मंडी: लोकसभा निवडणूक जवळ येऊ लागल्यामुळे भाजप जोरदार प्रचार करत आहेत. हिमाचल प्रदेशामधील मंडी या लोकसभा मतदार संघातून अभिनेत्री कंगना रणौत ही भाजपच्या तिकीटावर निवडणूक लढवणार आहे. नुकताच तिने आपल्या मतदारसंघात रोड शो केला. यावेळी जनतेशी संवाद साधताना तिने विरोधकांवरही जोरदार निशाणा साधला. “मंडीतील लोकांना या गोष्टीचा अभिमान आहे की त्यांची मुलगी आणि बहीण आता निवडणुकीच्या रिंगणात उभी आहे. विकास हाच भाजपचा मुद्दा आहे आणि मंडीमधील लोक हे दाखवून देतील की त्यांच्या मनात काय आहे”, असे आवाहन कंगना राणौत हिने केले.
कंगना राणौत हिने राजकारणात एन्ट्री केल्यानंतर काँग्रेस नेत्या सुप्रिया श्रीनेत यांनी कंगनाविषयी जी वादग्रस्त पोस्ट शेअर केली होती. याबद्दल देखील कंगनाने रोड शोमध्ये चोख उत्तर दिले. रोड शो दरम्यान कंगना म्हणाले, “जे लोक तुमच्या मुलीची किंमत ठरवतात, ते कधीच तुमचे होऊ शकत नाहीत. जे प्रभू श्रीराम यांचे होऊ शकत नाहीत, ते तुमचे कधीच होऊ शकत नाही”, अशा शब्दांत तिने टोला लगावला. मंडी काय आहे, हे इथले लोकच सांगतील. मतदान करताना लोक काँग्रेसला चोख उत्तर देतील, असे कंगना या रोड शोदरम्यान म्हणाली.
पुढे कंगना म्हणाली, “काँग्रेसला मंडीमधून माझी उमेदवारी मान्य नाही. म्हणूनच ते खालच्या पातळीचं राजकारण करत आहेत. त्यांचे नेते राहुल गांधी हे हिंदूंमधील शक्ती नष्ट करण्याबद्दल बोलतात. त्यांचे प्रवक्ते मंडीमधील महिलांबद्दल आक्षेपार्ह टिप्पणी करतात. मंडी हे नाव ऋषी मांडव यांच्या नावावरून मिळालं आहे. याठिकाणी ऋषी पराशर यांनी तपश्चर्या केली होती. अशा मंडीमधील महिलांबद्दल ते आक्षेपार्ह टिप्पणी करतात. त्यांच्याकडून यापेक्षा वेगळी काय अपेक्षा असेल”, अशा शब्दांत कंगनाने काँग्रेसवर जोरदार निशाणा साधला. मला हिरोइन किंवा स्टार समजू नका. मला तुमचीच बहीण किंवा मुलगी समजा, अशा शब्दांत अभिनेत्री व भाजप उमेदवार कंगना रणौत हिने मतदार संघातील लोकांना भावनिक आवाहन केले.
