विकेंड स्पेशल! यंदा घरी ट्राय करा मंगलोरियन स्टाईल ‘प्राॅन्स घी रोस्ट’; मसालेदार आणि सुगंधित चव मनाला करेल खुश

Prawns Ghee Roast Recipe : भरपूर तूप आणि मसाले वापरून तयार केलेली ही डिश मंगुळुरुमध्ये फार लोकप्रिय आहे. विकेंडच्या निमित्ताने तुम्ही घरी ही रेसिपी ट्राय करू शकता.

• कोळंबीची भाजी तर आपण नेहमीच खातो यावेळी काही वेगळं बनवा
• प्राॅन्स घी रोस्ट हा मंगळुरूचा एक लोकप्रिय पदार्थ आहे
• भरपूर तूप आणि मसाल्यांमध्ये शिजवून याला तयार गेले जाते

कोकण किनारपट्टीवर आणि दक्षिण भारतात समुद्री खाद्याला एक वेगळीच ओळख आहे. त्यातही “घी रोस्ट” ही एक अशी डिश आहे जी प्रत्येक खाद्यप्रेमीच्या मनात खास स्थान मिळवते. सुरुवातीला मंगळुरू परिसरातून प्रसिद्ध झालेली ही डिश आज संपूर्ण भारतात लोकप्रिय झाली आहे. तिची खासियत म्हणजे भरपूर तूपात भाजलेले मसाले, आंबट–तिखट चव आणि कोळंबीचा रसाळपणा. प्रॉन्स घी रोस्ट म्हणजे स्वाद, सुगंध आणि पारंपरिक मसाल्यांचं एक अद्भुत संगम आहे.

हिवाळ्यात गरमागरम पदार्थ खाण्याची इच्छा झाल्यास सोप्या पद्धतीमध्ये बनवा टेस्टी फ्लॉवर पकोडे, नोट करून घ्या रेसिपी

तुपाच्या सुवासात भाजलेले लाल मिरची, चिंच, आणि मसाले यांचं मिश्रण कोळंबीला असा स्वाद देतं की पहिला घास घेताच जिभेवर चवदार स्फोट होतो. ही डिश खास करून रविवारी दुपारच्या जेवणात भात किंवा नेर डोशाबरोबर सर्व्ह केली की संपूर्ण जेवणाचा आनंद द्विगुणित होतो. चला तर मग पाहूया, ही स्वादिष्ट प्रॉन्स घी रोस्ट रेसिपी घरच्या घरी कशी तयार करायची.

साहित्य

• कोळंबी (साफ केलेली) – ५०० ग्रॅम
• तूप – ४ ते ५ टेबलस्पून
• मीठ – चवीनुसार
• हळद – अर्धा चमचा
• लिंबूरस – एक टेबलस्पून

मसाल्याकरिता:

• सुक्या लाल मिरच्या – ८ ते १० (तिखट आवडीनुसार कमी-जास्त)
• धने – १ टेबलस्पून
• जिरे – अर्धा चमचा
• मेथी दाणे – ५ ते ६
• लसूण पाकळ्या – ७ ते ८
• चिंच – छोटा गोळा
• गूळ – अर्धा चमचा (ऑप्शनल)

Recipe : अलिया भट्टच्या आवडीचा बीटरूट सॅलड आता घरीच बनवा; वजन कमी करण्यास करेल मदत

कृती

• यासाठी प्रथम कोळंबी स्वच्छ धुऊन त्यात मीठ, हळद आणि लिंबूरस घालून १५ मिनिटं मुरवून ठेवा.
• एका पॅनमध्ये थोडं तूप घेऊन त्यात सुक्या लाल मिरच्या, धने, जिरे आणि मेथी दाणे परतून घ्या.
• हे मसाले थंड झाल्यावर मिक्सरमध्ये लसूण, चिंच आणि थोडंसं पाणी घालून एक घट्ट पेस्ट तयार करा.
• कढईत तूप गरम करून त्यात ही मसाल्याची पेस्ट टाका आणि मंद आचेवर भाजा. मसाल्यातून तुपाचा सुगंध येऊ लागला की त्यात मुरवलेली कोळंबी घाला. सगळं मिश्रण नीट हलवत कोळंबी मसाल्यात मुरेल याची काळजी घ्या.
• १०–१२ मिनिटं झाकण ठेवून मंद आचेवर शिजवा. मध्ये एक-दोन वेळा हलवा. कोळंबी पूर्ण शिजली आणि तूप
• वर येऊ लागलं की प्रॉन्स घी रोस्ट तयार आहे.
• ही घी रोस्ट डिश भात, नेर डोसा, पराठा किंवा गरम भाकरीसोबत अप्रतिम लागते.
• सर्व्ह करताना वरून थोडंसं वितळलेलं तूप घातलं की चव अजूनच खुलते.

टीप

• कोळंबी जास्त शिजवू नका, नाहीतर ती कडक होईल.
• पारंपरिक चव मिळवण्यासाठी तुपाचाच वापर करा.
• तिखट आवडीनुसार मिरच्यांचं प्रमाण कमी-जास्त करता येतं.