Palak Vada Recipe : संध्याकाळच्या नाश्त्यासाठी काही कुरकुरीत खायचंय? मग घरी बनवा टेस्टी ‘पालक वडा’

Recipe : संध्याकाळी हलकी भूक लागली की काय खावे ते सुचत नाही. संध्याकाळच्या नाश्त्याला यावेळी काहीतरी हटके ट्राय करा, घरी बनवा खमंग आणि कुरकुरीत चवीचे पालक वडे. रेसिपी काही मिनिटांची आहे.

• पावासाच्या थंड वातावरणात कुरकुरीत पदार्थ खाण्याची फार इच्छा होत असते.
• यासाठी पालक वडा एक चांगला पर्याय ठरेल.
• संध्याकाळच्या नाश्त्यासाठी तुम्ही ही रेसिपी ट्राय करु शकता.

पावसाळ्यात किंवा थंड हवामानात गरमागरम आणि कुरकुरीत वडा खाण्याची मजाच काही वेगळी असते. अशा वेळी पालक वडा हा चवीसोबतच पौष्टिकतेचाही उत्तम पर्याय ठरतो. ताज्या पालकाच्या पानांमध्ये असलेली जीवनसत्त्वे, खनिजे आणि फायबर यामुळे हा पदार्थ अधिक पौष्टिक बनतो. बेसन, तांदळाचे पीठ आणि निवडक मसाल्यांच्या मिश्रणातून तयार होणारे हे वडे बाहेरून खुसखुशीत तर आतून मऊ लागतात.

नेहमीच्या चिकनला द्या हटके ट्विस्ट! फॅमिली डिनरसाठी घरच्या घरी बनवा Honey Orange Flavored Chicken

सकाळच्या नाश्त्यासाठी, संध्याकाळच्या चहासोबत किंवा पाहुण्यांसाठी झटपट तयार होणारा हा पदार्थ सर्वांनाच आवडतो. हिरवी चटणी, टोमॅटो सॉस किंवा गरम चहासोबत पालक वड्यांची चव अधिक खुलते. कमी वेळात आणि सहज उपलब्ध साहित्य वापरून ही रेसिपी घरच्या घरी अगदी सोप्या पद्धतीने तयार करता येते.

साहित्य

• २ कप बारीक चिरलेला पालक
• १ कप बेसन
• २ टेबलस्पून तांदळाचे पीठ
• १ बारीक चिरलेला कांदा
• २ हिरव्या मिरच्या (बारीक चिरलेल्या)
• १ टीस्पून आले-लसूण पेस्ट
• ½ टीस्पून हळद
• १ टीस्पून लाल तिखट
• १ टीस्पून धणे-जिरे पूड
• चिमूटभर हिंग
• चवीनुसार मीठ
• बारीक चिरलेली कोथिंबीर
• तळण्यासाठी तेल

Missi Roti Recipe : गहू आणि बेसनापासून तयार केली जाणारी खमंग आणि पाैष्टीक चपाती, तुम्ही कधी मेस्सी रोटी खाल्ली आहे का?

कृती

• पालक स्वच्छ धुऊन पाणी पूर्णपणे निथळून घ्या आणि बारीक चिरून मोठ्या भांड्यात ठेवा.
• त्यामध्ये बेसन, तांदळाचे पीठ, कांदा, हिरव्या मिरच्या, आले-लसूण पेस्ट, हळद, लाल तिखट, धणे-जिरे पूड, हिंग,
• मीठ आणि कोथिंबीर घालून एकत्र करा.
• पालकातून पाणी सुटत असल्याने आवश्यक वाटल्यासच थोडे पाणी घालून घट्ट मिश्रण तयार करा.
• कढईत तेल गरम करा. तेल मध्यम आचेवर गरम झाल्यावर मिश्रणाचे छोटे-छोटे वडे हाताने किंवा चमच्याने तेलात सोडा.
• वडे दोन्ही बाजूंनी सोनेरी रंग येईपर्यंत आणि कुरकुरीत होईपर्यंत तळून घ्या.
• तळलेले वडे टिश्यू पेपरवर काढा, जेणेकरून अतिरिक्त तेल निघून जाईल.
• गरमागरम पालक वडे हिरवी चटणी, गोड चिंचेची चटणी किंवा टोमॅटो सॉसबरोबर सर्व्ह करा.