Assam Bus Accident: आसाममध्ये काळाचा घाला! भरधाव मिनी बस कंटेनर ट्रकवर आदळली; २३ प्रवाशांचा मृत्यू, अनेक जखमी

Assam Bus Accident: आसाममधील काझीरंगा राष्ट्रीय उद्यानाजवळ मिनी बस आणि कंटेनर ट्रक यांच्यात भीषण अपघात झाला. गोलाघाट जिल्ह्यातील राष्ट्रीय महामार्ग ७१५ वर रंगाजन परिसरात झालेल्या या अपघातात २३ जणांचा मृत्यू झाला असून अनेकजण जखमी झाले आहेत. जखमींना जवळच्या रुग्णालयात दाखल करण्यात आले...

• काझीरंगाजवळ भीषण अपघात!
• मिनी बस आणि कंटेनर ट्रकची समोरासमोर धडक
• २३ जणांचा मृत्यू

Assam Bus Accident: आसाममधील काझीरंगा राष्ट्रीय उद्यानाजवळ शुक्रवारी भीषण रस्ते अपघाताची घटना समोर आली. या प्रवासी मिनी बस आणि कंटेनर ट्रक यांच्यात समोरासमोर जोरदार धडक होऊन दुर्घटनेत २३ जणांचा मृत्यू झाला आहे. या अपघातात अनेक प्रवासी जखमी झाले असून मृतांचा आकडा वाढण्याची शक्यता पोलिसांनी व्यक्त केली आहे. अपघातानंतर घटनास्थळी एकच गोंधळ उडाला. पोलीस आणि बचाव पथकांकडून मदतकार्य सुरू करण्यात आले.(Assam Bus Accident)

राष्ट्रीय महामार्ग ७१५ वर भीषण दुर्घटना

गोलाघाट जिल्ह्यातील राष्ट्रीय महामार्ग ७१५ वर कोहोरा रेंजअंतर्गत हातीकुली टी इस्टेटजवळील रंगाजन परिसरात हा अपघात झाला. प्रवासी मिनी बसची समोरून येणाऱ्या कंटेनर ट्रकशी जोरदार धडक झाली. धडक इतकी भीषण होती की बसमधील अनेक प्रवासी गंभीर जखमी झाले.

Sheikh Hasina : चीनसोबतच्या लढाऊ विमान करारावर शेख हसीनांचे प्रश्नचिन्ह; म्हणाल्या, आर्थिक क्षमता तपासा

गोलाघाटचे जिल्हाधिकारी बिस्वजीत फुकन यांनी दिलेल्या माहितीनुसार, जखमींना उपचारासाठी जवळच्या रुग्णालयात दाखल करण्यात आले आहे. वरिष्ठ पोलीस अधीक्षक स्वप्ननील डेका यांनी सुरुवातीच्या माहितीनुसार २३ जणांचा मृत्यू झाल्याचे सांगितले. बचाव पथकाकडून बसमधून मृतदेह बाहेर काढण्याचे काम सुरू होते. बसमध्ये एकूण किती प्रवासी होते, याची माहिती तातडीने उपलब्ध होऊ शकली नव्हती.

मुख्यमंत्री हिमंत बिस्वा सरमा यांच्याकडून शोक व्यक्त

या भीषण दुर्घटनेबद्दल आसामचे मुख्यमंत्री हिमंत बिस्वा सरमा यांनी तीव्र दुःख व्यक्त केले. या दुर्घटनेमुळे मोठा धक्का बसल्याचे त्यांनी म्हटले. मृतांच्या कुटुंबीयांप्रति त्यांनी संवेदना व्यक्त केल्या असून, या कठीण प्रसंगी संपूर्ण आसाम त्यांच्या पाठीशी असल्याचे सांगितले.जखमींना कोणताही विलंब न करता सर्वोत्तम वैद्यकीय सुविधा मिळाव्यात, याला सरकारचे सर्वोच्च प्राधान्य असल्याचे मुख्यमंत्र्यांनी स्पष्ट केले. जखमी लवकर बरे व्हावेत आणि मृतांच्या कुटुंबीयांना या दुःखातून सावरण्याचे बळ मिळावे, अशी प्रार्थनाही त्यांनी केली.

मंत्री अतुल बोरा घटनास्थळी दाखल

अपघाताची माहिती मिळताच आसामचे पंचायत आणि ग्रामीण विकास मंत्री तसेच स्थानिक आमदार अतुल बोरा घटनास्थळी दाखल झाले. त्यांनी मदत आणि बचावकार्याचा आढावा घेतला. जखमींना कोहोरा मॉडेल रुग्णालयात दाखल करण्यात आले, तर गंभीर जखमींना पुढील उपचारांसाठी जोरहाट मेडिकल कॉलेज आणि रुग्णालयात पाठवण्यात आले.

भरधाव वेगामुळे अपघात झाल्याचा प्राथमिक अंदाज

गोलाघाटचे वरिष्ठ पोलीस अधीक्षक स्वप्ननील डेका यांच्या माहितीनुसार, मिनी बस वेगाने जात होती. काझीरंगा राष्ट्रीय उद्यानाच्या परिसरात लागू असलेल्या वेगमर्यादेचे उल्लंघन झाल्याचा प्राथमिक अंदाज आहे. भरधाव वेगामुळे चालकाचे बसवरील नियंत्रण सुटले आणि बस समोरून येणाऱ्या कंटेनर ट्रकला धडकली असावी, अशी शक्यता पोलिसांनी व्यक्त केली आहे. मात्र, अपघाताचे नेमके कारण अद्याप स्पष्ट झालेले नाही. पोलीस या प्रकरणाचा तपास करत आहेत.

मध्य प्रदेशातील सागरमध्येही भीषण अपघात; चौघांचा मृत्यू

दरम्यान, मध्य प्रदेशातील सागर जिल्ह्यात राष्ट्रीय महामार्ग ४४ वर देवरी पोलीस ठाण्याच्या हद्दीतील गोपालपुरा परिसरात ट्रक आणि एसयूव्हीची समोरासमोर धडक झाली. या अपघातात एसयूव्हीमधील चार जणांचा जागीच मृत्यू झाला, तर अन्य पाच जण गंभीर जखमी झाले. सर्व प्रवासी भैंसा गावातील रहिवासी होते. अमावस्येनिमित्त नर्मदा स्नानासाठी ते बर्मन येथे जात असताना हा अपघात झाला. धडक इतकी जोरदार होती की एसयूव्हीचा चक्काचूर झाला. वाहनात अडकलेल्या प्रवाशांना बाहेर काढण्यासाठी गाडी कापावी लागली.

Kulgam Terror Attack : कुलगाम पुन्हा हादरलं, दिवाळीच्या तोंडावर दहशतवाद्यांचा जवानांवर गोळीबार; तिघे जखमी, एकाची प्रकृती गंभीर