१५ ऑगस्टपूर्वी Delhi High Alert वर; इंडियन मुजाहिदीन, अल-कायदा, खलिस्तानी संघटनांशी संबंधित १९ मोस्ट वाँटेड दहशतवाद्यांचे पोस्टर

Delhi High Alert: स्वातंत्र्यदिनाच्या पार्श्वभूमीवर दिल्लीमध्ये सुरक्षा व्यवस्था अधिक कडक करण्यात आली आहे. गुप्तचर यंत्रणांकडून मिळालेल्या इनपुटनंतर दिल्ली पोलिसांनी इंडियन मुजाहिदीन, अल-कायदा आणि खलिस्तानी संघटनांशी संबंधित १९ वाँटेड दहशतवाद्यांचे पोस्टर सार्वजनिक ठिकाणी लावण्यास सुरुवात केली आहे.

• स्वातंत्र्यदिनापूर्वी दिल्ली पोलिसांची मोठी कारवाई
• १९ वाँटेड दहशतवाद्यांचा शोध, संवेदनशील भागांत सुरक्षा वाढवली
• रेल्वे स्थानक, मेट्रो, बाजारपेठांसह गर्दीच्या ठिकाणी कडेकोट बंदोबस्त

Delhi High Alert: भारताला स्वातंत्र्य मिळाले ते 15 ऑगस्ट 1947 रोजी… या दिवशी भारत ब्रिटीशांच्या गुलामगिरीतून मुक्त झाला. हा दिवस सर्व भारतीयांसाठी अभिमानाचा दिवस आहे. याचपार्श्वभूमीवर स्वातंत्र्यदिनाच्या पुर्वसंध्येला राजधानी दिल्लीमध्ये सुरक्षेचा स्तर वाढवण्यात आला आहे. गुप्तचर यंत्रणांकडून संभाव्य दहशतवादी धोक्याबाबत इनपुट मिळाल्यानंतर दिल्ली पोलिसांनी विशेष खबरदारी घेतली आहे. याच पार्श्वभूमीवर १९ वाँटेड दहशतवाद्यांचे पोस्टर सार्वजनिक ठिकाणी लावण्यात येत आहेत. ही माहिती ११ ऑगस्ट २०२६ रोजी प्रसिद्ध झालेल्या अहवालात देण्यात आली आहे.

Delhi High Court On Jantar Mantar: ‘जंतर मंतर येथील आंदोलनस्थळ बंदच का करत नाही?’ उच्च न्यायालयाचा केंद्राला सवाल

१९ दहशतवाद्यांचे तीन मॉड्यूल

दिल्ली पोलिसांनी या १९ जणांना तीन गटांमध्ये विभागले आहे.

१. इंडियन मुजाहिदीन – ५ जण
इकबाल भटकल, रियाज भटकल, जुनैद अहमद, मोहम्मद खालिद आणि मोहसिन चौधरी यांचा या यादीत समावेश असल्याचे वृत्त आहे. इंडियन मुजाहिदीनचे नाव भारतातील अनेक बॉम्बस्फोटांच्या तपासात समोर आले आहे.

२. अल-कायदा – ६ जण
मोहम्मद शरजील अख्तर, मोहम्मद रेहान, अबू सूफियान, सैयद मोहम्मद आर्शियान, मोहम्मद शहीद फैजल उर्फ उस्ताद आणि मोहम्मद उमर या सहा जणांची नावे या मॉड्यूलमध्ये देण्यात आली आहेत.

३. खलिस्तानी संघटनांशी संबंधित – ८ जण
वाधवा सिंह बब्बर, पुरुषोत्तम सिंह पम्मा, हरविंदर सिंह रिंदा, गुरमीत सिंह बग्गा, भूपेंद्र सिंह भिंडा, रणजीत सिंह, परमजीत सिंह पम्मा आणि अर्शदीप सिंह डाला यांचा या गटात समावेश असल्याचे वृत्त आहे.

संवेदनशील ठिकाणी विशेष बंदोबस्त

दिल्लीतील रेल्वे स्थानके, बसस्थानके, मेट्रो स्थानके, बाजारपेठा, ऐतिहासिक स्थळे आणि गर्दीच्या भागांमध्ये सुरक्षा वाढवण्यात आली आहे. अतिरिक्त पोलीस आणि सुरक्षा दल तैनात करण्यासोबतच सीसीटीव्ही निगराणी, वाहन तपासणी आणि संशयित व्यक्तींची तपासणी यावर भर दिला जात आहे.

नागरिकांना पोलिसांचे आवाहन

दिल्ली पोलिसांनी नागरिकांना सतर्क राहण्याचे आवाहन केले आहे. संशयास्पद व्यक्ती, वस्तू किंवा हालचाल आढळल्यास स्वतः कारवाई न करता तातडीने पोलिसांना किंवा संबंधित सुरक्षा यंत्रणांना माहिती द्यावी, असे आवाहन करण्यात आले आहे. ही खबरदारी स्वातंत्र्यदिनाच्या कार्यक्रमांच्या पार्श्वभूमीवर घेण्यात येत आहे.

‘मी मरणार नाही..’; व्हिडीओ जारी करत Sonam Wangchuk यांचे देशाला आवाहन