US FDA approves Revolution Medicines' drug 'Rasonc' for metastatic pancreatic cancer
कर्करोगासारख्या (Cancer) जीवघेण्या आजाराविरुद्धच्या जागतिक लढ्यात वैद्यकीय शास्त्राला एक अभूतपूर्व आणि ऐतिहासिक यश मिळाले आहे. वैद्यकीय विश्वात अत्यंत कठीण मानल्या जाणाऱ्या मेटास्टॅटिक स्वादुपिंडाच्या (Pancreatic) कर्करोगावर मात करण्यासाठी अमेरिकेच्या अन्न आणि औषध प्रशासनाने (FDA) ‘रेव्होल्यूशन मेडिसिन्स’ (Revolution Medicines) या कंपनीच्या ‘रासॉन्क’ (Rasonque / Daraxonrasib) या नवीन तोंडावाटे घ्यायच्या औषधाला अधिकृत मंजुरी दिली आहे. स्वादुपिंडाचा कर्करोग हा सुरुवातीच्या टप्प्यात ओळखणे कठीण असते आणि तो वेगाने पसरत असल्याने त्यावर प्रभावी उपचार शोधणे हे शास्त्रज्ञांपुढे अनेक दशकांपासून मोठे आव्हान होते. आता एफडीएच्या या निर्णयामुळे जगभरातील कर्करोगग्रस्त रुग्णांना एक नवीन आशेचा किरण मिळाला आहे.
वैद्यकीय चाचण्यांमध्ये (Phase 3 Trials) या औषधाचे परिणाम पाहून जगभरातील डॉक्टर आणि शास्त्रज्ञ अचंबित झाले आहेत. प्रगत अवस्थेतील आणि आधी केमोथेरपी घेतलेल्या स्वादुपिंडाच्या कर्करोगाच्या रुग्णांवर जेव्हा या गोळीचा प्रयोग करण्यात आला, तेव्हा रुग्णांचा जगण्याचा दर आणि कालावधी थेट दुप्पट झाल्याचे दिसून आले. पारंपारिक केमोथेरपी उपचारांच्या तुलनेत या औषधाने कर्करोगाच्या गाठींची वाढ रोखण्यात आणि रुग्णांचे आयुष्य वाढवण्यात अभूतपूर्व यश मिळवले आहे. दिवसातून फक्त एकदाच घ्यायची ही गोळी अशा रुग्णांसाठी अत्यंत फायदेशीर ठरेल ज्यांना तीव्र केमोथेरपीचे दुष्परिणाम सहन होत नाहीत.
जागतिक घडामोडी संबंधित बातम्या वाचण्यासाठी येथे क्लिक करा : Nepal Flood: ‘नेपाळमधील धोका टळला नाही…’ येऊ शकतो आणखी एक विनाशकारी पूर? शास्त्रज्ञांनी दिला मोठा इशारा
या औषधाच्या किंमतीबद्दल बोलायचे झाल्यास, रेव्होल्यूशन मेडिसिन्सने ‘रासॉन्क’ गोळीच्या ३० दिवसांच्या डोसची किंमत ३९,८०० अमेरिकन डॉलर्स (अंदाजे ३८ लाख रुपये) निश्चित केली आहे. ही किंमत सर्वसामान्यांच्या दृष्टीने अत्यंत प्रचंड असली, तरी कर्करोगाच्या पेशींवर अचूक मारा करणाऱ्या या अत्याधुनिक ‘टारगेटेड थेरपी’चे संशोधन आणि विकास अत्यंत खर्चिक प्रक्रिया आहे. तथापि, कंपनीने स्पष्ट केले आहे की, आर्थिकदृष्ट्या दुर्बल आणि गरजू रुग्णांना हे औषध उपलब्ध व्हावे यासाठी त्यांनी एका विशेष सहकार्य आणि आर्थिक मदत कार्यक्रमाची (‘ONPath Program’) घोषणा केली आहे, ज्यामुळे जास्तीत जास्त रुग्णांना हे औषध परवडणाऱ्या दरात मिळण्यास मदत होईल.
