शनिवार, 31 ऑक्टोबर 2026
( फोटो सौजन्य- सोशल मिडिया)
Genelia Deshmukh Ganeshotsav: गणेशोत्सवानिमित्त देशभरात सध्या उत्साहाचे वातावरण पाहायला मिळत आहे. सेलिब्रिटी मंडळीही आपल्या घरच्या बाप्पाचे मोठ्या भक्तिभावाने स्वागत करत आहेत. अभिनेत्री जिनिलिया देशमुखनेही सोशल मीडियावर आपल्या कुटुंबीयांसोबत गणेशोत्सव साजरा करतानाचे काही खास क्षण चाहत्यांसोबत शेअर केले आहेत. देशमुख कुटुंबीयांचा पारंपरिक अंदाज आणि घरच्या गणपतीची सुंदर सजावट या फोटोंमधून पाहायला मिळत आहे.
जिनिलियाची जाऊबाई दीपशिखा देशमुखने घरच्या गणपती बाप्पाच्या आगमनाचा व्हिडीओ सोशल मीडियावर शेअर केला आहे. या व्हिडीओमध्ये संपूर्ण देशमुख कुटुंब एकत्र येऊन बाप्पाची मनोभावे पूजा करताना दिसत आहे. उकडीच्या मोदकांचा नैवेद्य, बाप्पाची आरती आणि पारंपरिक पद्धतीने केलेली सजावट याची सुंदर झलक या व्हिडीओमध्ये पाहायला मिळत आहे.
गणपती बाप्पाच्या आगमनाच्या निमित्ताने रितेश देशमुख आणि त्याच्या दोन्ही मुलांनी ट्विनिंग लूक केला आहे. वडील आणि मुलांचा हा खास अंदाजही चाहत्यांच्या पसंतीस उतरला आहे.
गणेशोत्सवानिमित्त जिनिलियाने अतिशय सुंदर मराठमोळा लूक केला आहे. जिनिलिया आणि तिच्या सासूबाई वैशाली देशमुख यांनी यावेळी ट्विनिंग लूक केला होता. दोघींनीही पारंपरिक अंदाजात केलेलं हे फोटोशूट सध्या चर्चेचा विषय ठरत आहे.
यातील जिनिलिया आणि तिच्या सासूबाईंचा एक गोड फोटो विशेष लक्ष वेधून घेत आहे. या फोटोमध्ये सासू-सुनेची जोडी एकमेकींकडे पाहत मनसोक्त हसताना दिसत आहे. दोघींमधील प्रेमळ बॉण्डिंग या फोटोमधून पाहायला मिळत आहे.
जिनिलियाने गुलाबी आणि गोल्डन शेडची सुंदर साडी नेसली होती. गळ्यात पारंपरिक हार, साडीच्या पदरावर कमळाची फुलं, कानात मोत्याचे झुमके, केसात फूल आणि हातात हिरव्या बांगड्या असा तिचा पारंपरिक मराठमोळा लूक चाहत्यांचं लक्ष वेधून घेत आहे.
View this post on Instagram
जिनिलियाने या फोटोच्या कॅप्शनमध्ये लिहिलं, “बाप्पाचं आगमन झालेलं आहे. तुम्हाला व तुमच्या संपूर्ण परिवाराला देशमुख परिवाराकडून गणेश चतुर्थीच्या हार्दिक शुभेच्छा! बाप्पा मोरया रे!”
जिनिलियाच्या या पोस्टवर नेटकऱ्यांनी कौतुकाचा वर्षाव केला आहे. “वॉव मोदक”, “दादा-वहिनी खूप सुंदर फोटो आहेत”, “परफेक्ट फॅमिली”, “रितेशने खरंच मुलांना उत्तम संस्कार दिले आहेत”, “हीच खरी परंपरा फोटो”, “वहिनी अन् आईसाहेबांचा फोटो… लय भारी” अशा कमेंट्स चाहत्यांनी केल्या आहेत.
देशमुख कुटुंबीयांचा हा पारंपरिक अंदाज आणि सासू-सुनेमधील गोड बॉण्डिंग सोशल मीडियावर चाहत्यांचं लक्ष वेधून घेत आहे.
