शनिवार, 24 ऑक्टोबर 2026
पुणे : प्रेमसंबंध ठेवण्यास नकार दिल्याच्या रागातून तरुणाने तिचा विनयभंग (Molestation of Girl) करीत आईला मारहाण केली. त्याशिवाय त्याच्या साथीदारांनी तरुणीच्या मित्रावर वार (Attack on Youth) करून जखमी केल्याची घटना आंबेगाव पठार परिसरात घडली. याप्रकरणी समर्थ परदेशी (रा.आंबेगाव पठार) आणि त्याच्या दोन साथीदारांविरुद्ध भारती विद्यापीठ पोलिसांनी गुन्हा दाखल केला आहे.
पीडित तरुणी व आरोपी समर्थ यांच्यात तीन वर्षांपासून प्रेमसंबंध होते. परंतु, वादातून मागील तीन महिन्यापासून तरुणीने आरोपीसोबत प्रेमसंबंध तोडले होते. त्याचा राग मनामध्ये धरुन आरोपीने तरुणीचा पाठलाग केला. तरुणी घरासमोर पाणी भरत असताना, ‘तू मला पाहिजे, तू मला खूप आवडते’ असे म्हणून तिचा हात पकडून विनयभंग केला. त्यामुळे तरुणीने आरडाओरड केली असता, तरुणीची आई, भाऊ त्याठिकाणी आले. त्यावेळी आरोपींनी तिच्या आईच्या पोटात लाथ मारुन शिवीगाळ केली.
दरम्यान, आरोपींविरुद्ध तक्रार करण्यासाठी तरुणी पोलिसांत गेली. तिच्या आईस ससून रुग्णालयात उपचारासाठी पाठविले. त्यावेळी टोळक्याने तिचा पाठलाग करुन मित्र सीताराम रसाळ याच्यावर वार करुन जखमी केले. याप्रकरणी पोलीस उपनिरीक्षक एस. घोगरे तपास करत आहे.
