतो, याकडे सर्वांचं लक्ष लागलं आहे.
.png "Videos"){kind=small}
