Recipe : मुंबईची फेमस, सर्वांच्या आवडीची चटकदार ‘पाणीपुरी’ बनवा घरच्या घरी; रेसिपी जिंकेल सर्वांची मनं

Pani Puri Recipe : पाणीपुरी हा एक चवदार आणि भारताचा लोकप्रिय पदार्थ आहे. या चटकदार पदार्थाचे तर जगभरात दिवाने आहेत. तुम्हाला माहिती आहे का? तुम्ही घरीच स्वच्छ, ताजी आणि टेस्टी पाणीपुरी तयार करु शकता.

• भारताच्या प्रसिद्ध पदार्थांमध्ये पाणीपुरीचा आवर्जून समावेश होतो.
• पाणीपुरी हा एक चटकदार स्नॅक्सचा पर्याय आहे.
• लहानांनाच काय तर मोठ्यांनाही याची चव फार आवडते.

पाणीपुरी हा भारतातील सर्वात लोकप्रिय स्ट्रीट फूड प्रकारांपैकी एक आहे. खुसखुशीत पुरी, चटपटीत पाणी, आंबट-गोड चिंचेची चटणी आणि बटाट्याचा मसाला यांचा संगम म्हणजे पाणीपुरी. प्रत्येक घासात वेगवेगळ्या चवींचा अनुभव देणारा हा पदार्थ लहानांपासून मोठ्यांपर्यंत सगळ्यांच्या आवडीचा आहे. महाराष्ट्रात पाणीपुरीला खास मसालेदार आणि तिखट चव असते, तर उत्तर भारतात याला गोलगप्पा म्हणून ओळखले जाते.

Recipe : मेथाची भाजी नाही कुरकुरीत वडा वाढवेल जेवणाची चव… आजच नोट करा भन्नाट रेसिपी

रस्त्यावर मिळणारी पाणीपुरी जितकी आकर्षक वाटते, तितकीच ती घरच्या घरीही स्वच्छ आणि सुरक्षित पद्धतीने तयार करता येते. घरी बनवलेली पाणीपुरी अधिक चविष्ट आणि आपल्या आवडीनुसार तिखट-गोड करता येते. चला तर मग घरच्या घरी पाणीपुरी बनवण्याची सोपी रेसिपी जाणून घेऊया.

साहित्य:

पुरीसाठी:

• रवा – १ कप
• मैदा – २ टेबलस्पून
• मीठ – चिमूटभर
• पाणी – आवश्यकतेनुसार
• तळण्यासाठी तेल

पाणीपुरीच्या पाणीसाठी:

• पुदिना पाने – १ कप
• कोथिंबीर – १ कप
• हिरव्या मिरच्या – २-३
• आलं – १ छोटा तुकडा
• चिंच – २ टेबलस्पून
• गूळ – २ टेबलस्पून
• भाजलेले जिरे पावडर – १ टीस्पून
• काळं मीठ – चवीनुसार
• मीठ – चवीनुसार
• थंड पाणी – ३-४ कप

 

बटाटा मसाला:

• उकडलेले बटाटे – ३-४
• उकडलेले काबुली चणे – १/२ कप
• लाल तिखट – १/२ टीस्पून
• चाट मसाला – १ टीस्पून
• मीठ – चवीनुसार
• कोथिंबीर – थोडी

पाहताच क्षणी सुटेल तोंडाला पाणी! मालवणी पद्धतीमध्ये बनवा कुरकुरीत बांगडा फ्राय, नोट करून घ्या रेसिपी

कृती:

• पुरी बनवण्यासाठी रवा, मैदा आणि मीठ एकत्र करून घट्ट पीठ मळा. ते १५-२० मिनिटे झाकून ठेवा.
• पीठ लाटून छोट्या गोल पुरी कापा आणि गरम तेलात खुसखुशीत होईपर्यंत तळा.
• पाणी तयार करण्यासाठी पुदिना, कोथिंबीर, हिरव्या मिरच्या, आलं आणि चिंच मिक्सरमध्ये बारीक वाटून घ्या.
• या मिश्रणात गूळ, जिरे पावडर, काळं मीठ, मीठ आणि थंड पाणी घालून चांगलं मिसळा.
• बटाट्याचा मसाला तयार करण्यासाठी उकडलेले बटाटे मॅश करा आणि त्यात चणे, तिखट, चाट मसाला, मीठ व कोथिंबीर घाला.
• सर्व तयार झाल्यावर पुरीच्या वर हलकं छिद्र करा आणि त्यात बटाट्याचा मसाला भरा.
• शेवटी त्या पुरीत तयार केलेलं पाणी घालून लगेच सर्व्ह करा.
• गरमागरम, चटपटीत आणि ताजीतवानी पाणीपुरी घरच्या घरी तयार आहे.