Breast Cancer: स्तन कर्करोगाच्या ‘या’ लक्षणांकडे दुर्लक्ष करू नका, खूप उशीर होण्यापूर्वी स्वतःला वाचवा

बऱ्याचदा महिलांना स्तनाचा कॅन्सर झालाय हे कळतच नाही. त्याचे कारण म्हणजे लक्षणांकडे करण्यात येणारे दुर्लक्ष. एका विशिष्ट वयानंतर महिलांनी ‘या’ लक्षणांकडे दुर्लक्ष करू नये, जाणून घ्या

• देशभरात ब्रेस्ट कॅन्सरमध्ये वाढ
• कोणत्या लक्षणांकडे होतेय दुर्लक्ष 
• नक्की काय करावे 

देशभरात स्तनाच्या कर्करोगाचे प्रमाण वाढत चालले आहे. मात्र असे असूनही  या कर्करोगाबाबत आजही जागरूकतेचा अभाव दिसून येतो. स्तनाच्या कर्करोगाचे वेळीच निदान एखाद्याचा अमूल्य जीव वाचवू शकतो. या कर्करोगाची लक्षणे जाणून घेतल्यास महिलांना वेळीच उपचार करण्यास आणि खूप उशीर होण्यापूर्वी वैद्यकीय मदत घेण्यास मदत होऊ शकते. डॉ. मधुलिका सिंग, वरिष्ठ प्रसूती आणि स्त्रीरोग तज्ज्ञ, अंकुरा हॉस्पिटल फॉर वुमन अँड चिल्ड्रन, पुणे यांनी याबाबात सविस्तर माहिती दिली आहे. 

Breast Cancer पुन्‍हा होण्‍याचा धोका कमी करण्‍यासाठी 5 उपाय, तज्ज्ञांचा सल्ला

ब्रेस्ट कॅन्सर सर्वात सामान्य 

स्तनाचा कर्करोग हा जगभरातील महिलांमध्ये सर्वात सामान्य कर्करोगांपैकी एक आहे. जेव्हा स्तनातील असामान्य पेशी अनियंत्रितपणे वाढतात, तेव्हा एक गाठ तयार होते आणि कर्करोगास सुरूवात होते. याचे नेमके कारण माहित नसले तरी, वय, अनुवंशिकता, हार्मोनल बदल, चुकीची जीवनशैली, लठ्ठपणा आणि रेडिएशन एक्सपोजर यासारखे घटक धोका वाढवू शकतात. यशस्वी उपचार आणि पुनर्प्राप्तीमध्ये वेळीच निदान महत्त्वपूर्ण भूमिका बजावते, म्हणूनच सुरुवातीची लक्षणे ओळखणे अत्यंत गरजेचे आहे. 

लक्षणांची माहिती नसल्यामुळे दुर्लक्ष 

महिलांना या कर्करोगाच्या लक्षणांची फारशी माहिती नसते आणि त्यामुळे त्यांचे याकडे दुर्लक्ष होते. महिलांनी त्यांच्या स्तनांच्या आरोग्याची जबाबदारी घेणे आणि कोणतेही असामान्य बदल आढळून आल्यास त्वरीत डॉक्टरांना कळवणे गरजेचे आहे. निदानास विलंब झाला तर स्तनाचा कर्करोग जवळच्या लिम्फ नोड्स किंवा शरीराच्या इतर भागांमध्ये, जसे की फुफ्फुसं, हाडं किंवा यकृतामध्ये पसरू शकतो. त्यामुळे थकवा, तीव्र वेदना आणि अगदी तणावासारखी लक्षणे उद्भवू शकतात. यामुळे महिलेच्या जीवनमानावर परिणाम होऊ शकतो. शिवाय, प्रगत टप्प्यात शस्त्रक्रिया, केमोथेरपी किंवा रेडिएशन थेरपीची देखील आवश्यकता भासू शकते.

Breast Cancer सारख्या गंभीर आजारापासून शरीराचा बचाव करण्यासाठी आहारात करा ‘या’ पदार्थांचे सेवन, महिलांसाठी ठरेल गुणकारी

ही लक्षणे आढळल्यास करु नका दुर्लक्ष 

• स्तनात किंवा काखेत गाठ: हे सर्वात सामान्य आणि सुरुवातीचे लक्षण आहे आणि बहुतेकदा ते वेदनारहित असते परंतु स्पर्श केल्यास हाताला ही गाठ जाणवू शकते. म्हणून, या लक्षणाकडे दुर्लक्ष करू नका
• स्तनाच्या आकारात बदल: जर एक स्तन दुसऱ्या स्तनाच्या तुलनेत मोठा किंवा असमान दिसत असेल तर तो स्तनाचा कर्करोग असू शकतो. याकडे अजिबात दुर्लक्ष करु नका
• स्तनाग्रावाटे होणारा स्त्राव: कोणताही असामान्य स्त्राव आढळून आल्यास त्वरीत वैद्यकिय सल्ला घेणे गरजेचे आहे
• त्वचेतील बदल: स्तनाची त्वचा लालसर होणे, पुरळ येणे किंवा संत्र्याच्या सालीसारखी जाड होणे हे कर्करोगाचे लक्षण ठरु शकते
• स्तनाग्र आतल्या बाजूस वळणे: जर स्तनाग्र आतल्या बाजूने वळू लागले किंवा वेगळे दिसू लागले तर ते अंतर्निहित समस्येचे लक्षण असू शकते
• वेदना किंवा सूज: स्तन किंवा काखेत सतत वेदना किंवा सूज येणे जी काही केल्या कमी होत नाही त्यासाठी वैद्यकीय मदतीची आवश्यकता भासते.

महिलांनी दरमहा नियमितपणे स्वयं स्तन तपासणी करणे गरजेचे आहे आणि दरवर्षी नियमित स्तनांची वैद्यकिय तपासणी करावी, विशेषतः चाळीशीनंतर महिलांनी दरवर्षी स्तन तपासणी करावी आणि वरीलपैकी कोणतीही लक्षणं आढळल्यास वेळीच उपचार करावा