सकाळच्या नाश्ता करा हेल्दी, घरी बनवा खमंग तुपात भाजलेला ‘पालक थेपला’, मुलांच्या टीफीनसाठी ठरेल परफेक्ट पर्याय

Palak Thepla Recipe : थेपला हा गुजरातचा एक पारंपारिक पदार्थ असून सकाळच्या नाश्त्यासाठी किंवा लहान मुलांच्या टिफीनसाठी तो एक उत्तम पर्याय ठरतो. थेपला एकदाच बनवून अनेक दिवस साठवून देखील ठेवता येतो.

• थेपला हा एक गुजराती पदार्थ आहे.
• पालक थेपला तुम्ही कधी खाल्ला आहे का?
• याला घरीच सोप्या पद्धतीत बनवता येते.

पालक थेपला हा पौष्टिक, चवदार आणि झटपट तयार होणारा पारंपरिक गुजराती पदार्थ आहे. गव्हाच्या पिठात ताजा पालक, मसाले आणि दही मिसळून बनवला जाणारा हा थेपला नाश्ता, डबा किंवा प्रवासासाठी उत्तम पर्याय मानला जातो. पालकामध्ये लोह, फायबर, व्हिटॅमिन A आणि C भरपूर प्रमाणात असल्यामुळे हा पदार्थ चवीसोबतच आरोग्यासाठीही फायदेशीर ठरतो.

Monsoon Recipe : पावसाळ्यात आजारांपासून दूर राहायचंय? मग घरी नक्की बनवा हा आयुर्वेदिक काढा

साध्या पोळीपेक्षा पालक थेपला अधिक मऊ, मसालेदार आणि टिकाऊ असतो. लोणचे, दही, चटणी किंवा चहासोबत त्याची चव आणखी खुलते. लहान मुलांपासून मोठ्यांपर्यंत सर्वांना आवडणारा हा पदार्थ रोजच्या आहारात हिरव्या पालेभाज्यांचा समावेश करण्याचा सोपा मार्ग आहे. सकाळच्या धावपळीच्या वेळेत कमी साहित्य आणि कमी वेळेत तयार होणारा हा थेपला एकदा तरी नक्की करून पाहावा. चला जाणून घेऊया रेसिपी.

साहित्य

• 2 कप गव्हाचे पीठ
• 1 कप बारीक चिरलेला पालक
• 2 टेबलस्पून दही
• 1 टीस्पून आले-लसूण-हिरवी मिरची पेस्ट
• 1/2 टीस्पून हळद
• 1 टीस्पून लाल तिखट
• 1 टीस्पून धने-जिरे पूड
• 1/2 टीस्पून जिरे
• चिमूटभर हिंग
  1 टीस्पून तीळ (ऑप्शनल)
• 1 टेबलस्पून तेल
• चवीनुसार मीठ
• आवश्यकतेनुसार पाणी
• भाजण्यासाठी तेल किंवा तूप

Poha Cutlet: पावसाचा आनंद होईल दुप्पट! बनवा कुरकुरीत पोहा कटलेट, जाणून घ्या सोपी रेसिपी

कृती

• एका मोठ्या भांड्यात गव्हाचे पीठ, हळद, लाल तिखट, धने-जिरे पूड, जिरे, हिंग, तीळ आणि मीठ एकत्र मिसळा.
• त्यामध्ये बारीक चिरलेला पालक, दही, आले-लसूण-हिरवी मिरची पेस्ट आणि तेल घालून सर्व साहित्य एकजीव करा.
• आवश्यकतेनुसार थोडे थोडे पाणी घालत मऊ आणि लवचिक पीठ मळून घ्या. पीठ 10 ते 15 मिनिटे झाकून ठेवा.
• पीठाचे समान आकाराचे गोळे करून प्रत्येक गोळा हलक्या हाताने पातळ गोल किंवा त्रिकोणी थेपल्याच्या आकारात लाटा.
• गरम तव्यावर थेपला दोन्ही बाजूंनी भाजा. वरून थोडे तेल किंवा तूप लावून सोनेरी ठिपके येईपर्यंत शेकून घ्या.
• अशाच प्रकारे सर्व थेपले तयार करा आणि गरमागरम सर्व्ह करण्यासाठी बाजूला ठेवा.
• पालक थेपला दही, लोणचे, हिरवी चटणी किंवा गरम चहासोबत सर्व्ह करा. प्रवासासाठी किंवा डब्यातही हा पदार्थ तितकाच स्वादिष्ट लागतो.