पुण्यातील बलात्कार प्रकरणावर माजी सरन्यायाधीश DY चंद्रचूड यांची प्रतिक्रिया; म्हणाले, “फक्त शिक्षा…”
“निर्भया बलात्कार प्रकरणानंतर आपल्याकडे विशेषतः कायद्यात अनेक बदल करण्यात आले. मात्र केवळ कायद्याच्या माध्यमातून आणि शिक्षा करून आपण अशा घटना कमी करू शकत नाही. कायद्याची अंमलबजावणी झाली पाहिजे मात्र, कायद्याशिवायही समाजावर देखील मोठी जबाबदारी आहे. महिला नोकरी, शिक्षणासाठी घरापासून दूर जाऊन काम करत आहेत. त्यामुळे प्रत्येक स्तरावर महिलांसाठी तयार करण्यात आलेल्या कायद्यांची योग्य पद्धतीने अंमलबजावणी झाली पाहिजे, जेणेकरून महिला जिते जातील तिथे त्यांना सुरक्षित वाटेल.”, असं मत सर्वोच्च न्यायालयाचे माजी सरन्यायाधीश DY चंद्रचूड यांनी पुण्यात झालेल्या बलात्काराच्या घटनेवर व्यक्त केलं.
ते पुढे म्हणाले की, “असं उदाहरण समोर आल्यानंतर त्याच्या विरोधात कठोरात कठोर कारवाई करणे , योग्य पद्धतीने तपास होणे, लवकरात लवकर सुनावणी होऊन शिक्षा होणे हे खूप गरजेचे आहे. न्यायव्यवस्था आणि पोलिसांची यामध्ये मोठी जबाबदारी आहे. प्रत्येक स्तरावर आपण यावर लक्ष देऊन विचार केला पाहिजे, जेणेकरून आपण एक नवीन समाजाकडे पुढे जाऊ शकू, जेथे आपल्या समाजातील अर्धा हिस्सा असलेल्या महिला सुरक्षितपणे नोकरी, शिक्षण अशी प्रत्येक गोष्ट करू शकतील,” असंही त्यांनी म्हटलं आहे.
पुण्यातील स्वारगेट बसस्थानकात उभ्या असलेल्या शिवशाही बसमध्ये एका २६ वर्षीय महिलेवर बलात्कार झाल्याची घटना समोर आली आहे. या प्रकरणातील आरोपीला अटक करण्यासाठी १३ पथके स्थापन करण्यात आली आहेत. इतकेच नाही तर पोलिसांनी आरोपीची माहिती देणाऱ्यासाठी १ लाख रुपायांचे बक्षीस देखील जाहीर केले आहे. या धक्कादायक प्रकारानंतर राजकीय वर्तुळातून संतप्त प्रतिक्रिया दिल्या जात आहेत. यादरम्यान भारताचे माजी सरन्यायाधीश डी. वाय. चंद्रचूड यांनी देखील या प्रकरणाबद्दल प्रतिक्रिया दिली आहे.
पुण्यातील स्वारगेट एसटी बस स्थानकातील शिवशाही बसमध्ये एका २६ वर्षीय तरुणीवर बलात्कार झाल्याची घटना बुधवारी सकाळी उजेडात आली. या प्रकारानंतर सर्वपक्षीय नेत्यांनी संताप व्यक्त केला असून पोलिसांनीही आरोपीच्या शोधासाठी १३ पथके तैनात केली आहेत. आरोपी सराईत गुन्हेगार होता, त्याच्यावर याआधी अनेक गुन्हे दाखल असून तो सध्या जामिनावर असल्याची माहिती पोलिसांनी दिली आहे. आरोपीचा शोध घेण्याकरता पुणे पोलिसांनी १ लाखांचे बक्षिसही जाहीर केलेअसून त्याच्या कुटुंबियांची चौकशी सुरू करण्यात आली आहे. दरम्यान, या प्रकरणात स्वारगेट स्थानकात तैनात असलेल्या २३ सुरक्षा रक्षकांचं निलंबन करण्यात आलं आहे.
.png "Videos"){kind=small}
