Recipe : भाजी काय बनवावी ते सुचत नाहीये? मग चिंता सोडा आणि घरी बनवा रसरशीत ‘पापडाची भाजी’

Papad Subji Recipe : भारताच्या अनेक भागात पापडाची चमचमीत भाजी तयार करुन खाल्ली जाते. याची चव फार अप्रतिम लागते आणि रेसिपी फार झटपट तयार होते. तुम्ही ही डिश ट्राय केली नसेल तर एकदा नक्की बनवून खा.

• भारतीय खाद्यसंस्कृतीत पापडाचं महत्त्व अनन्यसाधारण
• पापडाला नेहमीच साई़ड डिशचा मान मिळत गेला आहे
• तुम्हाला माहिती आहे का? पापडाची भाजी देखील बनवली जाते

भारतीय पदार्थांना साथ देणारा आणि जेवणाची चव वाढवणारा फेमस कुरकुरीत पदार्थ म्हणजे पापड. आपण आजवर पापडला भाजून किंवा टाळून खाल्लं आहे पण तुम्हाला माहिती आहे का पापडाची मसालेदार भाजी देखील बनवली होते. विशेषत: जेव्हा घरी भाजी नसते, बाजारात जायची इच्छा नसते किंवा अचानक पाहुणे येतात, तेव्हा पापडाची भाजी म्हणजे तारणहार ठरते. कुरकुरीत पापड मसालेदार रसात मऊ होत जातात आणि तयार होते एकदम घरगुती, साधी पण अतिशय स्वादिष्ट डिश. ही भाजी बनवायला अत्यंत कमी वेळ आणि साधे साहित्य लागते. शिवाय पापडाची भाजी गरम भात, चपाती, भाकरी किंवा अगदी खिचडीसोबतही मस्तच लागते. परंपरेतून आलेली ही भाजी आपल्या दैनंदिन स्वयंपाकात एक वेगळाच आनंद देते. चला या रेसिपीसाठी लागणारे आवश्यक साहित्य आणि कृती नोट करून घेऊया.

एकाच भाजीत मिश्र भाज्यांचा संगम! हिवाळ्यात जरूर बनवून खा गुजराती स्टाईल ‘उंधियो’; रेसिपी नोट करा

साहित्य

• उडीद किंवा मूग पापड – ४ ते ५
• कांदा – १ मध्यम, बारीक चिरलेला
• टोमॅटो – १ मध्यम, बारीक चिरलेला
• आलं–लसूण पेस्ट – १ टीस्पून
• लाल तिखट – १ टीस्पून
• हळद – ¼ टीस्पून
• धणे–जिरे पावडर – १ टीस्पून
• गरम मसाला – ½ टीस्पून
• मोहरी – ½ टीस्पून
• जिरे – ½ टीस्पून
• कढीपत्ता – काही पाने (ऑप्शनल)
• तेल – २ टेबलस्पून
• मीठ – चवीनुसार
• पाणी – १ ते १½ कप
• कोथिंबीर – सजावटीसाठी

पास्ता बनवायला अवघड वाटतो? मग १५ मिनिटांमध्ये बनवा स्वादिष्ट Red Sauce Pasta, नोट करून घ्या रेसिपी

कृती

• यासाठी सर्वप्रथम सुरुवातीला पापड हलक्या हाताने थोडे मोडून घ्या किंवा मोठे तुकडे ठेवा.
• कढईत तेल गरम करा आणि त्यात मोहरी, जिरे आणि कढीपत्ता टाकून फोडणी करा.
• आता त्यात कांदा घालून तो सोनेरी होईपर्यंत परता.
• नंतर आलं–लसूण पेस्ट घालून छान परतल्यावर टोमॅटो घाला आणि तो मऊ होईपर्यंत शिजू द्या.
• मसाल्यांसाठी हळद, लाल तिखट, धणे–जिरे पावडर आणि मीठ घाला. हे मिश्रण एक मिनिट छान परता.
• नंतर इच्छेनुसार पाणी घालून थोडं उकळी येऊ द्या. आता गॅस मंद करून त्यात मोडलेले पापड सोडा आणि हलक्या हाताने दाबून मिक्स करा.
• पापड फार जास्त ढवळू नका, नाहीतर त्याच भरीत तयार होईल.
• झाकण ठेवून दोन-तीन मिनिटे भाजी शिजू द्या. अखेरीस गरम मसाला शिंपडा आणि कोथिंबीर घालून भाजी तयार.
• गरमागरम पापडाची भाजी चपाती, भाकरी किंवा गरम भातासोबत अप्रतिम लागते.