मार्च महिना सुरु झाला की वातावरणातील तापमान वाढायला सुरुवात होते. या दिवसात त्वचेचे विकार जास्त जाणवतात. सतत त्वचा टॅन होणं, रॅशेज येणं, लाल पडणं असे अनेक समस्य़ा निर्माण होतात. अनेक जण टॅनिंग होऊ नये म्हणून सनस्क्रीन वापरतात. पण फक्त चांगलं सनस्क्रीन असून भागत नाही, तर तुम्ही काय कपडे वापरताय यावर पण अनेक गोष्टी अवलंबून असतात. असं म्हणातात की, फिकट रंगाचे कपडे परिधान केल्याने उष्णता परावर्तीत होऊन उन्हाच्या झळा जाणवत नाही. जर तुम्ही पाहिलं असेल तर आखाती देशात उन्हाचं प्रमाण जास्त असतं आणि म्हणून तिथली लोकं पांढरे कपडे जास्त वापरतात.
उन्हाळ्यात पांढरे किंवा सुती कपडे वापरण्याचं कारण म्हणजे उकाड्यामुळे शरीरातून निघाणाऱ्या घामाचा निचरा बऱ्याच वेळेस योग्य पद्धतीने होत नाही. अनेकदा नायलॉन किंवा टेरिकॉटचे कपडे वापरले जातात. उन्हाळ्यात या कपड़्य़ांमुळे होतं काय तर घाम त्वचेवर जसाच्या तसा राहतो आणि त्यामुळे इंफेक्शन होतं.
सुती कपडे
तज्ञांच्या मते, शरीरातून घामावाटे नको असलेले क्षार बाहेर पडतात. त्यामुळे त्याचा गंभीर परिणाम हा त्वचेच्या आरोग्यावर होतो. म्हणूनच गरमीच्या दिवसात सुती कॉटनचे कपडे परिधान करणं फायदेशीर ठरतं. सुती कपडे वापरल्याने अतिरिक्त घाम येण्यावर नियंत्रण येतं. कॉटनचे कपडे घाम शोषून घेतात. त्यामुळे घामामुळे येणारी खाज, पुरळ याचं प्रमाण कमी होतं. कॉटनच्या कपड्यांनी गरमीचा त्रास होत नाही. त्याचप्रमाणे फिकट पांढऱ्या रंगाच्या कॉटन फॅब्रिकच्या वापराने सूर्याची किरणं परावर्तीत होतात. त्यामुळे बाहेर फिरताना ऊन्हाच्या झळा जाणवत नाही.
कॉटन फॅब्रिक व्यातिरिक्त बाजारात वेगवेगळे प्रकार आहेत. ऊन्हाळा सुरू झाला की, कॉटनच्या कपड्यांना मोठ्या प्रमाणात मागणी असते. बाजारात कोणकोणते फॅब्रिकचे प्रकार आहेत ते जाणून घेऊयात.
लिनेन
कॉटनला पर्याय म्हणूनही लिनेन फॅब्रिकचा वापर केला जातो. लिनेनचं फॅब्रिक सैलसर असतं. त्यामुळे ते घाम येऊन त्वचेला चिटकत नाही. म्हणूनच खास गरमीच्या दिवसात तुम्हाला कपड्यांची शॉपिंग करायाची असल्यास तुम्ही लिनेन फॅब्रीक नक्की ट्राय करा. लिनेन फॅब्रिकने कोणतंही इंफेक्शन होत नाही. शिवाय सैल कपडे असल्याने घाम शोषला जातो.
खादीचे कपडे
खादीच्या कपड्यांना फक्त भारतातच नाही तर जागतिक पातळीवर मोठ्या प्रामाणात मागणी आहे. भारताची कापड उद्योगातली ओळख म्हणजे खादी. उन्हाळ्यात खादीच्या कपड्यांना बाजारात मोठी पसंती मिळते. तुम्ही खादीच्या वेगवेगळ्या डीझाइन्सचे कुर्ती आणि टी-शर्ट नक्की वेअर करू शकता. यामुळे तुम्हाला कोणताही उष्णतेचा त्रास होणार नाही.
