Ayodhya Ram Temple : देशाच्या इतिहासातील ऐतिहासिक श्रीराम प्राणप्रतिष्ठा सोहळ्याकडे संपूर्ण जगाचे लक्ष्य लागले आहे. अयोध्या येथील राम मंदिरामध्ये प्राणप्रतिष्ठा करण्यात येणाऱ्या मूर्तीचा फोटो समोर आलेला आहे. काळ्या पाषाणतल्या मूर्तीचे फोटो माध्यमांमध्ये झळकले आहेत. म्हैसूरचे शिल्पकार अरुण योगीराज यांनी घडवलेल्या मूर्तीची प्राणप्रतिष्ठा होणार आहे. रामजन्मभूमी ट्रस्टचे सरचिटणीस चंपत राय यांनी सांगितलं की, तीनपैकी एका मूर्तीची प्राणप्रतिष्ठा होणार आहे.
मूर्तीची विधीवत पूजा
”रामलल्लाच्या उर्वरित दोन मूर्ती मंदिराच्या पहिल्या आणि दुसऱ्या मजल्यावर ठेवण्यात येतील. मंदिराचा पहिला मजला तयार होताच दुसऱ्या मूर्तीची विधीवत पूजा करुन प्रतिष्ठापना केली जाईल आणि त्यानंतर शेवटच्या मजल्यावर तिसरी मूर्ती स्थापित केली जाईल.”
अयोध्येतील राम मंदिरासाठी तीन कलाकारांनी तीन मूर्ती साकारल्या होत्या. राम जन्मभूमी मंदिर ट्रस्टने कर्नाटक येथील शिल्पकार अरुण योगीराज यांच्या मूर्तीची निवड केली. २२ जानेवारी रोजी मंदिरातील गर्भागृहात याच मूर्तीची प्राणप्रतिष्ठा होईल.
त्या मूर्तीचं पूर्ण छायाचित्र आता समोर
ज्या मूर्तीची २२ जानेवारी रोजी प्राणप्रतिष्ठा होणार आहे, त्या मूर्तीचं पूर्ण छायाचित्र आता समोर आलेलं आहे. काळ्या पाषाणातली ही मूर्ती अत्यंत सुंदर आहे. चेहऱ्यावर गोड हास्य आहे आणि भाळी टिळा लावलेले रामलल्ला मनमोहक दिसत आहेत.
रामलल्लाच्या तिनही मूर्ती मुंबईतील प्रसिद्ध कलाकार वासुदेव कामथ यांच्या रेखाटनावर आधारित आहेत. त्यांनी रामजन्मभूमी ट्रस्टला रामलल्लाचे पेन्सिल स्केच सादर केले होते. त्यावर आधारित मूर्ती घडवण्यात आलेल्या आहेत.
