नवी दिल्ली : लोकसभा निवडणुकीत भाजपला सर्वाधिक जागा मिळाल्या आहेत. त्यानुसार, आता भाजपप्रणित एनडीएकडून आज (दि.9) सरकार स्थापन केले जाणार आहे. भाजपचे ज्येष्ठ नेते नरेंद्र मोदी (Narendra Modi) तिसऱ्यांदा पंतप्रधानपदाची शपथ घेणार आहेत. आज सायंकाळी 7.15 वाजता राष्ट्रपती भवन येथे त्यांचा शपथविधी सोहळा पार पडणार आहे.
राष्ट्रपती द्रौपदी मुर्मू या नरेंद्र मोदी आणि इतर नेत्यांना पद आणि गोपनीयतेची शपथ देतील. सूत्रांकडून मिळालेल्या माहितीनुसार, मोदी सरकाचा मंत्रिपदाचा फॉर्म्युला ठरला आहे. या फॉर्म्युल्यानुसार मंत्रिमंडळात भाजपाचे एकूण 18 मंत्री असणार आहेत. तर एनडीए घटक पक्षांना एकूण 18 मंत्रिपदे दिली जाणार आहेत. त्यात सात कॅबिनेट तर 11 राज्यमंत्री पदाचा समावेश असणार आहे.
टीडीपी आणि जेडीयूचे प्रत्येकी दोन मंत्री असतील तर शिवसेना, राष्ट्रवादी अजित पवार गट, एलजेपी, जेडीएस आणि हम पार्टीला प्रत्येकी एक मंत्रिपद दिले जाणार असल्याची माहिती सूत्रांकडून मिळत आहे. असे बोलल्या जात आहे की, गृह, अर्थ, संरक्षण आणि परराष्ट्र या महत्त्वाच्या खात्यांव्यतिरिक्त शिक्षण आणि संस्कृतीसारख्या भक्कम वैचारिक बाबी असलेली दोन मंत्रालये भाजपाकडे राहतील, तर मित्रपक्षांना पाच ते आठ कॅबिनेट पदे मिळू शकतात.
निमंत्रणानंतर काँग्रेस करणार विचार
पंतप्रधान नरेंद्र मोदी यांच्या शपथविधी सोहळ्यासाठी ‘इंडिया’ आघाडीच्या नेत्यांना अद्याप निमंत्रण मिळालेले नसून, निमंत्रण मिळाल्यानंतर त्याबाबत विचार केला जाईल, असे काँग्रेसने शनिवारी सांगितले.
प्रफुल्ल पटेलांना मंत्रिपदाची लॉटरी
शपथविधी सोहळ्यात राष्ट्रवादी काँग्रेसचे नेते प्रफुल्ल पटेलही कॅबिनेट मंत्रिपदाची शपथ घेणार आहेत. राज्यामध्ये शिवसेना शिंदे गट आणि राष्ट्रवादी अजित पवार गट यांच्या वाट्याला प्रत्येकी एक मंत्रिपद आले आहे. शिवसेना शिंदे गटाकडून खासदार धैर्यशिल माने, श्रीरंग बारणे, प्रतापराव जाधव आदी नेत्यांची नावे मंत्रिपदासाठी चर्चेत आहेत.
सहा देशांच्या प्रमुखांची हजेरी
मोदींच्या शपथविधी सोहळ्याला शेजारील देशातील प्रमुख नेते उपस्थित राहणार आहेत. यामध्ये बांगलादेशाच्या पंतप्रधान शेख हसीना, श्रीलंकेचे राष्ट्रपती रानिल विक्रमसिंघे, भूतानचे पंतप्रधान शेरिंग टोबगे, नेपाळचे पंतप्रधानही उपस्थित राहणार असल्याचे सांगण्यात येत आहे.
.png "Videos"){kind=small}
