सोमवार, 9 नोव्हेंबर 2026
देशात गॅस पुरवठा सुरळीत! रशिया-ऑस्ट्रेलियातून आयातीचा वेग वाढला (Photo Credit- X)
मंत्रालयाने दिलेल्या माहितीनुसार, घरगुती पीएनजी (PNG) आणि वाहतुकीसाठी लागणाऱ्या सीएनजीचा (CNG) पुरवठा १००% खात्रीशीर असून त्यात कोणतीही कपात केलेली नाही. सरकारने व्यावसायिक एलपीजी ग्राहकांना शक्य तिथे सीएनजीचा वापर करण्याचे आवाहन केले आहे. यासाठी अनेक कंपन्यांनी विशेष सवलती (Incentives) जाहीर केल्या आहेत. जे राज्य पीएनजी नेटवर्कच्या विस्तारासाठी मदत करतील, त्यांना १०% अतिरिक्त कमर्शियल एलपीजी देण्याचे आश्वासन केंद्र सरकारने दिले आहे. गेल्या दोन आठवड्यांत सव्वा लाख नवीन गॅस कनेक्शन्स देण्यात आली आहेत.
जागतिक युद्धाच्या परिस्थितीमुळे एलपीजीच्या जागतिक बाजारपेठेवर परिणाम झाला असला, तरी भारतात वितरणाबाबत कोणतीही कमतरता नाही. सध्या एलपीजीचे ऑनलाइन बुकिंग ९४% पर्यंत पोहोचले असून ८३% पेक्षा जास्त डिलिव्हरी ‘डिलिव्हरी ऑथेंटिकेशन कोड’ (DAC) द्वारे केली जात आहे. “घाबरून जाऊन (Panic Booking) जास्तीचे सिलेंडर बुक करण्याचे प्रमाण कमी झाले असून काल एका दिवसात ५७,००० रिफिल बुकिंग झाले आहेत,” असे सुजाता शर्मा यांनी स्पष्ट केले. तसेच १७ राज्यांनी व्यावसायिक एलपीजीसाठी वाटप आदेश जारी केले आहेत.
India Oil Strategy : इंधन दर वाढीच्या संकटात भारताला दिलासा; रशियाकडून तेल खरेदी वाढली
दुसरीकडे, परराष्ट्र मंत्रालयाचे संयुक्त सचिव असीम महाजन यांनी आखाती देशांतील भारतीयांच्या प्रवासाबाबत महत्त्वाची माहिती दिली. काही देशांमध्ये तांत्रिक निर्बंध असले तरी विमान वाहतूक वेगाने सुधारत आहे. २८ फेब्रुवारीपासून आतापर्यंत सुमारे २,८०,००० भारतीय मायदेशी परतले आहेत.
इराकच्या समुद्रकिनारी अपघातग्रस्त झालेल्या ‘एमटी सेफसी विष्णू’ (MT SAFESEA VISHNU) जहाजातील १५ भारतीय क्रू सदस्यांची सुटका करण्यात आली आहे. हे सर्व खलाशी इराक सोडून भारताकडे येण्यासाठी निघाले आहेत. या दुर्घटनेत दुर्दैवाने प्राण गमावलेल्या एका भारतीय नागरिकाचा पार्थिव देह परत आणण्यासाठी इराक प्रशासनाशी सातत्याने संपर्क सुरू असल्याचे परराष्ट्र मंत्रालयाने सांगितले.