या गोळीचा प्रत्यक्षात वापर करणाऱ्या रुग्णांचे अनुभवही अत्यंत सकारात्मक आहेत. अमेरिकेतील कॅलिफोर्निया येथे राहणाऱ्या ८८ वर्षांच्या बार्बरा अँडेस (Barbara Andes) या स्वादुपिंडाच्या कर्करोगाशी झुंज देत आहेत. त्यांनी सलग एक वर्ष केमोथेरपीचा अत्यंत त्रासदायक उपचार घेतला होता. परंतु, जुलै महिन्यात त्यांनी या नवीन ‘रासॉन्क’ गोळीचा डोस सुरू केला. त्यांनी आपला अनुभव सांगताना नमूद केले की, या गोळीमुळे त्यांना होणारी तीव्र मळमळ आणि सतत जाणवणारा अशक्तपणा खूपच कमी झाला आहे. आता त्या आपली दैनंदिन कामे स्वतः करू शकत असून, त्यांच्या जीवनाचा दर्जा सुधारला आहे. “हे औषध हजारो रुग्णांसाठी एक आशीर्वाद ठरत आहे,” अशी भावना त्यांनी व्यक्त केली.
जागतिक घडामोडी संबंधित बातम्या वाचण्यासाठी येथे क्लिक करा : Nepal Floods : नेपाळमध्ये विनाशकारी विध्वंस घडवणारी हिमनदीची दुर्घटना नक्की काय आहे? समजून घ्या कसे तुटतात ‘हे’ ग्लेशियर
सामान्यतः एफडीएद्वारे कोणत्याही नवीन कर्करोगाच्या औषधाचे सर्व निकष तपासून त्याला मंजुरी देण्यास १० ते १२ महिन्यांचा प्रदीर्घ कालावधी लागतो. परंतु, या औषधाचे अद्भूत परिणाम आणि स्वादुपिंडाच्या कर्करोगावरील उपचारांची निकड लक्षात घेऊन एफडीएने आपल्या नवीन ‘फास्ट-ट्रॅक / नॅशनल प्रायोरिटी’ पुनरावलोकन प्रक्रियेद्वारे (Priority Review) अवघ्या १ ते २ महिन्यांत या गोळीला मंजुरी दिली. रेव्होल्यूशन मेडिसिन्सचे मुख्य कार्यकारी अधिकारी (CEO) डॉ. मार्क गोल्डस्मिथ यांनी सांगितले की, “ही मंजुरी म्हणजे स्वादुपिंडाच्या कर्करोगाचा मुख्य मुख्य घटक असलेल्या ‘RAS-प्रोटीन’च्या म्युटेशनला रोखण्यासाठी गेल्या एका दशकाहून अधिक काळ केलेल्या अथक परिश्रमांचे फलित आहे.”
आर्थिक विश्लेषकांच्या मते, या औषधाच्या मंजुरीमुळे आणि बाजारातील वाढत्या मागणीमुळे चालू वर्षाच्या तिसऱ्या तिमाहीत कंपनीचा महसूल २८ दशलक्ष डॉलर्सवर पोहोचण्याची शक्यता आहे. तर दीर्घकाळात हे औषध जगभरात ११.५ अब्ज डॉलर्सचा व्यवसाय करू शकते. अमेरिकन कॅन्सर सोसायटीच्या अहवालानुसार, एकट्या अमेरिकेत यावर्षी अंदाजे ६७,३५० नवीन रुग्णांना स्वादुपिंडाच्या कर्करोगाचे निदान होण्याची शक्यता आहे. अशा वेळी रासॉन्क हे औषध जागतिक आरोग्य क्षेत्रात एक क्रांती घडवून आणणारे ठरत आहे.
.png "Videos"){kind=small}
