हिवाळ्यात घरी बनवा चटकदार मुळ्याचा रायता, चवीबरोबर आरोग्याचीही काळजी

Muli Raita: मुळ्यामध्ये उष्ण गुणधर्म असतात ज्यामुळे हिवाळ्यात याचे सेवन आरोग्यासाठी फायद्याचे ठरते. तीच तीच बोरिंग मुळ्याची भाजी खाऊन कंटाळा आला असेल तर यापासून चटकदार असा रायता एकदा नक्की बनवून पहा.

हिवाळा ऋतू आता सुरु झाला आहे. या ऋतूत बाजारात भाज्यांचा भडीमार लागतो. या मोसमात बाजारात तुम्हाला अनेक प्रकारच्या भाज्या उपलब्ध होतील. भाज्या आपल्या आरोग्यासाठी फार फायदेशीर असतात, ज्यामुळे यांचे आवर्जून सेवन करावे. या ऋतूत अनेक गरमा गरम पदार्थांचा आस्वाद घेतला जातो मात्र आज आम्ही तुमच्यासोबत एका हटके, पौष्टिक आणि तितक्याच चविष्ट अशा रायत्याची रेसिपी शेअर करत आहोत.

तुम्ही आजवर काकडीचे, टोमॅटोचा, कांद्याचा रायता खाल्ला असेल मात्र तुम्ही कधी मुळ्याचा रायता खाल्ला आहे का? मुळ्यामध्ये शरीराला फायदेकारक ठरणारे अनेक अँटिऑक्सिडंट्स आणि व्हिटॅमिन सी आढळते. बहुतेक जणांना मुळ्याची भाजी खायला आवडत नाही अशा परिस्थितीत तुम्ही यापासून चविष्ट असा रायता तयार करू शकता. हा रायता चवीला अगदी अप्रतिम लागतो, तसेच फार कमी वेळेत बनून तयार देखील होतो. चला तर मग अजिबात वेळ न घालवता जाणून घेऊयात यासाठी लागणारे साहित्य आणि कृती.

नाश्त्यासाठी काहीतरी चवदार आणि आरोग्यदायी खायचे असेल तर झटपट बनवा मुरमुऱ्याचे अप्पे

साहित्य

• अर्धा मुळा
• अर्धा ते पाऊण वाटी दही
• 1 टीस्पून साखर
• 2 हिरव्या मिरच्या
• 5 ते 6 कडिपत्त्याची पाने
• 1 टीस्पून मोहरी आणि जिरे
• चिमूटभर हिंग
• चवीनुसार मीठ
• फोडणीसाठी तेल
• 1 टेबलस्पून बारीक चिरलेली कोथिंबीर

थंडीत बनवा काबुली चण्याचे कबाब, काही मिनिटांतच तयार होते सोपी रेसिपी

कृती

• मुळ्याचा रायता तयार करण्यासाठी सर्वप्रथम मुळा स्वछ धुवून पुसून घ्या
• त्यांनतर याची साल काढून मुळ्याला छान किसून घ्या
• आता किसलेला मुळा एका भांड्यात काढून घ्या
• नंतर दही फेटून घ्या आणि किसलेल्या मुळ्यामध्ये घाला
• यात हलकीशी साखरही घाला आणि मिक्स करा
• आता गॅसवर एक छोटी कढई गरम करायला ठेवा
• कढई गरम झाली की तेल, मोहरी, जिरे, हिंग, मिरच्यांचे तुकडे आणि कडिपत्ता टाकून फोडणी तयार करा
• तयार खमंग फोडणी मुळ्याच्या मिश्रणात टाका आणि मिक्स करा
• या शेवटी चिरलेली कोथिंबीर घाला आणि सर्व साहित्य पुन्हा एकदा व्यवस्थित एकजीव करून घ्या
• जेव्हा तुम्ही जेवणाच्या ताटात रायता सर्व्ह करत असाल त्याच्या अवघ्या काही वेळेआधी यात मीठ घाला
• कारण रायत्यामध्ये मीठ घातलं की लगेच त्याला पाणी सुटतं
• हा रायता नक्कीच तुमच्या जेवणाची चव वाढवेल आणि तुम्हाला पुन्हा पुन्हा ही रेसिपी बनवायला भाग पाडेल