Diwali Eye Safety: दिवाळीच्या आंनदासोबतच डोळ्यांची सुद्धा घ्या काळजी! फटाक्यांपासून संरक्षणासाठी ‘या’ टिप्स करा फाॅलो

Diwali Eye Safety: दिवाळीचा आनंद साजरा करण्यासाठी दिव्यांची रोषणाई, सुंदर रांगोळ्या, फराळ आणि फटाक्यांची आतषबाजी केली जाते. पण या सगळ्यांमध्ये फटाके फोडताना डोळ्यांना इजा होणार नाही यांची योग्य ती काळजी घ्यावी. अन्यथा डोळ्यांना हानी पोहचू शकते.

Diwali Eye Safety: दिवाळी हा प्रकाशाचा, आनंदाचा आणि उत्साहाचा सण आहे. दिव्यांची रोषणाई, सुंदर रांगोळ्या, फराळ आणि फटाक्यांची आतषबाजी यामुळे दिवाळीचा आनंद द्विगुणित होतो. मात्र, या आनंदाच्या उत्सवात आपण आपल्या डोळ्यांच्या सुरक्षिततेकडे दुर्लक्ष करतो. फटाक्यांमुळे होणाऱ्या डोळ्यांच्या दुखापती या गंभीर स्वरूपाच्या असू शकतात आणि काही वेळा कायमस्वरूपी दृष्टी गमावण्याची वेळही येऊ शकते. याविषयी डॉ. श्रुती वासनिक, कन्सल्टंट ऑप्थॅल्मोलॉजिस्ट, (कॉर्निया, मोतीबिंदू आणि रिफ्रॅक्टिव्ह सेवा), कोकिलाबेन धीरूभाई अंबानी हॉस्पिटल, मुंबई यांनी सविस्तर माहिती दिली आहे. चला तर जाणून घेऊया. (फोटो सौजन्य – AI)

Diwali Skin Care: फटक्यांचा हानिकारक धूर त्वचा करेल निस्तेज! दिवाळीत त्वचेची घ्या ‘या’ पद्धतीने काळजी

फटाक्यांमुळे डोळ्यांना कोणत्या प्रकारच्या दुखापती होऊ शकतात?

• फटाक्यांच्या ठिणग्या, ज्वाला, धूर, रासायनिक पदार्थ आणि स्फोटामुळे निर्माण होणारे कण डोळ्यांना इजा पोहोचवू शकतात. यामुळे पुढील समस्या उद्भवू शकतात.
• डोळ्यांमध्ये जळजळ, लालसरपणा आणि पाणी येणे.
• डोळ्यांच्या पारदर्शक पडद्याला (कॉर्निया) इजा होणे.
• पापण्या आणि डोळ्यांच्या आजूबाजूच्या त्वचेला भाजणे.
• डोळ्याच्या आतील भागाला इजा होऊन रक्तस्राव होणे.
• डोळ्याच्या पडद्याला (रेटिना) इजा होणे.
• गंभीर दुखापतींमध्ये कायमस्वरूपी दृष्टी कमी होणे किंवा अंधत्व येणे, विशेष म्हणजे, फटाके फोडणाऱ्या व्यक्तीइतकाच धोका आजूबाजूला उभ्या असलेल्या व्यक्तींनाही असतो. लहान मुले या दुखापतींना अधिक बळी पडतात.

डोळ्यांचे संरक्षण करण्यासाठी कोणती काळजी घ्यावी?

• शक्यतो फटाके फोडण्याऐवजी सुरक्षित आणि तज्ज्ञांच्या देखरेखीखाली होणाऱ्या सार्वजनिक आतषबाजीचा आनंद घ्यावा.
• फटाके फोडताना सुरक्षित अंतर ठेवावे. फटाक्यांच्या अगदी जवळ उभे राहू नये.
• लहान मुलांना कधीही एकट्याने फटाके फोडू देऊ नयेत. मोठ्यांनी त्यांच्यावर सतत लक्ष ठेवावे.
• फुलबाज्या, अनार, रॉकेट किंवा इतर फटाके पेटवताना चेहरा आणि डोळे सुरक्षित अंतरावर ठेवावेत.
• फटाके फोडताना योग्य दर्जाचे संरक्षणात्मक चष्मे (Protective Eyewear) वापरावेत. साधे सनग्लासेस हे फटाक्यांपासून संरक्षणासाठी पुरेसे नसतात.
• एकदा पेटवलेला फटाका न फुटल्यास त्याच्या जवळ जाऊ नये किंवा पुन्हा पेटवण्याचा प्रयत्न करू नये.
• फटाके फोडल्यानंतर हात स्वच्छ धुवावेत. हात न धुता डोळ्यांना स्पर्श करू नये.
• धूर आणि प्रदूषणामुळे डोळ्यांची अॅलर्जी, खाज आणि जळजळ होऊ शकते. अशा वेळी डोळे चोळू नयेत.

फटाक्यामुळे डोळ्याला दुखापत झाल्यास काय करावे?

• फटाक्यामुळे डोळ्याला इजा झाल्यास वेळ न दवडता नेत्रतज्ज्ञांचा सल्ला घेणे अत्यंत महत्त्वाचे आहे.
• डोळा चोळू नये किंवा दाब देऊ नये.
• डोळ्यात घुसलेला कण किंवा वस्तू स्वतः काढण्याचा प्रयत्न करू नये.
• कोणतेही घरगुती उपाय, तेल किंवा औषधी मलम डोळ्यांत लावू नये.
• डोळ्यात एखादी वस्तू घुसल्याची किंवा गंभीर दुखापत झाल्याची शंका असल्यास डोळ्यावर दाब न देता त्वरित रुग्णालयात जावे.
• केवळ किरकोळ धूर किंवा धूळ गेल्यामुळे जळजळ होत असल्यास स्वच्छ पाण्याने डोळे धुवावेत. मात्र, दुखापतीची शंका असल्यास तातडीने वैद्यकीय तपासणी करून घ्यावी.

Eye Safety During Diwali: सावध राहा, सुरक्षित साजरा करा दिवाळी! फटके फोडताना डोळ्यांना इजा होऊ नये म्हणून ‘या’ पद्धतीने घ्या काळजी

लक्षात ठेवा, डोळ्यांना झालेली दुखापत सुरुवातीला किरकोळ वाटली तरी त्याचे गंभीर परिणाम होऊ शकतात. त्यामुळे कोणतीही दुखापत झाल्यास तपासणीसाठी विलंब करू नये.